.jpg)
ជនជាប់ចោទពេលនាំមកតុលាការកំពូលពីថ្ងៃ ២៨ ធ្នូ ឆ្នាំមុន។ រូបថត គឹម សារុំ
ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាតម្កល់ទោសអតីតមន្ត្រីយោធាម្នាក់ឱ្យជាប់ពន្ធនាគារ ៤ ឆ្នាំដដែល តាមសាលដីកាសាលាឧទ្ធរណ៍ បន្ទាប់ពីជំនុំជម្រះកាលពីថ្ងៃទី ២៨ ធ្នូ ពាក់ព័ន្ធបទចោទញុះញង់មិនឱ្យយោធិនស្តាប់បង្គាប់ប្រព្រឹត្តនៅខេត្តសៀមរាបកាលពីខែមីនា ឆ្នាំ ២០១៩។
នៅក្នុងបន្ទប់សវនាការរបស់តុលាការកំពូលពីម្សិលមិញ ខណៈអវត្តមានជនជាប់ចោទ តែចាត់ទុកជាចំពោះមុខ ដោយសារមានមេធាវីការពារសិទ្ធិឱ្យជនជាប់ចោទចូលស្តាប់ដែរនោះ លោកស្រីចៅក្រម គិម សត្ថាវី បានប្រកាសសាលដីកាថា សំណុំរឿងនេះមានជនជាប់ចោទឈ្មោះ លី ដាវិត ពាក់ព័ន្ធនឹងបទចោទញុះញង់កុំឱ្យយោធិនស្តាប់បង្គាប់ កាន់កាប់ ឬដឹកជញ្ជូនអាវុធដោយគ្មានការអនុញ្ញាត និងញុះញង់ឱ្យប្រព្រឹត្តបទឧក្រិដ្ឋជាអាទិ៍។
ក៏ប៉ុន្តែលោកស្រីចៅក្រមមិនបានលើកបង្ហាញពីមូលហេតុនៃការតម្កល់សាលដីកានេះទេដោយគ្រាន់តែថ្លែងថា សេចក្តីសម្រេចរបស់តុលាការកំពូលនេះគឺបន្ទាប់ពីជំនុំជម្រះកាលពីថ្ងៃទី ២៨ ធ្នូកន្លងមក។
លោកស្រីចៅក្រមបានបញ្ជាក់ថា៖ «តុលាការកំពូលចាត់ទុកថា ការដែលសាលាឧទ្ធរណ៍សម្រេចតម្កល់សាលក្រមរបស់សាលាដំបូងខេត្តសៀមរាបនេះគឺជាការត្រឹមត្រូវតាមច្បាប់ហើយ។ ដូច្នេះតុលាការសម្រេចតម្កល់សាលដីកាឧទ្ធរណ៍ទុកជាបានការដដែល»។
ដោយឡែកលោក នូ ចន្ថា ដែលជាមេធាវីចាត់តាំងពីគណៈមេធាវីឱ្យការពារក្ដីជនជាប់ចោទកាលពីម្សិលមិញពុំបានបកស្រាយអ្វីលម្អិតពីរឿងនេះទេ ដោយគ្រាន់តែលើកឡើងថា ការសម្រេចសាលដីការបស់តុលាការកំពូលគឺជាឆន្ទានុសិទ្ធិរបស់តុលាការទេ។
កាលពីសវនាការនៅតុលាការកំពូលជនជាប់ចោទឈ្មោះ លី ដាវិត អាយុ ៤៦ ឆ្នាំ បានប្រាប់ចៅក្រមថា ខ្លួនមានតួនាទីជានាយរងសេនាធិការភូមិភាគ និងកម្លាំងអន្តរាគមន៍មានឋានន្តរស័ក្តិជាឧត្តមសេនីយ៍ទោដែលបានរៀនចប់ថ្នាក់អនុបណ្ឌិត។ កាលពីខែសីហា ឆ្នាំ ២០១៨ គាត់បានសរសេរសារបង្ហោះលើហ្វេសប៊ុករិះគន់អំពីការកាប់បំផ្លាញព្រៃឈើ ការលុបបឹង។
ជនជាប់ចោទបញ្ជាក់ប្រាប់ចៅក្រមថា៖ «ប៉ុន្តែការរិះគន់របស់ខ្ញុំនេះគ្រាន់តែរិះគន់ដើម្បីស្ថាបនាតែប៉ុណ្ណោះ។ ខ្ញុំមិនដែលមានគំនិតប្រឆាំងនឹងរាជរដ្ឋាភិបាលកម្ពុជាម្តងណាទេហើយបើខ្ញុំមានគំនិតប្រឆាំងក៏ខ្ញុំមិនបានកាន់តំណែងជាឧត្តមសេនីយ៍ទោដែរ»។
ក៏ប៉ុន្តែជនជាប់ចោទប្រាប់ចៅក្រមនាពេលនោះថា ក្រោយពីគាត់ដឹងថាតុលាការចេញដីកាចាប់ខ្លួនគឺគាត់បានគេចខ្លួនជាង ៧ ខែ តែក្រោយមកបានចូលខ្លួនឱ្យសមត្ថកិច្ចអាវុធហត្ថខេត្តសៀមរាបចាប់ខ្លួនប្រគល់ឱ្យសាលាដំបូងខេត្តនៅថ្ងៃទី ២៨ មីនា ឆ្នាំ ២០១៩។
បើតាមកំណត់ហេតុរបស់តុលាការកំពូលបង្ហាញថា ជនជាប់ចោទរូបនេះត្រូវបានសាលាដំបូងខេត្តសៀមរាបប្រកាសសាលក្រមនៅថ្ងៃទី ៣១ កក្កដា ឆ្នាំ ២០១៩ ផ្តនា្ទទោសដាក់ពន្ធនាគារ ៤ ឆ្នាំ ដោយចោទពីបទញុះញង់កុំឱ្យយោធិនស្តាប់បង្គាប់ កាន់កាប់ ឬដឹកជញ្ជូនអាវុធដោយគ្មានការអនុញ្ញាត និងញុះញង់ឱ្យប្រព្រឹត្តបទឧក្រិដ្ឋជាអាទិ៍តាមបញ្ញត្តិមាត្រា ៤៧១,៤៩០,៤៩៤ និង ៤៩៥ នៃក្រមព្រហ្មទណ្ឌ។
ដោយមិនសុខចិត្តនឹងសាលក្រមនេះជនជាប់ចោទបានប្តឹងទាស់ទៅសាលាឧទ្ធរណ៍តែត្រូវឧទ្ធរណ៍ប្រកាសសាលដីកានៅថ្ងៃទី ៦ មីនា ឆ្នាំ ២០២០ ដោយសម្រេចតម្កល់សាលក្រមរបស់សាលាដំបូងខេត្តសៀមរាបនៅដដែល ទើបមានការបន្តប្ដឹងមកតុលាការកំពូល៕
