ភ្នំពេញៈ តុលាការកំពូលនឹងប្រកាសសាលដីកាបណ្តឹងសុំនៅក្រៅឃុំរបស់សកម្មជនអតីតគណបក្សសង្គ្រោះជាតិចំនួន ១០ នាក់ នៅថ្ងៃទី ១៤ ខែសីហា បន្ទាប់ពីជំនុំជម្រះកាលពីថ្ងៃទី ៧ សីហា ពាក់ព័ន្ធបទចោទរួមគំនិតក្បត់ញុះញង់ឲ្យប្រព្រឹត្តអំពើបង្កឧ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឲ្យយោធិនស្តាប់បង្គាប់។ នេះបើតាមមេធាវីជនជាប់ចោទ។
ការជំនុំជម្រះរបស់តុលាការកំពូលនេះធ្វើឡើងបន្ទាប់ពីសាលាឧទ្ធរណ៍ បដិសេធមិនឲ្យនៅក្រៅឃុំរបស់ជនជាប់ចោទទាំង ១០ នាក់។
លោក ឡោ ជុនធី មេធាវីការពារសិទ្ធិឲ្យជនជាប់ចោទទាំង ១០ នាក់ បានប្រាប់ភ្នំពេញប៉ុស្តិ៍ពីម្សិលមិញថាកូនក្តីរបស់លោកទាំង ១០ នាក់រួមមាន ទី១- ឈ្មោះ សុខ ចាន់ថា ទី២- ញ៉ែម វា ទី៣- ជុំ ចាន់ ទី៤- ឃឹម ភាណា ទី៥- ឃុត ច្រឹក ទី៦- ងិន ឃាង ទី៧- ឡុង ផារី ទី៨- កែវ ថៃ ទី៩- ថៃ គន្ធា និង ទី១០- ឈ្មោះ យឹម សារ៉េត។ ពួកគាត់ជាអតីតចៅសង្កាត់ជាគ្រូបង្រៀន និងជាអតីតជំទប់ឃុំ។
លោកបញ្ជាក់ថាសវនាការកាលពីថ្ងៃទី ៧ ខែសីហាមានលោក និល ណុន ជាប្រធានក្រុមប្រឹក្សាជំនុំជម្រះ។ ក្នុងពេលជំនុំជម្រះកូនក្តីរបស់លោកទាំង ១០ នាក់បានទទូចដូចៗគ្នា សុំចៅក្រមថាគោលបំណងរបស់ពួកគេ ប្តឹងសារទុក្ខមកតុលាការកំពូលពេលនេះគឺស្នើសុំតុលាការនៅក្រៅឃុំបណ្តោះអាសន្ន។ ពួកគាត់ប្រាប់តុលាការថា ពួកគាត់មានជំងឺប្រចាំកាយ និងមានលំនៅពិតប្រាកដដោយមិនរត់ទៅណាទេ។
លោកបន្តថា ចំពោះលោកជាមេធាវីវិញបានលើកឡើងតាមរយៈសេចក្តីសន្និដ្ឋានប្រាប់តុលាការក្នុងអង្គសវនាការកាលពីថ្ងៃជំនុំជម្រះនោះដែរថា លោកស្នើសុំដល់តុលាការកំពូល មេត្តាពិចារណាឲ្យកូនក្តីរបស់លោកបាននៅក្រៅឃុំបណ្តោះអាសន្ន។
លោកប្រាប់ចៅក្រមថា ការស្នើសុំនៅក្រៅឃុំនេះ គឺទី១ កូនក្តីរបស់លោក សុទ្ធតែមានលំនៅក្នុងប្រទេសពិតប្រាកដ និងមានក្រុមគ្រួសារដែលមានជីវភាពក្រីក្រ។ ទី២- គឺពួកគាត់រស់នៅក្នុងពន្ធនាគារបច្ចុប្បន្នមានជំងឺប្រចាំកាយដូចជាជំងឺទឹកនោមផ្អែម ជំងឺលើសជាតិអាស៊ីត និងជំងឺក្រពះ។
លោកឲ្យដឹងទៀតថា៖ «ខ្ញុំបានធ្វើសេចក្តីសន្និដ្ឋានប្រាប់ចៅក្រមថា សម័យកូវីដនេះបានជះឥទ្ធិពលសេដ្ឋកិច្ចទាំងមូលដល់រដ្ឋាភិបាល ម្យ៉ាងរដ្ឋាភិបាលឃុំពួកគាត់ត្រូវចាយលុយរដ្ឋ។ ដូច្នេះសូមតុលាការពិចារណាដោះលែងពួកគាត់»។
លោក ឡោ ជុនធី ថ្លែងបញ្ជាក់ប្រាប់ចៅក្រមក្នុងសវនាការទៀតថា៖ «សម័យកូវីដនេះនៅប្រទេសណាក៏គេបិទមិនឲ្យចេញចូលដែរ។ ដូច្នេះបើកូនក្តីខ្ញុំចង់គេចទៅក្រៅប្រទេសក៏ទៅមិនរួចដែរ»។
លោកលើកឡើងថា សមត្ថកិច្ចនគរបាលមានសមត្ថភាពខ្ពស់តាមរយៈប្រព័ន្ធបច្ចេកវិទ្យាតាមរយៈសមត្ថភាពស៊ើបអង្កេត និងតាមរយៈសមត្ថភាពផ្សេងៗទៀត។ «អ៊ីចឹងពួកគាត់មិនអាចគេចទៅណារួចទេ បើគេចទៅណាសមត្ថកិច្ចនឹងរកឃើញភ្លាមៗ គឺអនុវត្តតាមរយៈបច្ចេកវិទ្យាប្រើពេលតែ ១ ម៉ោងទេ រកឃើញហើយ»។ លោកថ្លែងថា៖ «ខ្ញុំសន្និដ្ឋានបែបនេះដើម្បីឲ្យតុលាការកំពូលលោកពិចារណា តែការសម្រេចបែបម៉េចជាសមត្ថកិច្ចរបស់តុលាការ»។
លោកមេធាវី ឡោ ជុនធី រំឭកថាសំណុំរឿងរបស់ក្រុមកូនក្តីលោកកើតឡើងក្នុងអំឡុងឆ្នាំ ២០១៧-២០១៨ តែនគរបាលទើបឃាត់ខ្លួនក្នុងអំឡុងខែមីនា និងខែមេសា ឆ្នាំ ២០២០ នៅតាមរាជធានីខេត្ត។ ហេតុដូច្នេះតុលាការកំពូល គួរតែពិចារណាលើចំណុចនេះដែរ។ បើតាមលោកមេធាវីសំណុំរឿងកូនក្តីរបស់លោកបច្ចុប្បន្ននេះ សាលាដំបូងរាជធានីភ្នំពេញកំពុងដំណើរការស៊ើបអង្កេតនៅឡើយ។
លោក ជុំ សំបាន អ្នកនាំពាក្យតុលាការកំពូលមិនអាចទាក់ទងសុំអត្ថាធិប្បាយលើបញ្ហានេះបានទេកាលពីម្សិលមិញ៕