.jpg)
ភ្នំពេញៈ តុលាការកំពូលនៅថ្ងៃទី៣ធ្នូនេះ បានប្រកាសសាលដីកា ចំពោះមុខជនជាប់ចោទម្នាក់ ឲ្យជាប់គុក ១ជីវិតដដែល បន្ទាប់ពីជំនុំជម្រះកាលពីថ្ងៃទី ២៦ ខែវិច្ឆិកា ពាក់ព័ន្ធករណីប្លន់បាញ់សម្លាប់ស្ត្រីម្នាក់ នៅម្តុំពោធិ៍ចិនតុង កាលពីឆ្នាំ ២០១១។
លោកស្រី ចៅក្រម គិម សត្ថាវី បានអានសាលដីកា នៅចំពោះមុខជនជាប់ចោទថា សំណុំរឿងនេះ មានជនជាប់ចោទឈ្មោះ ឡាយ វណ្ណៈ ដែលក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទ ក្រោយពីបានស្តាប់ការសន្និដ្ឋាន របស់តំណាងមហាអយ្យការមក និងក្រោយពីស្តាប់ការឆ្លើយសារភាព របស់ជនជាប់ចោទ តុលាការយល់ឃើញថា កាលពីថ្ងៃជំនុំជម្រះ មេធាវីរបស់ជនជាប់ចោទ បានសុំប្តូរបទចោទ ពីឃាតកម្មគិតទុកជាមុន ទៅជាបទប្លន់វិញ និងថាខ្លួនមិនបានគិតទុកជាមុន ក្នុងការបាញ់សម្លាប់ស្ត្រីរងគ្រោះទេ។
លោកស្រីថ្លែងថា៖ «ករណីនេះ តុលាការ មិនអាចប្តូរបទចោទតាមការស្នើសុំបានទេ ដោយសារថា មុនធ្វើសកម្មភាពគឺជនជាប់ចោទ និងបក្ខពួក បានត្រៀមនិងមានគម្រោងចេញធ្វើសកម្មភាពប្លន់ស្ត្រីរងគ្រោះពិតមែន។ ដូច្នេះតុលាការកំពូលយល់ថា សាលាដំបូងរាជធានីភ្នំពេញ និងសាលាឧទ្ធរណ៍ផ្តន្ទាទោសជនជាប់ចោទត្រឹមត្រូវតាមលក្ខណៈច្បាប់ហើយ ដូច្នេះតុលាការកំពូល សម្រេចតម្កល់សាលដីការបស់សាលាឧទ្ធរណ៍ទុកជាបានការដដែល»។
គួររំឭកដែរថា កាលពីថ្ងៃជំនុំជម្រះ លោក ពេជ្រ ផល្លាសម្បត្តិ ជាមេធាវីការពារសិទ្ធិឲ្យជនជាប់ចោទ បានស្នើសុំតុលាការថា កូនក្តីរបស់លោក បានសារភាពពីកំហុសរបស់គាត់នៅគ្រប់ដំណាក់កាលតុលាការអស់ហើយ។ ហេតុដូច្នេះសូមតុលាការមេត្តាប្តូរបទចោទ ពីឃាតកម្មគិតទុកជាមុន មកជាបង្កហិង្សាបណ្តាលឲ្យជនរងគ្រោះមរណៈភាពវិញ។
តាមកំណត់ហេតុ តុលាការបញ្ជាក់ថា កាលពីថ្ងៃទី ២៨ ខែសីហា ឆ្នាំ២០១១ ស្ត្រីរងគ្រោះ ឈ្មោះជួន ធារ៉ា អាយុ៤៨បានជិះម៉ូតូចេញពីកន្លែងប្តូរលុយមួយកន្លែង នៅម្តុំផ្សារអូឡាំពិក ខណ្ឌចំការមន ហើយត្រឡប់ទៅផ្ទះវិញ នៅម្តុំរង្វង់មូលថ្នល់បំបែកចោមចៅ ជាមួយកូនប្រុសម្នាក់។ ប៉ុន្តែពេលជិះដល់ពាក់កណ្តាលផ្លូវនៅក្នុងភូមិព្រៃទា សង្កាត់ចោមចៅ ខណ្ឌដង្កោ ស្រាប់តែក្រុមជនជាប់ចោទ ធ្វើសកម្មភាពប្លន់បាញ់៣គ្រាប់ផ្ទុះ១គ្រាប់ត្រូវចំដើមទ្រូងខាងឆ្វេងធ្លាយទៅក្រោយ និងឆក់យកស្បោងលុយជាង១០០លានរៀលគេចខ្លួនបាត់ ខណៈកូនប្រុសឈ្មោះផុន ឡាទីអាយុ ២១ ឆ្នាំមិនរងរបួស។ រីឯស្ត្រីរងគ្រោះ បានស្លាប់នៅមន្ទីរពេទ្យកាលម៉ែត។
កំណត់ហេតុបង្ហាញបន្តថា ប៉ុន្មានថ្ងៃក្រោយមក សមត្ថកិច្ចបានស្រាវជ្រាវចាប់ខ្លួនក្រុមជនជាប់ចោទឡាយ វណ្ណៈ ហៅវែង ហៅឥណ្ឌា អាយុ ៤២ ឆ្នាំ, សុភ័ក្រ ហៅ យ៉ាន់ ហៅក្របីអាយុ ៣២ ឆ្នាំនិងផុន ដាទី ឯឈ្មោះ លឹម ទ្រីគេចខ្លួន។ ប៉ុន្តែក្រោយមកឈ្មោះនេះ ត្រូវសមត្ថកិច្ចចាប់ខ្លួនបាន នៅខេត្តបន្ទាយមានជ័យ ពាក់ព័ន្ធករណីប្លន់ទូរមាស។
សំណុំរឿងនេះ ត្រូវសាលាដំបូងរាជធានីភ្នំពេញបើកសវនាការនិងប្រកាសសាលក្រមនៅថ្ងៃទី៣ខែមេសាឆ្នាំ២០១២ដាក់គុកឈ្មោះ ឡាយ វណ្ណៈ, ឈ្មោះ ប៉ុល សុភ័ក្រ,ឈ្មោះ លឹម ទ្រីនិងឈ្មោះផុន ដាទីដាក់គុកម្នាក់១ជីវិត ចោទបទឃាតកម្មគិតទុកជាមុនតាមមាត្រា២០០នៃក្រមព្រហ្មទណ្ឌនិងបង្គាប់ឲ្យតាមចាប់ខ្លួនឈ្មោះ លឹម ទ្រី ខណៈក៏ត្រូវបានសាលាដំបូងរាជធានីភ្នំពេញផ្តន្ទាទោសកំបាំងមុខឲ្យជាប់គុក១ជីវិតដែរ៕
