ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាចំពោះមុខស្ត្រីជាប់ចោទម្នាក់ឲ្យជាប់គុក ២០ ឆ្នាំពាក់ព័ន្ធនឹងថ្នាំញៀន ៤៩១១,៤ ក្រាមប្រព្រឹត្តនៅភ្នំពេញក្នុងឆ្នាំ ២០១៣។
លោកសហចៅក្រម សាលី ធារ៉ា បានអានសាលដីកាថាកាលពីបើកសវនាការជនជាប់ចោទបានប្រាប់ថាខ្លួនពុំបានប្រព្រឹត្តដឹកជញ្ជូនគ្រឿងញៀនដូចការចោទទេ។
លោកថា៖ «ការលើកឡើងបែបនេះមិនត្រឹមត្រូវទេ ព្រោះតាមកំណត់ហេតុនគរបាលបង្ហាញថា ជនជាប់ចោទត្រូវបានចាប់ជាក់ស្តែង។ តុលាការយល់ថាបណ្តឹងសារទុក្ខរបស់ជនជាប់ចោទគ្មានមូលដ្ឋានឲ្យតុលាការពិចារណាបានទេ។ ដូច្នេះតុលាការកំពូលសម្រេចតម្កល់សាលដីកាសាលាឧទ្ធរណ៍ទុកជាបានការដដែល»។
តាមអង្គហេតុបង្ហាញថាស្ត្រីថៃឈ្មោះ WiLAWAN CHINPANG បានចេញពីប្រទេសខ្លួនទៅយកគ្រឿងញៀនពីឥណ្ឌា។
លុះមកវិញបាននាំគ្រឿងញៀនឆ្លងតាមប្រទេសម៉ាឡេស៊ីរួចបន្តមកកម្ពុជាតាមច្រកព្រលានយន្តហោះអន្តរជាតិភ្នំពេញកាលពីថ្ងៃ ២៩ កក្កដាឆ្នាំ ២០១៣។
អង្គហេតុបន្តថាពេលស្ត្រីថៃជាប់ចោទអូសវ៉ាលិសឆ្លងកាត់ប៉ុស្តិ៍ត្រួតពិនិត្យក្នុងព្រលានក៏ត្រូវសមត្ថកិច្ចឆែកឃើញកញ្ចប់ប្លាស្ទិក ១ ដុំលាក់នៅបាតវ៉ាលិសដែលជាគ្រឿងញៀនក៏ឃាត់ខ្លួនស្ត្រីនោះតែម្តង។
គ្រឿងញៀននោះត្រូវគេរុំស្កុត ៤ ដុំបង្កប់ហើយលទ្ធផលកោសល្យវិច័យបង្ហាញថាជាប្រភេទម្សៅមេតំហ្វេតាមីនមានទម្ងន់ ៤៩១១,៤ ក្រាម។ បន្ទាប់មកសមត្ថកិច្ចក៏បន្តស្រាវជ្រាវរកអ្នកទទួលរហូតឃាត់ខ្លួនបានស្ត្រីខ្មែរឈ្មោះ កែវ ដាវី អាយុ ៤៤ ឆ្នាំម្នាក់ទៀត។
គួររំឭកដែរថាកាលពីថ្ងៃជំនុំជម្រះស្ត្រី កែវ ដាវី ឆ្លើយក្នុងសវនាការថាគាត់បានស្គាល់បុរសស្បែកខ្មៅម្នាក់ឈ្មោះ អូចេ ហើយនៅថ្ងៃទី ២៩ កក្កដា ឆ្នាំ ២០១៣ ត្រូវបានបុរសនោះទូរស័ព្ទពឹងគាត់ឲ្យទៅយកខោអាវ ២ កំប្លេពីមិត្តស្រីគាត់ក្នុងផ្ទះសំណាក់ឡាក់គី ២ ដោយឲ្យកម្រៃ ២០០ ដុល្លារ។ លុះចូលដល់មាត់បន្ទប់ក៏ត្រូវសមត្ថកិច្ចចាប់ខ្លួន។
សំណុំរឿងនេះត្រូវសាលាដំបូងរាជធានីសម្រេចផ្តន្ទាទោសឈ្មោះ WiLAWAN CHINPANG អាយុ ២៩ ឆ្នាំដាក់គុក ៣០ ឆ្នាំ និងពិន័យប្រាក់ ៨០ លានរៀលស្ត្រីឈ្មោះ កែវ ដាវី ដាក់គុក ២០ ឆ្នាំពិន័យ ៥០ លានរៀលកាលពីថ្ងៃ ២៩ មេសាឆ្នាំ ២០១៤ ចោទពីបទ «ដឹកជញ្ជូនដោយខុសច្បាប់នូវសារធាតុញៀន» តាមបញ្ញត្តិមាត្រា ៤០ ច្បាប់ស្តីពីការត្រួតពិនិត្យគ្រឿងញៀន។
នៅថ្ងៃជម្រះនោះដែរលោក ឈួន ចាន់ ថាអគ្គព្រះរាជអាជ្ញារង និងជាតំណាងមហាអយ្យការសន្និដ្ឋានថា ស្ត្រីជាប់ចោទត្រូវបានសមត្ថកិច្ចចាប់ខ្លួនជាក់ស្តែងជាមួយគ្រឿងញៀន។ ដូច្នេះការចោទប្រកាន់របស់តុលាការថ្នាក់ក្រោមត្រឹមត្រូវតាមច្បាប់ ខ្ញុំសូមតម្កល់សាលដីកាដដែល។
មេធាវីចាត់តាំងការពារសិទ្ធិឲ្យស្ត្រីជាប់ចោទ លោក មេធាវី ឡោ គីមហ្គិច បានសន្និដ្ឋានថាកូនក្តីលោកត្រូវឈ្មោះ អូចេ ប្រើឲ្យទៅយកខោអាវនៅបន្ទប់ផ្ទះសំណាក់ពីស្ត្រីថៃឈ្មោះ WiLAWAN CHINPANG ព្រោះគេជាសង្សារបានឈ្លោះគ្នា។ ប៉ុន្តែពេលទៅដល់ក៏ត្រូវសមត្ថកិច្ចចាប់ខ្លួន។
លោកថ្លែងថាកូនក្តីលោកត្រូវបានគេឆបោក ហើយគាត់ក៏មិនទាន់បានកាន់វ៉ាលិសគ្រឿងញៀននោះដែរ។ ប៉ុន្តែបែរជាតុលាការចោទគាត់ថា ជាអ្នកដឹកជញ្ជូនគ្រឿងញៀនទៅវិញ។ សូមតុលាការដោះលែងគាត់វិញ ៕