.jpg)
អ្នកដំណើរពេលមកដល់ព្រលានយន្តហោះអន្តរជាតិភ្នំពេញកាលពីថ្ងៃទី ១៦ ខែមិថុនា ឆ្នាំ ២០២០។ ហេង ជីវ័ន
ភ្នំពេញៈ ក្នុងរយៈពេលជិត ២ ខែមកនេះ កម្ពុជាទទួលបានអ្នកដំណើរតាមជើងហោះហើរជាជនជាតិបរទេស និងខ្មែរជាង ២ ម៉ឺននាក់ ដែលភាគច្រើនជាជនជាតិចិន ខណៈមន្ត្រីខាងអាកាសចរស៊ីវិលរំពឹងថា នៅក្នុងខែកក្កដានេះ កម្ពុជានឹងមានអ្នកដំណើរកើនលើសពី ២ ម៉ឺននាក់។
លោក ជា អូន រដ្ឋលេខាធិការ និងជាអ្នកនាំពាក្យអាកាសចរស៊ីវិលបានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា ជាធម្មតាកម្ពុជាទទួលបានអ្នកដំណើរមកពីក្រៅប្រទេសតាមជើងហោះហើរគឺជាមធ្យមពី ១ ម៉ឺន ៥ ពាន់នាក់ទៅ ២ ម៉ឺននាក់ក្នុង ១ ថ្ងៃ ប៉ុន្តែចាប់តាំងពីកើតមានវិបត្តិកូវីដ១៩មកបានធ្វើឱ្យអ្នកដំណើរថយចុះយ៉ាងខ្លាំង គឺក្នុង ១ ថ្ងៃស្ទើរតែគ្មានជើងហោះហើរមកពីក្រៅប្រទេសសោះក៏មាន។
លោកបន្តថា បើគិតចាប់ពីខែកុម្ភៈរហូតដល់ចុងខែមេសា តួលេខអ្នកដំណើរសរុបប្រហែល ៣ ខែនេះគឺមានប្រហែលពី ៦ ពាន់ទៅ ៧ ពាន់នាក់ប៉ុណ្ណោះ ហើយនៅក្នុងខែឧសភាមានអ្នកដំណើរសរុបប្រហែល ១ ម៉ឺន ៧ ពាន់នាក់ និងខែមិថុនាមានអ្នកដំណើរប្រហែល ២ ម៉ឺននាក់ ខណៈនៅក្នុងខែកក្កដានេះ លោករំពឹងថានឹងអាចមានអ្នកដំណើរកើនដល់ ២ ម៉ឺន ៥ ពាន់នាក់ ឬទៅដល់ ៣ ម៉ឺននាក់។
លោកថា៖ «ឥឡូវនេះ មានតែអ្នកដំណើរ (ជនបរទេស) ដែលគេត្រឡប់មកធ្វើការងារវិញ ឬនិស្សិតខ្មែរមកផ្ទះប៉ុណ្ណោះ មិនមែនអ្នកទេសចរទេ មិនដូចពីមុនមានអ្នកដំណើរជាអ្នកទេសចរចូលមកច្រើនក្នុង ១ ថ្ងៃៗ។ ចំនួនអ្នកដំណើរនៅពេលនេះទាបណាស់ ព្រោះបើប្រៀបធៀបចំនួនអ្នកដំណើរក្នុង ១ ខែគឺខែ ៥ និងខែ ៦ គឺស្ទើរតែស្មើចំនួនអ្នកដំណើរក្នុង ១ ថ្ងៃកាលពីពេលមុន (មុនកើតជំងឺកូវីដ)»។
ជាមួយគ្នានេះលោកស្រី យក់ សម្បត្តិ រដ្ឋលេខាធិការ ក្រសួងសុខាភិបាលបានបញ្ជាក់ថា បើគិតចាប់តាំងពីថ្ងៃទី ២០ ខែឧសភា គឺនៅពេលដែលរដ្ឋាភិបាល អនុញ្ញាតឱ្យអ្នកដំណើរមកពីប្រទេសចំនួន ៦ រួមមានសហរដ្ឋអាមេរិក បារាំង អាល្លឺម៉ង់ អ៊ីតាលី អេស្ប៉ាញ និងអ៊ីរ៉ង់អាចចូលកម្ពុជាមកដល់ថ្ងៃទី ១៥ ខែកក្កដា គឺមានអ្នកដំណើរសរុបជាង ២ ម៉ឺននាក់ក្នុងនោះភាគច្រើនជាជនជាតិចិនដែលត្រឡប់មកបំពេញការងារវិញ និងនិស្សិតខ្មែរជិត ១ ពាន់នាក់។
សារព័ត៌មាន ហ្វ្រេសញូវ បានដកស្រង់សម្ដីលោកស្រី យក់ សម្បត្តិ ចុះផ្សាយថា៖ «ទោះបីជាមានអ្នកដំណើរពីក្រៅប្រទេសចូលមកកម្ពុជាកើនឡើងពី ១ ថ្ងៃទៅ ១ ថ្ងៃក៏ដោយ និងមានជើងហោះហើរពេលយប់ក្ដី ក្រុមមន្ដ្រីសុខាភិបាលរបស់យើងនៅតែបន្ដធ្វើការងារធ្វើតេស្ដពេញ ២៤ ម៉ោងដោយមិនរួញរាឡើយ មិនថាថ្ងៃ ឬយប់កណ្ដាលអធ្រាត្រនោះទេ គឺត្រូវធ្វើឱ្យហើយ និងយកចិត្ដទុកដាក់ខ្ពស់ ដើម្បីការពារទប់ស្កាត់ការរីករាលដាលកូវីដ ១៩»។
ចាប់ពីថ្ងៃទី ២០ ខែឧសភា មក រដ្ឋាភិបាលបានរឹតបន្តឹងបន្ថែមចំពោះអ្នកដំណើរមកពីក្រៅប្រទេសទាំងអស់ ដោយតម្រូវឲ្យធ្វើចត្តាឡីស័ក ១៤ ថ្ងៃ ខណៈដែលជំងឺកូវីដភាគច្រើនគឺជាករណីនាំចូល។
កម្ពុជាបានរកឃើញករណីឆ្លងសរុប ១៦៦ នាក់ ក្រោយពីនិស្សិតខ្មែរមកពីអារ៉ាប៊ី សាអ៊ូឌីតម្នាក់ត្រូវបានក្រសួងសុខាភិបាលប្រកាសនៅថ្ងៃម្សិលមិញថា បានឆ្លងជំងឺកូវីដ ១៩ និងធ្វើឱ្យចំនួននិស្សិតទាំង ៨០ នាក់ មកពីប្រទេសនេះចូលមកកម្ពុជាកាលពីថ្ងៃទី ១០ ខែកក្កដា កើនដល់ ២៥ នាក់ ត្រូវបានធ្វើតេស្ដវិជ្ជមាន។
លោក ហ៊ុន សែន បានសរសេរនៅលើហ្វេសប៊ុកនៅថ្ងៃព្រហស្បតិ៍ម្សិលមិញដែរថា ពលរដ្ឋត្រូវឧស្សាហ៍លាងសម្អាតដៃជាមួយសាប៊ូ ជែលសម្លាប់មេរោគ ឬទឹកអាល់កុល និងត្រូវពាក់ម៉ាស់ការពារឲ្យបានល្អហើយមិនត្រូវធ្វេសប្រហែសដោយសារតែកម្ពុជាមានករណីឆ្លងទាបនោះទេ។
លោកសរសេរថា៖ «ទីកន្លែងធ្វើអាជីវកម្មតូចធំ រួមទាំងផ្សាររដ្ឋ និងឯកជន តូបលក់អីវ៉ាន់តូចធំ ដេប៉ូចែកចាយ ហាងកាហ្វេ ភោជនីយដ្ឋាន ការដ្ឋានសំណង់ ទីកន្លែងកាត់សក់ ផ្ទះសំណាក់ សណ្ឋាគារ កាស៊ីណូ ដែលបានអនុញ្ញាត ធនាគារ និងកន្លែងប្តូរប្រាក់តូចធំ គ្លីនិកតូចធំ គ្លីនិកធ្មេញ មន្ទីរពេទ្យរដ្ឋ និងមន្ទីរពេទ្យឯកជនត្រូវតែមានជែលទឹកអាល់កុល និងម៉ាស់សម្រាប់ផ្តល់ជូនអតិថិជន ឬក្រុមគ្រួសារអ្នកជំងឺដើម្បីទប់ស្កាត់ការរីករាលដាលចម្លងរោគពីម្នាក់ទៅម្នាក់ ហើយត្រូវបន្តធ្វើតាមការណែនាំរបស់ក្រសួងសុខាភិបាលគ្រប់ពេល»។
ថ្វីដ្បិតរដ្ឋាភិបាលបានបញ្ជាក់ថា កម្ពុជានៅតែប្រឈមហានិភ័យទៅនឹងជំងឺកូវីដ ១៩ ពីក្រៅប្រទេសក្ដី ប៉ុន្តែកាលពីថ្ងៃទី ១៥ ខែកក្កដា លោក ហ៊ុន សែន បានចេញអនុក្រឹត្យប្រកាសជាផ្លូវការឱ្យមន្ត្រីរាជការ និយោជិត កម្មករ បានឈប់សម្រាកនៅថ្ងៃទី ១៧ ដល់ថ្ងៃទី ២១ ខែសីហា ខណៈលោកធ្លាប់លើកឡើងថា ការឈប់សម្រាកសងចូលឆ្នាំនេះ គឺអាចមានរយៈពេល ៩ ថ្ងៃ បើបូកទាំងថ្ងៃសៅរ៍ អាទិត្យចំនួន ៤ ថ្ងៃទៀត។
ជាមួយគ្នានេះក្រសួងការងារ និងបណ្ដុះបណ្ដាលវិជ្ជាជីវៈក៏បានចេញប្រកាសមួយដែរថា រោងចក្រ និងសហគ្រាសទាំងអស់ត្រូវបានប្រាក់ឈ្នួលសម្រាប់កម្មករដែលត្រូវឈប់សម្រាកពីថ្ងៃទី ១៧ ដល់ថ្ងៃទី ២១ ខែសីហា ប៉ុន្តែចំពោះរោងចក្រ និងសហគ្រាសដែលមិនអាចឱ្យកម្មករទាំងអស់ឈប់សម្រាកព្រមគ្នាក្នុងពេលតែមួយបាន គឺខាងនិយោជកត្រូវតែរៀបចំបែងចែកឱ្យកម្មករបានឈប់សម្រាកតាមកាលបរិច្ឆេទនេះ ដោយផ្លាស់ប្ដូរវេនគ្នា។
សេចក្ដីប្រកាសសរសេរថា៖ «ក្នុងករណីមានការព្រមព្រៀងគ្នារវាងកម្មករនិយោជិតសាម៉ី និងនិយោជក ឬមានចែងក្នុងបទបញ្ជាផ្ទៃក្នុងរបស់រោងចក្រ សហគ្រាស ឬអនុសញ្ញារួម។ ការឈប់សម្រាកនេះអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកដូចមានកំណត់នៅក្នុងប្រកាសនេះ»៕
