.jpg)
ជនជាប់ចោទ ហ៊ិន ចាន់ ពេលនាំមកតុលាការកំពូលកាលពីព្រឹកមិញ ។ រូបថតៈ គឹម សារុំ
ភ្នំពេញៈ តុលាការកំពូលនៅថ្ងៃទី ២ ខែឧសភានេះ បានលើកពេលជំនុំជម្រះលើជនជាប់ចោទម្នាក់ដោយសារគ្មានមេធាវីការពារ ក្នុងសំណុំរឿងរួមគំនិតក្បត់ជាតិរបស់រណៈសិរ្សរំដោះជាតិខ្មែរដែលមានលោក សម សេរី ជាមេចលនាដែលទើបត្រូវបានថៃចាប់ខ្លួនថ្មីៗនេះ។
សវនាការនេះ មានលោកចៅក្រម ស៊ឹង បញ្ញាវុឌ្ឍ ជាប្រធានក្រុមប្រឹក្សាជំនុំជម្រះនិងមានសហចៅក្រម៤រូប រីឯជនជាប់ចោទឈ្មោះ ហ៊ិន ចាន់ អាយុ៣៧ឆ្នាំ។ប៉ុន្តែបុរសរូបនេះគ្មានមេធាវីការពារទេ។
លោក ស៊ឹង បញ្ញាវុឌ្ឍ បានថ្លែងថា៖ «រឿងនេះតុលាការកំពូលមិនអាចលើកមកជំនុំជម្រះបានទេព្រោះតាមនីតិវិធីច្បាប់តម្រូវឲ្យជនជាប់ចោទមានមេធាវី។ដូច្នេះត្រូវលើកទៅជំនុំជម្រះនៅពេលក្រោយវិញ »។
តាមអង្គហេតុបង្ហាញថា កាលពីថ្ងៃទី១២ ខែឧសភា ឆ្នាំ២០១៤ ជនជាប់ចោទឈ្មោះ ហ៊ិន ចាន់ បានធ្វើដំណើរពីប្រទេសថៃមករាជធានីភ្នំពេញ។ប៉ុន្តែពេលជិះរថយន្តក្រុងដល់រាជធានីភ្នំពេញត្រូវសមត្ថកិច្ចចាប់ខ្លួននៅក្នុងចំណតរថយន្តឈ្នួលជ្រោយចង្វារខណ្ឌឫស្សីកែវនៅថ្ងៃដដែលនិងបានដកហូតសៀវភៅឯកសារពាក់ព័ន្ធនឹងចលនានេះជិត២៦០ក្បាលនិងលិខិតឆ្លងដែនខ្មែរក្លែងក្លាយ មួយក្បាលផងដែរ។
អង្គហេតុបង្ហាញទៀតថា ក្នុងសំណុំរឿងនេះសមត្ថកិច្ចបានស្រាវជ្រាវនិងចាប់ខ្លួនសមាជិកនៃរណសិរ្ស២៣នាក់។ក្នុងនោះមានជនជាប់ចោទម្នាក់បានស្លាប់ក្នុងពន្ធនាគារនិងម្នាក់ទៀតត្រូវដោះលែង។
សំណុំរឿងនេះត្រូវបានសាលាដំបូងរាជធានីភ្នំពេញ ផ្តន្ទាទោសឈ្មោះ ហ៊ិន ចាន់ ដាក់គុក៧ឆ្នាំ ចោទបទ«រួមគំនិតក្បត់ជាតិនិងក្លែងឯកសារសាធារណៈ» កាលពីថ្ងៃទី៤ ខែមិថុនា ឆ្នាំ ២០១៥។ រីឯជនជាប់ចោទ២០នាក់ទៀតត្រូវផ្តន្ទាទោសចន្លោះពី៥ឆ្នាំទៅ៩ឆ្នាំ ខណៈលោក សម សេរី ដែលជាមេចលនាត្រូវផ្តន្ទាទោសកំបាំងមុខដាក់គុក៩ឆ្នាំ។
កាលពីជំនុំជម្រះ នៅតុលាការថ្នាក់ក្រោម ឈ្មោះ ហ៊ិន ចាន់ បានឆ្លើយថា ខ្លួនបានចូលជាសមាជិកចលនានេះ តាំងពីមិនទាន់ផ្លូវការនៅក្នុងឆ្នាំ ២០១២ មកម្ល៉េះ។ កាលពីថ្ងៃទី ១២ ខែឧសភា ឆ្នាំ២០១៤ ខ្លួនបាននាំយកសៀវភៅ រណសិរ្សរំដោះជាតិខ្មែរ ជិត ២៦០ ក្បាល (សៀវភៅកូន ៧ មករា» ខាងលើពីប្រទេសថៃមកភ្នំពេញដោយធ្វើដំណើរឆ្លងកាត់តាមច្រកជាំសាង៉ាំក្នុងខេត្តឧត្តរមានជ័យ។
ហ៊ិន ចាន់ បានបញ្ជាក់ថា គោលបំណងការយកសៀវភៅមកកម្ពុជានេះ គឺដើម្បីចែកចាយឲ្យពលរដ្ឋបានយល់ដឹងអំពីគោលនយោបាយ និងកម្មវិធីសំខាន់ៗរបស់រណសិរ្សរំដោះជាតិខ្មែរ។ ក៏ប៉ុន្តែ មិនទាន់បានចែកចាយផង ខ្លួនក៏ត្រូវបានសមត្ថកិច្ចចាប់តែម្តង ខណៈកំពុងជិះតាក់ស៊ីមកដល់រាជធានីភ្នំពេញ ៕
