.jpg)
លោក ចៅ វាសនា ពេលនាំមកតុលាការកំពូលកាលពីពេលកន្លងមក។ ភ្នំពេញ ប៉ុសិ៍្ត
ភ្នំពេញៈ ភ្លាមៗបន្ទាប់ពីជំនុំជម្រះចប់កាលពីម្សិលមិញតុលាការកំពូលបានសម្រេចមិនអនុញ្ញាតឲ្យអតីតចៅសង្កាត់រងទី១ ម្នាក់ មកពីអតីតបក្សសង្គ្រោះជាតិបាននៅក្រៅឃុំឡើយពាក់ព័ន្ធនឹងសំណុំរឿងបំផ្លាញស្នាក់ការគយនៅក្រុងប៉ោយប៉ែត ខេត្តបន្ទាយមានជ័យក្នុងជម្លោះរវាងកម្មករអូសរទេះនិងមន្ត្រីគយ ពីឆ្នាំ ២០១៥ ខណៈបណ្តឹងលើអង្គសេចក្តីនៃរឿងនេះក៏កំពុងនៅក្នុងនីតិវិធីតុលាការកំពូលដែរនោះ។
លោកចៅក្រម ស៊ឹង បញ្ញាវុឌ្ឍ ប្រធានក្រុមប្រឹក្សាជំនុំជម្រះបានអានសាលដីកានៅចំពោះមុខជនជាប់ចោទក្នុងបន្ទប់សវនាការថា ក្រោយពីជំនុំជម្រះ និងបន្ទាប់ពីបានស្តាប់ការឆ្លើយបំភ្លឺរបស់ជនជាប់ចោទ និងស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទមក ក្រុមប្រឹក្សាជំនុំជម្រះ សម្រេចបដិសេធបណ្តឹងសុំនៅក្រៅឃុំរបស់ជនជាប់ចោទឈ្មោះ ចៅ វាសនា ហៅវែង អាយុ ៥៥ ឆ្នាំ និងតម្កល់សាលដីការបស់សាលាឧទ្ធរណ៍ទុកជាបានការដដែល។
លោកថ្លែងថា៖ «ការសម្រេចសេចក្តីរបស់តុលាការកំពូលពេលនេះដោយសំអាងថា សំណុំរឿងក្នុងអង្គសេចក្តីរបស់ជនជាប់ចោទ កំពុងដំណើរការនៅតុលាការកំពូល ហើយការមិនឲ្យនៅក្រៅឃុំ គឺដើម្បីរក្សាជនជាប់ចោទក្នុងដំណើរការនីតិវិធីរបស់តុលាការ»។
បន្ទាប់ពីស្តាប់ការប្រកាសសាលដីកាចប់លោក មេធាវី ជូង ជូងី បានថ្លែងប្រាប់កាសែតភ្នំពេញប៉ុស្តិ៍នៅក្រៅបន្ទប់សវនាការថា ករណីនេះ លោកមានការសោកស្តាយដែលលោកចៅ វាសនា ស្នើសុំនៅក្រៅឃុំហ្នឹងគឺសមរម្យដែលតុលាការកំពូលអាចអនុញ្ញាតឲ្យគាត់នៅក្រៅឃុំបាន។
លោកថា៖ «សំណុំរឿងរបស់លោកចៅ វាសនា ក្នុងអង្គសេចក្តីបានប្តឹងសារទុក្ខដល់តុលាការកំពូលហើយ ហើយក៏មិនទាន់ចូលជាស្ថាពរនៅឡើយដែរ។ ដូច្នេះបើពេលបើកសវនាការសំណុំរឿងក្នុងអង្គសេចក្តី ហើយបើតុលាការកំពូលយល់ថា កូនក្តីរបស់លោកមានទោសក៏វាមិនហួសពេលដែរ»។
កាលពីជំនុំជម្រះនៅថ្ងៃម្សិលមិញនេះ លោកមេធាវី ជូង ជូងី បានប្រាប់ចៅក្រមថា កូនក្តីរបស់លោកសុំតុលាការនៅក្រៅឃុំបណ្តោះអាសន្ន ដោយសារគាត់មានជំងឺជាតិពុលក្នុងឈាម បញ្ហាថ្លើម និងកន្លងមកគាត់មានរោគខ្នែងពោះវៀនផង។
រីឯលោក ចៅ វាសនា ក៏បានប្រាប់ចៅក្រមដែរថា គាត់មានជំងឺដូចអ្វីដែលលោកមេធាវីរបស់លោកបានរៀបរាប់ប្រាប់តុលាការអ៊ីចឹង។
លោកបានបញ្ជាក់ថា៖ «ខ្ញុំមានលំនៅច្បាស់លាស់ មានមុខរបរត្រឹមត្រូវ ហើយខ្ញុំមិនគេចខ្លួនទៅណាទេ»។
លោក ចៅ វាសនា ត្រូវបានសមត្ថកិច្ចចាប់ខ្លួន ក្រោយពីមានការស្រាវជ្រាវពីសមត្ថកិច្ចថា បានចូលរួមក្នុងជម្លោះរវាងកម្មករអូសរទេះ និងមន្រ្តីគយនៅច្រកទ្វារអន្តរជាតិក្រុងប៉ោយប៉ែត ខេត្តបន្ទាយមានជ័យកាលពីថ្ងៃទី ២៥ ឧសភា ឆ្នាំ ២០១៥។
ក្រោយពីជាប់ឃុំបណ្តោះអាសន្នមក លោក ចៅ វាសនា បានប្តឹងសុំនៅក្រៅឃុំ ខណៈសំណុំរឿងក្នុងអង្គសេចក្តី ត្រូវបានសាលាដំបូងខេត្តបន្ទាយមានជ័យលើកទៅជំនុំជម្រះមុន ហើយត្រូវបានផ្តន្ទាទោសដាក់ពន្ធនាគារ ៥ ឆ្នាំ ដោយចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ សមគំនិតក្នុងអំពើធ្វើឲ្យខូចខាតដោយចេតនា និងបំផ្លិចបំផ្លាញទ្រព្យសម្បត្តិសាធារណៈរបស់រដ្ឋ។
ដោយមិនសុខចិត្តនឹងការផ្តន្ទាទោសនេះលោក ចៅ វាសនា បានប្តឹងទាស់មកសាលាឧទ្ធរណ៍ ហើយនៅថ្ងៃទី ១៩ តុលា ឆ្នាំ ២០១៨ ត្រូវសាលាឧទ្ធរណ៍តម្កល់សាលក្រមសាលាដំបូងខេត្តបន្ទាយមានជ័យ ទើបមានការប្ដឹងសារទុក្ខមកកាន់តុលាការកំពូលបន្តទៀត៕
