.jpg)
សមត្ថកិច្ចបង្ហាញជនពាក់ព័ន្ធគ្រឿងញៀនដែលបង្ក្រាបបានកន្លងមក។ ផា លីណា
ភ្នំពេញៈ ក្នុង ១ ថ្ងៃសមត្ថកិច្ចបានធ្វើការឃាត់ខ្លួនអ្នកជួញដូរ និងអ្នកប្រើប្រាស់គ្រឿងញៀនជាមធ្យមបាន ៤០ នាក់ដែលធ្វើឲ្យមជ្ឈមណ្ឌលព្យាបាលគ្រឿងញៀនបណ្តោះអាសន្នឡើងចង្អៀតណែនបើទោះបីជាមន្ត្រីនៃអាជ្ញាធរជាតិប្រយុទ្ធប្រឆាំងគ្រឿងញៀនបានអះអាងថា ករណីគ្រឿងញៀនមានការថយចុះក៏ដោយ។
នាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថែ្លងប្រាប់ភ្នំពេញប៉ុស្តិ៍កាលពីម្សិលមិញថា ចំនួនករណីបង្ក្រាបអ្នកជួញដូរ និងអ្នកប្រើប្រាស់គ្រឿងញៀនមានការថយចុះ ដោយសារតែការចូលរួមពីគ្រប់សមាសភាពនៅក្នុងសង្គមទាំងការធ្វើសកម្មភាព និងការគាំទ្រពីប្រជាពលរដ្ឋទាំងការផ្តល់ព័ត៌មាន និងការសហការជាមួយសមត្ថកិច្ច និងរាជរដ្ឋាភិបាលបានដាក់ចេញនូវយុទ្ធនាការប្រយុទ្ធប្រឆាំង គ្រឿងញៀន និងវិធានការជាក់ស្តែងជាបន្តបន្ទាប់។
លោកបានបញ្ជាក់ថា៖ «ជាមធ្យម ៤០ នាក់រួមទាំងអ្នកដែលប្រើប្រាស់ និងអ្នកដែលប្រព្រឹត្តបទល្មើសជួញដូរគ្រឿងញៀនត្រូវបានឃាត់ខ្លួនក្នុង ១ ថ្ងៃ។ កាលពីមុន ១ ថ្ងៃមាន ២៤ ករណីឥឡូវធ្លាក់មកនៅតែ ២២ ករណី ហើយកាលពីមុនចាប់ខ្លួនប្រមាណ ៥៤ នាក់ឥឡូវធ្លាក់មកនៅត្រឹមប្រមាណ ៤០ នាក់គឺវាមានការថយចុះច្រើន...។ ឥឡូវនេះនៅតាមមណ្ឌលបណ្តោះអាសន្នមួយចំនួន វាឡើងសរុបទៅប្រហែលជា ៦ ០០០ នាក់»។
លោកបានបន្ថែមថាអាជ្ញាធរជាតិប្រយុទ្ធប្រឆាំងគ្រឿងញៀនបាន និងកំពុងខិតខំធ្វើការបន្ថែមទៀត ដើម្បីឲ្យស្ថានភាពកាន់តែល្អប្រសើរ និងដើម្បីទប់ស្កាត់កុំឲ្យបញ្ហាគ្រឿងញៀនមានការរីករាលដាល។
លោកបញ្ជាក់ថា៖ «យើងខិតខំបន្ថយចំនួនអ្នកប្រើប្រាស់គ្រឿងញៀនឲ្យទទួលសេវាព្យាបាលដោយស្ម័គ្រចិត្តហើយនឹងដាស់តឿនអប់រំប្រជាពលរដ្ឋ ជាពិសេសអាណាព្យាបាលឲ្យខិតខំយកចិត្តទុកដាក់តាមដានកូនដោយបញ្ជូនកូនទៅទទួលយកសេវាព្យាបាលដោយកុំខ្មាសអៀន និងលាក់លៀម»។
ជាមួយគ្នានេះដែរនៅក្នុងបទសម្ភាសជាមួយទូរទស្សន៍ Fresh News កាលពីម្សិលមិញ នាយឧត្តមសេនីយ៍ មាស វីរិទ្ធ បានថ្លែងថាក្នុងរយៈពេល ២៤៩ ថ្ងៃមានករណីគ្រឿងញៀនសរុបចំនួន ៥២០០ ករណីដែលពាក់ព័ន្ធទាំងអ្នកប្រើប្រាស់ និងអ្នកជួញដូរ ហើយមានជនដែលប្រព្រឹត្តបទល្មើសគ្រឿងញៀន និងអ្នកប្រើប្រាស់ គ្រឿងញៀនចំនួន ១០ ៥១៩ នាក់។
ក្នុងចំណោមករណីសរុបចំនួន ៥ ២០០ ករណីមានករណីចរាចរណ៍ និងជួញដូរ ដឹកជញ្ជូន និងរក្សាទុកគ្រឿងញៀនចំនួន ៣៣៩៩ ករណី ហើយបានឃាត់ខ្លួនជនសង្ស័យចំនួន ៦ ១៦៥ នាក់ខណៈដែលមានអ្នកប្រើប្រាស់ចំនួន ១ ៨៩៦ ករណីដែលជនប្រើប្រាស់គ្រឿងញៀនមានចំនួន ៤ ៣៥៤ នាក់។
លោកបានបន្ថែមថាទន្ទឹមនឹងភាពចង្អៀតណែននៅតាមមណ្ឌលស្តារនីតិសម្បទាមួយចំនួនរាជរដ្ឋាភិបាលក៏បានខិតខំប្រឹងប្រែងកសាងមជ្ឈមណ្ឌលដ៏ធំមួយនៅក្នុងឃុំស្ទឹងហាវ ខេត្តព្រះសីហនុដែលអាចដាក់មនុស្សបានប្រមាណ ២០០០ នាក់ដោយផ្តល់សេវាគ្រប់ជ្រុងជ្រោយហើយនៅពេលនេះកំពុងសាងសង់ដែលត្រូវចំណាយថវិកាប្រមាណ ៦ លានដុលា្លរ។
លោក មាស វីរិទ្ធ បានបញ្ជាក់ដូច្នេះថា៖ «អ្វីដែលប្រឈមខ្លាំងនោះនៅកម្ពុជាគាត់ (អ្នកប្រើគ្រឿងញៀន) គឺជាបុគ្គលដែលធ្វើចំណាកស្រុកទៅក្រៅប្រទេស និងចំណាកស្រុកពីស្រុកកំណើតទៅទីប្រជុំជនដើម្បីរកការងារធ្វើ ហើយគាត់ក៏ត្រូវបានគេអូសទាញ និងលួងលោមពីក្រុមជួញដូរគ្រឿងញៀនឲ្យគាត់ក្លាយទៅជាអ្នកប្រើប្រាស់គ្រឿងញៀន ហើយទីបំផុតគាត់ធ្លាក់ខ្លួនទៅជាបុគ្គលដែលអាចប្រព្រឹត្តបទល្មើស ឬបង្កបញ្ហារំខានដល់អ្នកដទៃជាពិសេសធ្វើឲ្យមានការរំខានដល់សន្តិសុខសណ្តាប់ធ្នាប់ សាធារណៈក្នុងសង្គមដែលយើងកំពុងនាំគ្នាថែរក្សា...»។
លោកក៏បានឲ្យដឹងដែរថាបច្ចុប្បន្នសមត្ថភាពក្នុងការអនុវត្តច្បាប់របស់មន្ត្រីអនុវត្តច្បាប់គឺនៅមានកម្រិតនៅឡើយ ខណៈដែលក្រុមឧក្រិដ្ឋជនមានការវិវឌ្ឍជឿនលឿនជាងសមត្ថកិច្ច។
មន្ត្រីប៉ូលិសក្រុងភ្នំពេញម្នាក់ដែលសុំមិនបញ្ចេញឈ្មោះបានចោទប្រកាន់ថា មន្ត្រីប៉ូលិសគ្រឿងញៀនមួយចំនួននៅពេលពួកគេបានចាប់ខ្លួនអ្នកប្រើប្រាស់គ្រឿងញៀន មន្ត្រីទាំងនោះបានធ្វើរបាយការណ៍ចោទប្រកាន់ពួកគេថាជួញដូរគ្រឿងញៀនជាថ្នូរនឹងការទាមទារសំណូកពីសាច់ញាតិជនទាំងនោះ។
លោកបានបញ្ជាក់ដូច្នេះថា៖ «ប៉ូលិសមួយចំនួននៅពេលដែលចាប់បានអ្នកដែលប្រើប្រាស់ពួកគាត់ចោទថាពួកគេជាអ្នកជួញដូរដើម្បីទារលុយពីសាច់ញាតិពួកគេ ហើយបើជនទាំងនោះមិនឲ្យលុយទេ ពួកគេនឹងបញ្ជូនទៅតុលាការ។ មន្ត្រីខ្លះឃុបឃិតនឹងអ្នកជួញដូរគ្រឿងញៀន ដោយសារតែខ្លួនបានសំណូកពីអ្នកជួញដូរគ្រឿងញៀន»។
មន្ត្រីជាន់ខ្ពស់របស់អង្គការដែលធ្វើការព្យាបាលអ្នកប្រើប្រាស់គ្រឿងញៀន នៅមជ្ឈមណ្ឌលមួយដែលសុំមិនបញ្ចេញឈ្មោះបានថ្លែងថា សមត្ថកិច្ចមិនសូវជាចាប់បានអ្នកជួញដូរគ្រឿងញៀនធំៗទេគឺចាប់បានតែអ្នកប្រើប្រាស់តូចតាចហើយក៏បង្ក្រាបមិនសូវចំគោលដៅឈ្មួញជួញដូរធំៗដែរ។
លោកអះអាងថា អ្នកខ្លះមិនបានប្រើប្រាស់ផង គ្រាន់តែជិះជាមួយគ្នាក៏ជាប់ចោទជាអ្នកជួញដូរគ្រឿងញៀនដែរ។
លោកបញ្ជាក់ថា៖ «កាលណាមណ្ឌលមានបរិមាណអ្នកប្រើប្រាស់គ្រឿងញៀនលើសចំណុះនោះគុណភាពនៃការព្យាបាលក៏ពុំសូវមានប្រសិទ្ធភាពដែរ...វានឹងធ្វើឲ្យប៉ះពាល់ដល់សុខភាពរបស់ពួកគេ និងហើយវាខុសបចេ្ចកទេស។ នេះមិនមែនការព្យាបាលទេ»៕
