ភ្នំពេញ៖ តុលាការកំពូលពីនៅថ្ងៃទី ២៨ តុលានេះ បានប្រកាសសាលដីកាឲ្យលោក លៀម ប៊ុនរឿន អតីតប្រធានមន្ទីរសុរិយោដីខេត្តពោធិ៍សាត់ជាប់ពន្ធនាគារ ៨ ឆ្នាំ និងរឹបអូសផ្ទះ ២ កន្លែងរថយន្ត ១ គ្រឿង ព្រមទាំងប្រាក់ ១៧ ០០០ ដុល្លារ ស្របតាមការសម្រេចរបស់តុលាការថ្នាក់ក្រោមដដែល បន្ទាប់ពីជំនុំជម្រះកាលពីថ្ងៃទី ២១ តុលា។
នៅក្នុងបន្ទប់សវនាការតុលាការកំពូលនាថ្ងៃនេះ លោកប្រធានក្រុមប្រឹក្សាជំនុំជម្រះ យូ យុត្ថារ៉ា បានអានសាលដីកានៅចំពោះមុខជនជាប់ចោទថា ក្រោយពីបានពិភាក្សាគ្នាមកក្រុមប្រឹក្សាជំនុំជម្រះតុលាការកំពូលយល់ឃើញថា ទាំងជនជាប់ចោទទាំងមេធាវីការពារសិទ្ធិឲ្យជនជាប់ចោទសុទ្ធតែបានលើកឡើងថា តាំងពីនៅសាលាដំបូងរាជធានីភ្នំពេញ និងនៅសាលាឧទ្ធរណ៍ពុំបានពិចារណារឿងនេះឲ្យបានត្រឹមត្រូវនៅឡើយទេ ព្រោះថាជនជាប់ចោទចូលរួមសហការជាមួយនគរបាលដោយពុំបង្កឲ្យមានបញ្ហាអ្វីឡើយ។
លោកចៅក្រមបន្តថា ក្នុងពេលជំនុំជម្រះជនជាប់ចោទបានស្នើសុំតុលាការកំពូលឲ្យផ្តល់ស្ថានសម្រាលទោសខ្លះ និងសុំកុំឲ្យតុលាការរឹបអូសយកផ្ទះ ១ ល្វែងនៅបុរីប៉េងហួតស្ទឹងមានជ័យ និងនៅខេត្តពោធិ៍សាត់ ១ កន្លែង ព្រមទាំងសុំយករថយន្តម៉ាក KIA ១ គ្រឿងវិញ និងសុំប្រាក់ដែលសមត្ថកិច្ចបានរឹបអូសយកចំនួន ១៧ ០០០ ដុល្លារមកវិញ។
លោកថ្លែងថា៖ «ការស្នើសុំខាងលើមិនអាចជាមូលហេតុដែលឲ្យតុលាការកំពូលពិចារណាបានទេ។ សាលក្រម និងសាលដីការបស់តុលាការទាំង ២ ថ្នាក់សម្រេចមកនេះមានលក្ខណៈត្រឹមត្រូវតាមច្បាប់ហើយ។ ដូច្នេះតុលាការតម្កល់ការសម្រេចនោះដដែល»។
តាមកំណត់ហេតុតុលាការកំពូលបង្ហាញថា ជនជាប់ចោទត្រូវបានសមត្ថកិច្ចឃាត់ខ្លួនកាលពីថ្ងៃទី ២៧ ខែ កក្កដា ឆ្នាំ ២០១៩ តាមបណ្តឹងរបស់ជនរងគ្រោះម្នាក់ ពាក់ព័ន្ធករណីទារប្រាក់ខុសច្បាប់ចំនួន ១០ ម៉ឺនដុល្លារ ជាថ្នូរនឹងការចេញច្បាប់ឱ្យសាងសង់ទីតាំងក្រុមហ៊ុន រួចបានបញ្ជូនខ្លួនមកឱ្យអង្គភាពប្រឆាំងអំពើពុករលួយ (ACU) មុនពេលបញ្ជូនបន្តទៅសាលាដំបូងរាជធានីភ្នំពេញ។
បើតាមកំណត់ហេតុនេះ ជនជាប់ចោទឈ្មោះ លៀម ប៊ុនរឿន មានផ្ទះនៅបុរីប៉េងហួតប៉ុស្តិ៍វិទ្យុស្ទឹងមានជ័យរាជធានីភ្នំពេញចំនួន ១ ផ្ទះនៅខេត្តពោធិ៍សាត់ចំនួន ២ និងមានរថយន្ត ២ គ្រឿង ដោយ ១ គ្រឿងម៉ាក Lexus 570 ពណ៌មាសស៊េរីឆ្នាំ ២០១០ និងរថយន្ត ១ គ្រឿងទៀត ម៉ាក KIA Morning ពណ៌ស ស៊េរីឆ្នាំ ២០១២។
ក្នុងសំណុំរឿងនេះ លោក លៀម ប៊ុនរឿន ត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២៧ ខែ កុម្ភៈ ឆ្នាំ ២០២០ ផ្តន្ទាទោសដាក់ពន្ធនាគារ ៨ ឆ្នាំ ចោទពីបទវិតិក្រម បទរំលោភអំណាច និងបទសម្អាតប្រាក់ និងពិន័យប្រាក់ចំនួន ៨ លានរៀលចូលថវិការដ្ឋ ព្រមទាំងរឹបអូសផ្ទះ ២ កន្លែង រថយន្ត ១ គ្រឿង ព្រមទាំងប្រាក់ ១៧ ០០០ ដុល្លារផង៕