ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាបង្វិលសំណុំរឿងរបស់ជនជាប់ចោទម្នាក់ទៅឲ្យឧទ្ធរណ៍ជម្រះឡើងវិញបន្ទាប់ពីជំនុំជម្រះកាលពីថ្ងៃទី ២ កញ្ញាពាក់ព័ន្ធករណីឃាតកម្មលើយុវជនម្នាក់ដោយអារកច្រកបាវ ប្រព្រឹត្តនៅភូមិទ្រៀក ឃុំមេមង ស្រុកមេមត់ ខេត្តកំពង់ចាមក្នុងឆ្នាំ ២០១៥ ដោយសារ ឧទ្ធរណ៍បន្ថយទោសពីជាប់ពន្ធនាគារ ១ ជីវិតមកត្រឹម ៣០ ឆ្នាំ។
នៅចំពោះមុខម្តាយជនរងគ្រោះ តែកំបាំងមុខជនជាប់ចោទ និងមេធាវីការពារសិទ្ធិឲ្យជនជាប់ចោទនោះលោក ចៅក្រម ច័ន្ទ រង្សី បានអានសាលដីកាថា សំណុំរឿងនេះមានជនជាប់ចោទឈ្មោះ ហេង សុខមាន ភេទប្រុស អាយុ ២២ ឆ្នាំ រីឯជនរងគ្រោះឈ្មោះ លី រ៉ាវុធ អាយុ ២០ ឆ្នាំ។ ពួកគេរស់នៅ ភូមិ-ឃុំ-ស្រុក ខាងលើ។
លោកថា បន្ទាប់ពីបានពិភាក្សាគ្នា ក្រោយពេលជំនុំជម្រះកាលពីថ្ងៃទី ២ កញ្ញា និងក្រោយពីបានស្តាប់ការឆ្លើយរបស់ជនជាប់ចោទមក តុលាការកំពូលយល់ថា កាលពីថ្ងៃជំនុំជម្រះនោះ ជនជាប់ចោទបានស្នើសុំទទួលយកទណ្ឌកម្មទោស ៣០ ឆ្នាំនេះហើយក៏មិនបានប្តឹងទាស់ដែរ។ ប៉ុន្តែនេះជាបណ្តឹងរបស់លោកអគ្គព្រះរាជអាជ្ញាសាលាឧទ្ធរណ៍។
លោកចៅក្រម រង្សី ថ្លែងថា៖ «ពាក់ព័ន្ធនឹងរឿងនេះ តុលាការកំពូលសម្រេចបង្វិលសំណុំរឿងនេះទៅសាលាឧទ្ធរណ៍ជំនុំជម្រះជាថ្មីឡើងវិញ»។
ដោយឡែកអ្នកស្រី កែវ ម៉ានី ដែលត្រូវជាម្ដាយជនរងគ្រោះបានប្រាប់នៅក្រៅបន្ទប់ប្រកាសសាលដីកាថា សំណុំរឿងនេះកាលពីនៅសាលាដំបូងខេត្តកំពង់ចាមក្នុងបណ្តឹងគឺក្នុងនាមអ្នកស្រីជាម្ដាយជនរងគ្រោះបានទាមទារសំណងជំងឺចិត្ត ២ ម៉ឺនដុល្លារ។ បន្ទាប់មកសាលាដំបូងខេត្តកំពង់ចាមក៏បានសម្រេចតាមការទាមទារនោះ ហើយបានផ្តន្ទាទោសជនជាប់ចោទអស់ ១ ជីវិត។
អ្នកស្រីបានបន្តថា ការសម្រេចផ្តន្ទាទោស ១ ជីវិតនាពេលនោះគឺអ្នកស្រីគិតថា សមនឹងអំពើរបស់ជនជាប់ចោទហើយ ព្រោះគេបានសម្លាប់កូនប្រុសអ្នកស្រីដោយលក្ខណៈឃោរឃៅណាស់។
អ្នកស្រី ម៉ានី បញ្ជាក់ថា៖ «ខ្ញុំគិតថាពេលនេះកូនខ្ញុំស្លាប់ទៅហើយ ហើយខ្ញុំក៏អហោសិកម្មទៅឲ្យជនជាប់ចោទដែរ។ ព្រោះគ្នាសុំតុលាការ ៣០ ឆ្នាំ ដើម្បីឲ្យជីវិតគ្នាចេញពីពន្ធនាគារមកវិញមានន័យខ្លះ»។
កាលពីថ្ងៃជំនុំជម្រះ ជនជាប់ចោទបានប្រាប់តុលាការកំពូលថា គាត់បានស្គាល់ជនរងគ្រោះប្រហែលជា ១ ថ្ងៃមុនសម្លាប់។ បន្ទាប់ពីស្គាល់គ្នាហើយ ខ្លួនបានបបួលជនរងគ្រោះទៅក្នុងផ្ទះឈើមួយដែលគ្មានមនុស្សរស់នៅតែមានគ្នីគ្នា ៣ នាក់ទៀតចាំនៅទីនោះ។ បន្ទាប់ពីគាត់ហៅជនរងគ្រោះចូលក្នុងផ្ទះនោះហើយក៏នាំគ្នាជក់គ្រឿងញៀន ហើយខ្លួនបានបបួលជនរងគ្រោះជក់គ្រឿងញៀនដែរតែគេប្រកែក។
ជនជាប់ចោទបន្តថា ដោយសារជនរងគ្រោះប្រកែករូបគេក៏បានយកដំបងវ៉ៃក្បាលជនរងគ្រោះបែកបណ្ដាលឲ្យសន្លប់ហើយក៏ចាក់ និងអារកសម្លាប់តែម្តង។ បន្ទាប់មករូបគេបានយកម៉ូតូរបស់ជនរងគ្រោះ ១ គ្រឿងម៉ាក ឌ្រីមសង់ ១២៥ ទៅលក់បានលុយជិត ១ ពាន់ដុល្លារ និងចែកគ្នាចាយអស់រួចរត់គេចខ្លួន។ លុះប៉ុន្មានខែក្រោយមកក៏ត្រូវសមត្ថកិច្ចចាប់បានតែរឿងនេះ គេសម្លាប់ជនរងគ្រោះតែម្នាក់ឯងទេ។
សំណុំរឿងនេះត្រូវសាលាដំបូងខេត្តកំពង់ចាមផ្តន្ទាទោសដាក់ពន្ធនាគារ ១ ជីវិតកាលពីខែកុម្ភៈ ឆ្នាំ ២០១៦ ដោយចោទពីបទឃាតកម្មគិតទុកជាមុន។
ប៉ុន្តែដោយមិនសុខចិត្ត ជនជាប់ចោទបានប្តឹងឧទ្ធរណ៍ហើយត្រូវសាលាឧទ្ធរណ៍បន្ថយទោសមកត្រឹម ៣០ ឆ្នាំតែត្រូវអគ្គព្រះរាជអាជ្ញាសាលាឧទ្ធរណ៍ប្តឹងសារទុក្ខនឹងទណ្ឌកម្មទោស ៣០ ឆ្នាំនេះ។
តាមអង្គហេតុរបស់តុលាការកាលពីថ្ងៃទី ២៨ ខែសីហា ឆ្នាំ ២០១៥ ពលរដ្ឋនៅក្នុងភូមិទ្រៀកក្នុងឃុំខាងលើ បានប្រទះឃើញការុងនីឡុង ១ ហើយបានទៅមើលក៏ឃើញសាកសពមានសភាពត្រូវគេអារក និងមានស្នាមចាក់ត្រង់ពោះជាច្រើនកាំបិត៕