.jpg)
ភ្នំពេញៈ តុលាការកំពូលកាលពីម្សិលមិញ បានបង្វិលសំណុំរឿងជួញគ្រឿងញៀនមេតំហ្វេតាមីន ២៤ កញ្ចប់តូចមកឲ្យឧទ្ធរណ៍ជម្រះឡើងវិញបន្ទាប់ពីជំនុំជម្រះកាលពីថ្ងៃទី ២១ មករា ជាអ្វីដែលមេធាវីការពារជនជាប់ចោទថាជារឿងល្អខណៈឯកសារដាក់បន្ទុកមកផ្តន្ទាទោសដាក់ពន្ធនាគារ ៥ ឆ្នាំមិនស៊ីចង្វាក់គ្នា។
លោកចៅក្រម សាលី ធារ៉ា បានអានសាលក្រមដីកានៅចំពោះមុខមេធាវីការពារជនជាប់ចោទថា សំណុំរឿងដែលមានជនជាប់ចោទឈ្មោះ ម៉េង រតនៈ និងបក្ខពួក ៥ នាក់ទៀតពាក់ព័ន្ធនឹងករណីជួញគ្រឿងញៀននោះ ក្រោយពីជំនុំជម្រះតុលាការយល់ឃើញថា ករណីជនជាប់ចោទ ឈ្មោះ ម៉េង រតនៈ អាយុ ៣៣ ឆ្នាំ ដែលត្រូវតុលាការថ្នាក់ក្រោមផ្តន្ទាទោសដាក់ពន្ធនាគារ ៥ ឆ្នាំ តាមបញ្ញត្តិមាត្រា ៤០ និងមាត្រា ៤៤ ច្បាប់ស្តីពីការត្រួតពិនិត្យគ្រឿងញៀន នោះត្រូវបង្វិលមកឲ្យសាលាឧទ្ធរណ៍បើកសវនាការជំនុំជម្រះឡើងវិញ។
លោកថ្លែងថា៖ «តាមសាក្សីម្នាក់ថា ជនជាប់ចោទឈ្មោះ ម៉េង រតនៈ ជួលបន្ទប់ហើយរកស៊ីគ្រឿងញៀន។ រីឯអត្តសញ្ញាណប័ណ្ណរបស់ជនជាប់ចោទប៉ូលិសមិនបានរកឃើញនៅក្នុងបន្ទប់របស់ជនជាប់ចោទទេ ពេលប្រតិបត្តិការនោះ។ ដោយសំអាងហេតុបែបនេះហើយតុលាការកំពូលសម្រេចបង្វិលសំណុំរឿងនេះទៅសាលាឧទ្ធរណ៍ឲ្យជំនុំជម្រះឡើងវិញ ហើយបដិសេធសាលដីការបស់សាលាឧទ្ធរណ៍ចោល»។
ជុំវិញការសម្រេចនេះ លោក ជូង ជូងី ដែលជាមេធាវីការពារសិទ្ធិឲ្យជនជាប់ចោទបានប្រាប់ភ្នំពេញប៉ុស្តិ៍តាមទូរស័ព្ទថា នេះគឺជាការកាត់ក្តីត្រឹមត្រូវមួយដែលតុលាការកំពូលបង្វិលសំណុំរឿងរបស់កូនក្តីលោកទៅសាលាឧទ្ធរណ៍ដើម្បីជំនុំជម្រះឡើងវិញនេះ ។
លោកថ្លែងថា៖ «តុលាការកំពូលកាត់ក្តីនេះល្អណាស់គឺតុលាការបានផ្តល់យុត្តិធម៌ដល់កូនក្តីខ្ញុំដែលរឿងនេះនៅសាលាឧទ្ធរណ៍មិនបានពិចារណាទៅលើភ័ស្តុតាងដោះបន្ទុកឲ្យកូនក្តីខ្ញុំទេ តែនៅតុលាការកំពូល លោកចៅក្រម បានពិចារណាពីភ័ស្តុតាងដោះបន្ទុករបស់កូនក្តីខ្ញុំ»។
កាលពីថ្ងៃជំនុំជម្រះ នៅតុលាការកំពូល លោក ជូង ជូងី បានសន្និដ្ឋានថា នគរបាលប្រឆាំងគ្រឿងញៀនរាជធានីភ្នំពេញម្នាក់បានប្រើឯកសារអត្តសញ្ញាណប័ណ្ណរបស់កូនក្ដីលោកដែលបាត់មុនពេលបង្ក្រាបមកធ្វើជាភ័ស្ដុតាងឲ្យតុលាការសម្រេចកំបាំងមុខឃុំខ្លួនកូនក្តីលោក ៥ ឆ្នាំ។ ប៉ុន្តែលោក អ៊ីវ ភារិទ្ធ នាយការិយាល័យគ្រឿងញៀនរាជធានីភ្នំពេញដែលរងការចោទប្រកាន់បានច្រានចោលនិងថា ការចាប់ខ្លួនរបស់សមត្ថកិច្ចផ្អែកលើភ័ស្ដុតាងច្បាស់លាស់។
តាមកំណត់ហេតុតុលាការបង្ហាញថា កាលពីថ្ងៃទី ១៤ ខែមិថុនា ឆ្នាំ ២០១៥ នៅចំណុចបន្ទប់ជួលផ្លូវស្ពានឈើសង្កាត់ទឹកថ្លា ខណ្ឌសែនសុខ រាជធានីភ្នំពេញ សមត្ថកិច្ចនៃការិយាល័យប្រឆាំងគ្រឿងញៀននៃស្នងការដ្ឋានរាជធានីភ្នំពេញបានចុះបង្ក្រាបករណីជួញដូរគ្រឿងញៀនហើយបានឃាត់ខ្លួនមនុស្ស ៥ នាក់ ប៉ុន្តែក្នុងនោះគ្មានជនជាប់ចោទឈ្មោះ ម៉េង រតនៈ ទេ។ ប៉ុន្តែនៅក្នុងសំណុំរឿងបញ្ជូនទៅតុលាការ សមត្ថកិច្ចបានភ្ជាប់អត្តសញ្ញាណប័ណ្ណថតចម្លងរបស់ឈ្មោះ ម៉េង រតនៈ ដែលលោកមេធាវី ជូង ជូងី ថា មិនដឹងសមត្ថកិច្ចបានមកពីណា ខណៈអត្តសញ្ញាណប័ណ្ណច្បាប់ដើមបានបាត់ ហើយកូនក្ដីលោកបានប្ដឹងទៅសមត្ថកិច្ចស្រុកខ្សាច់កណ្ដាល ខេត្តកណ្ដាល តាំងពីមុនថ្ងៃបង្ក្រាបនោះ។
យ៉ាងណាក្ដី សំណុំរឿងនេះ ត្រូវសាលាដំបូងរាជធានីភ្នំពេញបើកសវនាការ និងប្រកាសសាលក្រមនៅថ្ងៃទី ១៣ ខែមិថុនា ឆ្នាំ ២០១៦ ដោយបានសម្រេចផ្តន្ទាទោសឈ្មោះ ម៉េង រតនៈ ដាក់ពន្ធនាគារ ៥ ឆ្នាំ និងពិន័យប្រាក់ ១០ លានរៀលចោទពីបទជួញដូរ និងសម្រួលឲ្យប្រើប្រាស់គ្រឿងញៀនដោយខុសច្បាប់តាមមាត្រា ៤០ និងមាត្រា ៤៤ នៃច្បាប់ស្តីពីការត្រួតពិនិត្យគ្រឿងញៀន។ ចំណែកមនុស្ស ៥ នាក់ទៀតត្រូវតុលាការចោទពីបទសម្រួលឲ្យប្រើប្រាស់គ្រឿងញៀនដែលផ្តន្ទាទោសម្នាក់ៗក្រោម ៤ ឆ្នាំ៕
