ភ្នំពេញៈ ភ្លាមៗបន្ទាប់ពីជំនុំជម្រះកាលពីម្សិលមិញ តុលាការកំពូលបានសម្រេចតម្កល់ទោសស្ត្រីខ្មែរម្នាក់ដាក់គុក ២៥ ឆ្នាំដដែលពាក់ព័ន្ធនឹងការជួញគ្រឿងញៀនមេតំហ្វេតាមីន និងហេរ៉ូអ៊ីនជិត ២ គីឡូក្រាមប្រព្រឹត្តនៅភ្នំពេញ កាលពីឆ្នាំ ២០១៦។
លោកចៅក្រម ស៊ឹង បញ្ញាវុឌ្ឍ ប្រធានក្រុមប្រឹក្សាជំនុំជម្រះបានអានសាលដីកាចំពោះមុខស្ត្រីជាប់ចោទឈ្មោះ ហង្ស ជីងជីង ថា ក្រោយពីបានពិភាក្សាគ្នាមកក្រុមប្រឹក្សាជំនុំជម្រះយល់ថាស្ត្រីជាប់ចោទពេលជំនុំជម្រះបានទទួលស្គាល់កំហុស ហើយស្នើសុំតុលាការបន្ថយទោសដល់ខ្លួន។
លោកថ្លែងថា៖ «ប៉ុន្តែជនជាប់ចោទត្រូវបាននគរបាលចាប់ខ្លួនជាក់ស្តែងដូចដែលលោកតំណាងមហាអយ្យការលើកឡើងថា ដូចមានភ័ស្តុតាងក្នុងអង្គហេតុជាបទល្មើសជាក់ស្តែង។ ដូច្នេះក្រោយពីបានពិភាក្សាគ្នាក្រុមប្រឹក្សាសម្រេចតម្កល់ទោសជនជាប់ចោទ ២៥ ឆ្នាំតាមអំណាចសាលក្រម និងសាលដីកាតុលាការថ្នាក់ក្រោមដដែល និងបន្តឃុំខ្លួនជនជាប់ចោទ»។
តាមរបាយការណ៍នគរបាលថាកាលពីថ្ងៃទី ២៤ ខែមករា ឆ្នាំ ២០១៦ ស្ត្រីឈ្មោះ ហង្ស ជីងជីង អាយុ ២៥ ឆ្នាំត្រូវបានគេទូរស័ព្ទហៅឱ្យទៅយកកញ្ចប់តែនៅម្តុំស្តុបពេទ្យចិនដើម្បីយកទៅឲ្យជនជាតិចិនម្នាក់ឈ្មោះ Kang ChingChen ហៅ កាំង នៅកាស៊ីណូណាហ្គាវើល ហើយពេលទៅដល់កាស៊ីណូក៏ត្រូវសមត្ថកិច្ចចាប់ខ្លួនបាន ៣ នាក់ តែឈ្មោះ កាំង បានគេចខ្លួន។
ជនដែលសមត្ថកិច្ចចាប់ខ្លួនបាននោះ ឈ្មោះ លី យ៉ុនហ្វូ ហៅ ហេង សុខសាន្ត អាយុ ៤៦ ឆ្នាំ ទី ២ ឈ្មោះ Tai Chih Hsing អាយុ ៤៣ ឆ្នាំដែលទាំង ២ នាក់ជាជនជាតិចិន។ ចំណែកម្នាក់ទៀតឈ្មោះ ហង្ស ជីងជីង អាយុ ២៥ ឆ្នាំជាជនជាតិខ្មែរ។
បើតាមរបាយការណ៍ក្រោយចាប់ខ្លួនសមត្ថកិច្ចបានឆែកឆេរក្នុងថង់ដាក់តែនោះឃើញមានគ្រឿងញៀនប្រភេទមេតំហ្វេតាមីន (ម៉ាទឹកកក) និងហេរ៉ូអ៊ីន សរុប ១,៥ គីឡូក្រាម។
របាយការណ៍ដដែលថាស្ត្រី ឈ្មោះ ជីងជីង នៅមុនពេលសមត្ថកិច្ចចាប់ខ្លួននាងត្រូវបានបុរសឈ្មោះ កាំង ដេកជាមួយនាងហើយបានសន្យាឲ្យតម្លៃខ្លួននាង ២០០ ដុល្លារ។
សំណុំរឿងនេះត្រូវសាលាដំបូងរាជធានីភ្នំពេញប្រកាសសាលក្រមនៅថ្ងៃទី ១៦ កញ្ញាឆ្នាំ ២០១៦ ផ្តន្ទាទោសឈ្មោះ លី យ៉ុនហ្វូ ឲ្យជាប់គុក ៥ ឆ្នាំឈ្មោះ TaiChih Hsing ឱ្យរួចខ្លួន និងស្ត្រីខែ្មរឈ្មោះ ហង្ស ជីងជីង ឲ្យជាប់គុកម្នាក់ៗ ២៥ ឆ្នាំចោទបទដឹកជញ្ជូន ឬជួញដូរគ្រឿងញៀនខុសច្បាប់ និងកាត់ទោសកំបាំងមុខឈ្មោះ Kang Ching Chen ហៅកាំងឱ្យជាប់ទោស ១ ជីវិតរួចបង្គាប់ឱ្យសមត្ថកិច្ចតាមចាប់ខ្លួន។ ប៉ុន្តែករណីនេះមានតែស្ត្រីខ្មែរឈ្មោះ ហង្ស ជីងជីង ម្នាក់ដែលប្ដឹងឧទ្ធរណ៍ និងប្ដឹងសារទុក្ខ។
នៅក្នុងសវនាការពីម្សិលមិញ ស្ត្រីជាប់ចោទប្រាប់ចៅក្រមថា៖ «ខ្ញុំទទួលស្គាល់កំហុសហើយខ្ញុំសូមតុលាការបន្ថយទោសដល់ខ្ញុំ»។
ដោយសំអាងពីការចាប់ខ្លួនជាក់ស្ដែងលោកព្រះរាជអាជ្ញា ចាន់ តារារស្មី តំណាងមហាអយ្យការសន្និដ្ឋានបានសូមឱ្យតម្កល់សាលដីការបស់តុលាការថ្នាក់ក្រោមទុកជាបានការដដែល។
ដោយឡែកលោក ស៊ឹង វ៉ាន់នី មេធាវីការពារសិទ្ធិស្ត្រីជាប់ចោទសន្និដ្ឋានថា៖ «កូនក្តីខ្ញុំ ប្តឹងមកនេះបំណងសុំតុលាការបន្ថយទោសព្រោះគាត់ទទួលស្គាល់កំហុស។ សូមតុលាការពិចារណា»៕