ភ្នំពេញ៖ ក្នុងរយៈពេលជាង ១ ខែកន្លងមកនេះ សមត្ថកិច្ចចម្រុះនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្មបានរកឃើញ និងបង្ក្រាបចាប់រឹបអូសទឹកអាល់កុលក្លែងក្លាយជាង ៨០ តោន ពីតាមទីផ្សារនៅទូទាំងប្រទេស។
យោងតាមសេចក្ដីជូនដំណឹងរបស់ក្រសួងពាណិជ្ជកម្មចុះថ្ងៃទី ១៧ ខែ មេសា ឆ្នាំ ២០២០ ដែលភ្នំពេញ ប៉ុស្តិ៍ទទួលបានកាលពីម្សិលមិញទឹកអាល់កុលសម្រាប់លាងដៃ ដែលផ្សំឡើងពីសារធាតុមេតាណុល ដែលត្រូវបានហាមឃាត់ ដោយអង្គការសុខភាពពិភពលោក ចំនួនជាង ៨០ តោន ត្រូវបានសមត្ថកិច្ចជំនាញ នៃក្រសួងពាណិជ្ជកម្មសហការជាមួយស្ថាប័នពាក់ព័ន្ធរកឃើញ និងបង្ក្រាបចាប់រឹបអូសពីតាមទីផ្សារ និងនៅតាមទីកន្លែងផ្សេងៗទៀតនៅទូទាំងប្រទេស។
សេចក្ដីជូនដំណឹងបន្តថា៖ «មេតាណុល គឺជាប្រភេទអាល់កុលពុលគ្មានពណ៌ គ្មានក្លិន និងមានលក្ខណៈថ្លាស្រដៀងគ្នាខ្លាំង ទៅនឹងអាល់កុលធម្មតា (អេទីលអាល់កុល) ដែលភាគច្រើនត្រូវបានប្រើប្រាស់ជាសារធាតុរំលាយ»។
យោងតាមសេចក្តីណែនាំរបស់អង្គការសុខភាពពិភពលោក សារធាតុមេតាណុល មិនត្រូវបានអនុញ្ញាតឲ្យប្រើប្រាស់ជាសារធាតុផ្សំសកម្មនៅក្នុងការផលិតសារធាតុលាងសម្អាតដៃឡើយ ព្រោះវាធ្វើឲ្យប៉ះពាល់ខ្លាំងដល់សុខភាពរបស់អ្នកប្រើប្រាស់។ ក្នុងនោះផលប៉ះពាល់សម្រាប់រយៈពេលខ្លី គឺវានឹងធ្វើឲ្យអ្នកប្រើប្រាស់ «រលាកស្បែក រលាកភ្នែក ឈឺក្បាល វិលមុខ ងងុយដេក ច្របូលច្របល់ បាត់ស្មារតី ក្អួត រំខានដល់ការរំលាយអាហារ និងធ្វើឱ្យស្រវាំងភ្នែក»។
សម្រាប់ក្នុងរយៈពេលវែងវិញ «ប្រសិនបើមានការដាក់លាយជាមួយស្រា ឬជាមួយភេសជ្ជៈផ្សេងៗនោះវានឹងធ្វើឲ្យពុលដល់ប្រព័ន្ធរាងកាយ ខូចដល់ប្រព័ន្ធខួរក្បាល ការមើលឃើញចុះខ្សោយ ឬស្រវាំង និងអាចងងឹតភ្នែកទាំងស្រុង»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មនៅថ្ងៃម្សិលមិញបានអំពាវនាវដល់អាជីវករ ពាណិជ្ជករ ក្រុមហ៊ុន សហគ្រាស និងបុគ្គល ដែលធ្វើអាជីវកម្មលើផលិតផលដែលប្រើប្រាស់សារធាតុមេតាណុល ឲ្យបញ្ឈប់ការដាក់លក់ និងចែកចាយផលិតផលទាំងនោះនៅក្នុងទីផ្សារ ដើម្បីជាប្រយោជន៍រួមរបស់ប្រជាពលរដ្ឋទាំងមូល។
លោកព្រមានថា៖ «ក្នុងករណីក្រសួងពិនិត្យឃើញ អាជីវករ ពាណិជ្ជករ ក្រុមហ៊ុន សហគ្រាស និងបុគ្គលណាមួយ នៅតែឆ្លៀតឱកាសលក់ និងចែកចាយទឹកអាល់កុលធ្វើពីមេតាណុល ក្នុងអំឡុងពេលកម្ពុជាកំពុងជួបប្រទះនឹងការរាតត្បាតជាសកលនៃជំងឺកូវីដ ១៩ ក្រសួងពាណិជ្ជកម្មនឹងចាត់វិធានការតាមផ្លូវច្បាប់ជាធរមាន»។
បើតាមលោក ស៊ាង ថៃ ក្នុងករណី មិនអនុវត្តតាមសេចក្ដីអំពាវនាវរបស់ក្រសួង ជនប្រព្រឹត្តបទល្មើសនឹងរងការផាកពិន័យ ឬនឹងត្រូវរឹបអូសអាជ្ញាប័ណ្ណ [បញ្ចប់មុខរបរអាជីវកម្ម] និងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសទៅតាមច្បាប់ អាស្រ័យលើបរិមាណនៃផលិតផលដែលជាវត្ថុតាងត្រូវបានរឹបអូស។
ទន្ទឹមជាមួយគ្នានេះដែរ លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ នៃក្រសួងពាណិជ្ជកម្មបានថ្លែងពីម្សិលមិញថា នៅពេលនេះក្រសួងកំពុងចំណាត់ការតាមផ្លូវច្បាប់ ប្រឆាំងទៅនឹងជនបរទេស ២ នាក់ ដែលបានលួចនាំចូលដោយខុសច្បាប់នូវផលិតផលទឹកអាល់កុលសម្រាប់លាងដៃដែលផ្សំឡើងពីសារធាតុមេតាណុលមកក្នុងទីផ្សារកម្ពុជា។
លោក ផាន អូន បានបញ្ជាក់ថា៖ «សម្រាប់ករណីទឹកអាល់កុលក្លែងក្លាយនេះ គឺផលប៉ះពាល់របស់វា មិនត្រឹមតែទៅលើផ្នែកសេដ្ឋកិច្ចរបស់អ្នកប្រើប្រាស់ប៉ុណ្ណោះទេ វាថែមទាំងលើផ្នែកសុខភាពយ៉ាងធ្ងន់ធ្ងរថែមទៀត ដូច្នេះយើងចាំបាច់ត្រូវកសាងសំណុំរឿងបញ្ជូនទៅតុលាការ ដើម្បីចំណាត់ការទៅតាមនីតិវិធីច្បាប់»៕