.jpg)
ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាសម្រេចបង្វិលសំណុំរឿងកាប់មនុស្សស្លាប់នៅផ្សារអូឡាំពិករាជធានីភ្នំពេញ ឲ្យសាលាឧទ្ធរណ៍ជំនុំជម្រះឡើងវិញ បន្ទាប់ពីបើកសវនាការកាលពីថ្ងៃទី ១៧ មិថុនា ដោយមកពីយល់ថា អង្គហេតុនៃសំណុំរឿងនេះនៅខ្វះចន្លោះមិនអាចឲ្យតុលាការកំពូលវិនិច័្ឆយបាន។
លោកស្រី ចៅក្រម គិម សត្ថាវី បានអានសាលដីកាកំបាំងមុខជនជាប់ចោទ (គេចខ្លួន) និងកំបាំងមុខមេធាវីថា សំណុំរឿងដែលមានជនជាប់ចោទឈ្មោះ សៅ សុផាន់ថង ដែលតុលាការកំពូលបានជំនុំជម្រះកាលពីថ្ងៃទី ១៧ មិថុនា គឺក្រោយពីបានពិភាក្សាមក ក្រុមប្រឹក្សាជំនុំជម្រះយល់ឃើញថា ការសម្រេចសេចក្តីរបស់សាលាឧទ្ធរណ៍កន្លងមកមិនទាន់ច្បាស់លាស់នៅឡើយទេ។
លោកស្រីចៅក្រម ថា៖ «ដូចនេះតុលាការបង្វិលទៅសាលាឧទ្ធរណ៍ជំនុំជម្រះជាថ្មីឡើងវិញ»។
ពាក់ព័ន្ធនឹងការបង្វិលសំណុំរឿងឲ្យឧទ្ធរណ៍ជំនុំជម្រះឡើងវិញនេះ ភ្នំពេញប៉ុស្តិ៍បានទាក់ទងទៅមេធាវីរបស់ជនជាប់ចោទគឺលោកស្រី សំផុន សុផារ័ត្ន កាលពីម្សិលមិញដែរ តែលោកស្រីថា មិនមានយោបល់ណាមួយជុំវិញការសម្រេចរបស់តុលាការកំពូលនេះទេ។
តាមកំណត់ហេតុតុលាការបានបង្ហាញថា នៅយប់ថ្ងៃទី ១១ ខែកក្កដាឆ្នាំ ២០១៣ មានមនុស្ស ២ ក្រុម ដែលក្នុង ១ ក្រុម មានគ្នាពី ៥ ទៅ ៦ នាក់បានជុំគ្នាផឹកស៊ីនៅកន្លែងមួយម្តុំផ្សារអូឡាំពិករាជធានីភ្នំពេញ។
ពេលកំពុងផឹកស៊ីនោះភាគីឈ្មោះ សៅ សុផាន់ថង និងជនរងគ្រោះឈ្មោះ ប៊ុន គីមស៊ន អាយុ ២៤ ឆ្នាំបានទាស់សម្តីគ្នា ហើយបន្ទាប់មកក៏បែកគ្នាទៅ។ ប៉ុន្តែមួយសន្ទុះក្រោយមក ស្រាប់តែជនជាប់ចោទ សៅ សុផាន់ថង បានជិះម៉ូតូ ២ គ្រឿង ត្រឡប់មកវិញដោយមនុស្សនៅលើម៉ូតូមានកាន់ដាវនិងកាំបិតហើយបានមកកាប់លើជនរងគ្រោះត្រូវក្បាលជាច្រើនកន្លែងបណ្តាលឲ្យរបួសជាទម្ងន់ ហើយត្រូវគ្នាគ្នីរបស់ជនរងគ្រោះដឹកទៅសង្គ្រោះនៅមន្ទីរពេទ្យកាល់ម៉ែត។
បើតាមលោក ប៊ុន គឹ ជាឪពុករបស់ជនរងគ្រោះដែលបានឆ្លើយបំភ្លឺក្នុងសវនាការកាលពីថ្ងៃទី ១៧ មិថុនា ថា ក្រោយដឹងឮថាកូនត្រូវគេកាប់ គាត់ក៏បានធ្វើដំណើរពីខេត្តកំពង់ឆ្នាំងមកមើលកូននៅមន្ទីរពេទ្យកាល់ម៉ែត។ប៉ុន្តែដេកពេទ្យបាន ១ យប់ ១ ថ្ងៃ កូនរបស់គាត់ក៏ស្លាប់ទៅដោយសារតែរបួសធ្ងន់ពេក។
បន្ទាប់មក ដោយស្គាល់ឈ្មោះជនជាប់ចោទ គាត់ក៏បានស្រាវជ្រាវតាមបណ្តាញសង្គមហើយបានឃើញគណនីហ្វេសប៊ុករបស់ជនជាប់ចោទទើបដាក់ពាក្យបណ្តឹងនៅប៉ុស្តិ៍នគរបាលសង្កាត់អូឡាំពិក រហូតមានការបញ្ជូនសំណុំរឿងបន្តទៅសាលាដំបូងរាជធានីភ្នំពេញ។
សំណុំរឿងនេះត្រូវសាលាដំបូងរាជធានីភ្នំពេញប្រកាសសាលក្រមនៅថ្ងៃទី ១២ ខែសីហា ឆ្នាំ ២០១៥ ដោយផ្តន្ទាទោសដាក់ពន្ធនាគារ ៩ ឆ្នាំ ដោយឲ្យសងសំណង ៦០ លានរៀល ចោទពីបទហិង្សាដោយចេតនាមានស្ថានទម្ងន់ទោស ដោយសារមរណភាពនៃជនរងគ្រោះនិងបង្គាប់ឲ្យសមត្ថកិច្ចស្វែងរកចាប់ខ្លួនជនជាប់ចោទ។
ដោយមិនសុខចិត្ត ភាគីជនជាប់ចោទបានពឹងមេធាវីប្តឹងទាស់ទៅសាលាឧទ្ធរណ៍ ហើយត្រូវសាលាឧទ្ធរណ៍ប្រកាសសាលដីកានៅថ្ងៃទី ២៣ មីនា ឆ្នាំ ២០១៧ ផ្តន្ទាទោស៧ឆ្នាំវិញ និងបង្គាប់ឲ្យសមត្ថកិច្ចតាមចាប់ខ្លួនជនជាប់ចោទ។ ប៉ុន្តែដោយសារភាគីទាំង ២ មិនសុខចិត្តក៏បានពឹងមេធាវីប្ដឹងសារទុក្ខមកតុលាការកំពូលបន្តទៀត៕
