.jpg)
ឧបរណ៍ប្រព្រឹត្តបទល្មើសសត្វព្រៃពេលសមត្ថកិច្ចរឹបអូសបាន។ Birdlife International Cambodia
ស្ទឹងត្រែងៈ ឧបករណ៍ប្រព្រឹត្តបទល្មើសចំនួន ៦១៦ មានដូចជា កាំភ្លើងកែច្នៃ ២ ដើមមនចាប់សត្វចំនួន ៥ ដៃឧបករណ៍ឆក់ត្រី ១ គ្រឿង[ប្រើចាប់សត្វ]និងអន្ទាក់ ៦០៨ ខ្សែត្រូវបង្ក្រាបបាននៅដែនជម្រកសត្វព្រៃសៀមប៉ាង និងសៀមប៉ាងខាងលិចនៃខេត្តស្ទឹងត្រែងនៅក្នុងខែកុម្ភៈឆ្នាំ ២០១៩។ នេះបើតាមការចុះផ្សាយដោយអង្គការជីវិតសត្វស្លាបអន្តរជាតិប្រចាំកម្ពុជានៅថ្ងៃ ២៧ កុម្ភៈ។
លោក ប៊ូ វរសក្ស នាយកកម្មវិធីនៃអង្គការជីវិតសត្វស្លាបអន្តរជាតិប្រចាំកម្ពុជាបានប្រាប់ភ្នំពេញប៉ុស្ដិ៍ថា ឧបករណ៍សម្រាប់បរបាញ់និងទាក់សត្វព្រៃទាំងនេះ ត្រូវបានបង្ក្រាបពេលចុះល្បាតក្នុងខែកុម្ភៈនៅតំបន់ជម្រកសត្វព្រៃសៀមប៉ាងនិងសៀមប៉ាងខាងលិច ដែលជាទីតាំងរបស់សត្វជិតផុតពូជចំនួន ៥ ប្រភេទ ដូចជា សត្វត្រយង និងសត្វត្មាតជាដើម។
ទោះជាយ៉ាងណាលោក វរសក្ស បានឲ្យដឹងថា មកទល់ពេលនេះ ពលរដ្ឋភាគច្រើនមានការយល់ពីការអភិរក្សសត្វព្រៃនៅតំបន់ខាងលើនេះខណៈបទល្មើសមានការថយចុះ។
លោកថា៖ «ប្រជាពលរដ្ឋភាគច្រើនយល់រឿងហ្នឹងហើយ ប៉ុន្តែនៅមានមួយចំនួនតូច អ៊ីចឹងការងារអប់រំផ្សព្វផ្សាយត្រូវធ្វើទន្ទឹមនឹងការងារអភិរក្ស។ បើនិយាយអំពីទំហំដាក់អន្ទាក់គឺថយចុះបើប្រៀបធៀបនឹងប៉ុន្មានឆ្នាំមុន តែបើឱ្យវាបាត់ទាំងអស់គឺមិនបាត់ទេគឺវានៅតែបន្តអ៊ីចឹង»។
តំបន់ព្រៃសៀមប៉ាង និងសៀមប៉ាងខាងលិច ដែលមានទំហំផ្ទៃដីសរុបចំនួន ១៣២ ៣២១ ហិកតា ត្រូវបានរដ្ឋាភិបាលចេញអនុក្រឹត្យបង្កើតជាទីជម្រកសត្វព្រៃកាលពីឆ្នាំ ២០១៦ ដើម្បីឱ្យក្រសួងបរិស្ថានរៀបចំនិងគ្រប់គ្រង ដោយសហការជាមួយក្រសួង ស្ថាប័នពាក់ព័ន្ធ និងរដ្ឋបាលដែនដីខេត្តស្ទឹងត្រែង ក្នុងការធានាកិច្ចគាំពារបរិស្ថាន អភិរក្សជីវចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព។
លោក អេង ភីរុង ប្រធានមន្ទីរបរិស្ថានខេត្តស្ទឹងត្រែងបានថ្លែងដែរថាចាប់ពីឆ្នាំ ២០១៨ មក បទល្មើសប្រមាញ់សត្វព្រៃក្នុងតំបន់អភិរក្សទាំង ២ នេះបានថយចុះច្រើន ហើយសត្វដែលសង្កេតឃើញមានច្រើនជាងគេនៅពេលបច្ចុប្បន្នមានដូចជា ខ្ទីង ឈ្លូស ប្រើស និងជ្រូកព្រៃជាដើម។
លោកបន្តថា អាជ្ញាធរតែងចុះទៅអប់រំពលរដ្ឋក្នុងតំបន់ឱ្យយល់ដឹងពីតម្លៃដែលទទួលបានពីការចូលរួមអភិរក្សសត្វជិតផុតពូជនិងជីវចម្រុះផ្សេងៗដូចជា ការចុះទៅអប់រំផ្ទាល់ និងតាមរយៈកិច្ចប្រជុំនៅតាមឃុំ។ លោកបន្ថែមថា ការចុះល្បាតកន្លងមកអាជ្ញាធរពុំបានឃាត់ខ្លួនអ្នកប្រមាញ់ឡើយ ប៉ុន្តែភាគច្រើនគឺអប់រំនិងឲ្យពួកគាត់ធ្វើកិច្ចសន្យាឈប់ប្រព្រឹត្តបទល្មើសតទៅទៀត។
លោកថា៖ «ក្នុងនាមខ្ញុំជាប្រធានមន្ទីរត្រូវអប់រំពួកគាត់ ព្រោះសត្វទាំងហ្នឹងអាខ្លះជិតផុតពូជ យើងត្រូវពន្យល់ប្រាប់គាត់ថា ដូចជាត្មាតហ្នឹងគឺជាសត្វសារៈសំខាន់នៅលើពិភពលោកហើយមាននៅតែស្រុកខ្មែរយើងដែលត្រូវជួយអភិរក្សគ្នា។ បើតាមលោក អេង ភីរុង ពលរដ្ឋមួយចំនួនតូចដែលបន្តបរបាញ់និងទាក់សត្វព្រៃគឺពួកគាត់បានសារភាពថា ដោយសារមិនទាន់យល់ដឹងអំពីសារៈសំខាន់នៃការអភិរក្ស «និយាយឱ្យចំវាអត់បាន ១០០ ភាគរយទេ (ការអភិរក្ស) ព្រោះពលរដ្ឋខ្លះនៅតំបន់ដាច់ស្រយាលអត់បានដឹង ជួនកាលដូចជា សត្វស្វាអីហ្នឹង គាត់អត់ដឹងថា សត្វហ្នឹងមានសារៈសំខាន់យ៉ាងមេ៉ចទេ ទាល់តែយើងអប់រំគាត់ថាសត្វហ្នឹងមានប្រយោជន៍សម្រាប់សង្គមយើង អ៊ីចឹងហ្នឹងណា ដើម្បីទុកឱ្យអ្នកទេសចរមកមើលអ៊ីចឹងទៅ»។
លោកប្រធានមន្ទីរបរិស្ថានរូបនេះបានអះអាងថា បច្ចុប្បន្នក្រុមការងារចុះល្បាតការពារសត្វព្រៃក្នុងតំបន់សៀមប៉ាងនិងសៀមប៉ាងខាងលិចគឺមានចំនួន ១០ នាក់ដោយបែងចែកជា ២ ក្រុមដែលជាកម្លាំងសហការគ្នារវាងអាជ្ញាធរ និងមន្ត្រីអង្គការជីវិតសត្វស្លាបអន្តរជាតិប្រចាំកម្ពុជានិងតែងចុះល្បាតជាប្រចាំ។
ជាមួយគ្នានេះ បើតាមអង្គការសម្ព័ន្ធមិត្តសត្វព្រៃ (Wildlife Alliance Cambodia) ក្នុងមួយឆ្នាំៗអង្គការនេះបានចុះប្រមូលអន្ទាក់ចាប់សត្វព្រៃបានរាប់ពាន់អន្ទាក់ពីក្នុងព្រៃជ្រៅនៅកម្ពុជា៕
