.jpg)
ក្មេងរងគ្រោះត្រូវរន្ទះបាញ់ស្លាប់ពេលកំពុងលេងបាល់ នៅខេត្តរតនគិរី។ សហការី
ភ្នំពេញៈ ករណីរន្ទះបាញ់ក្នុងរយៈពេលប្រមាណ ២ សប្ដាហ៍កន្លងមកនេះ បានសម្លាប់មនុស្សក្មេង-ចាស់ ប្រុស-ស្រីសរុប ១៣ នាក់ និង ១២ នាក់ទៀតបានរងរបួស។ ចំនួននេះ បានធ្វើឲ្យកំណើនអ្នកស្លាប់ដោយករណីរន្ទះបាញ់កើនឡើងរហូតដល់ ៥៩ នាក់ និងអ្នករងរបួសកើនឡើងរហូតដល់ ៥៦ នាក់ នៅក្នុងឆ្នាំ ២០១៩ នេះ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងកាលពីម្សិលមិញថា ខណៈរដូវបង្កបង្កើនផលបានមកដល់ ប្រជាកសិករបាននាំគ្នាធ្វើការភ្ជួររាស់ធ្វើស្រែចម្ការ និងដាំដុះដំណាំរួមផ្សំផ្សេងទៀត សម្រាប់ផ្គត់ផ្គង់ជីវភាពគ្រួសាររបស់ពួកគ។ ប៉ុន្តែការបំពេញការងារដាំដុះក្នុងអំឡុងពេលមានភ្លៀងធ្លាក់ គឺជាហានិភ័យមួយ សម្រាប់ពួកគាត់ជាកសិករ ព្រោះក្នុងអំឡុងពេលមានភ្លៀងធ្លាក់ បាតុភូតរន្ទះបាញ់ក៏កើតមានផងដែរ ជាក់ស្ដែងក្នុងរយៈពេល ២ សប្ដាហ៍កន្លងមកនេះ បាតុភូតភ្លៀងខ្យល់លាយឡំនឹងផ្គររន្ទះបានសម្លាប់ប្រជាពលរដ្ឋ ១៣ នាក់ និង ១២ នាក់ទៀតរងរបួស ព្រមទាំងបានសម្លាប់គោក្របីចំនួន ១៧ ក្បាល។
លោកបានបញ្ជាក់ថា៖ «តួលេខនេះ បានធ្វើឲ្យចំនួនអ្នកស្លាប់ដោយករណីរន្ទះបាញ់ នៅក្នុងរយៈពេលជាង ៥ ខែដើមឆ្នាំ ២០១៩ គិតត្រឹមថ្ងៃចន្ទ [ម្សិលមិញ] កើនឡើងរហូតដល់ ៥៩ នាក់ និងអ្នករងរបួសកើនឡើងរហូតដល់ ៥៦ នាក់ ខណៈចំនួនគោក្របី ដែលបានងាប់ដោយករណីរន្ទះបាញ់បានកើនដល់ ៨០ ក្បាល»។
ជាមួយគ្នានេះ លោកបានអំពាវនាវឲ្យពលរដ្ឋបង្កើនការប្រុងប្រយ័ត្ន ចំពោះបាតុភូតផ្គររន្ទះ និងហាមប្រាមពលរដ្ឋប្រើប្រាស់ឧបករណ៍អេឡិចត្រូនិកដែលរួមមានទូរស័ព្ទ វិទ្យុទាក់ទង វិទ្យុ-ទូរទស្សន៍ និងគ្រឿងប្រដាប់ប្រើប្រាស់ផ្សេងទៀតដែលធ្វើពីលោហធាតុដែលងាយចម្លងចរន្តអគ្គិសនីនៅក្នុងទីវាលពេលមេឃកំពុងភ្លៀង។
កាលពីថ្ងៃសុក្រសប្ដាហ៍មុន មនុស្ស ៤ នាក់ បានស្លាប់ និង ៤ នាក់ទៀត បានរងរបួស ដោយសារករណីរន្ទះបាញ់ ក្នុងខេត្តចំនួន ៣ ផ្សេងគ្នា ក្នុងនោះខេត្តរតនគិរី សិស្ស ២ នាក់ បានស្លាប់ និងម្នាក់ទៀតរងរបួស ខណៈនៅខេត្តក្រចេះស្ត្រី ៣ នាក់ម្ដាយ និងកូន បានរងរបួសធ្ងន់ស្រាល និងនៅខេត្តសៀមរាបយុវជន ៣ នាក់បានស្លាប់។
លោក ក្លុល ធឿង អធិការស្រុកលំផាត់ បានប្រាប់ភ្នំពេញប៉ុស្តិ៍ថា ខណៈកំពុងលេងទាត់បាល់ក្នុងទីធ្លាសាលារៀន ស្រាប់តែមានភ្លៀងខ្យល់ និងផ្គររន្ទះកើតឡើង បណ្ដាលឲ្យយុវសិស្ស ២ នាក់ រួមមានឈ្មោះ យំ ថាយ អាយុ ១១ ឆ្នាំ និង លេង គឹមហ៊ អាយុ ១៨ ឆ្នាំ បានស្លាប់នៅនឹងកន្លែង និងម្នាក់ទៀតឈ្មោះ ធ្វើន រ៉េន អាយុ ១៤ ឆ្នាំ បានរងរបួសធ្ងន់។
លោកបញ្ជាក់ថា៖ «បាតុភូតធម្មជាតិរន្ទះបាញ់នេះ កំពុងរាំងស្ទះដល់ការសិក្សាផ្នែកអប់រំកាយ និងកីឡារបស់សិស្សនៅក្នុងស្រុករបស់យើង»។
ចំណែកនៅឯខេត្តក្រចេះ អ្នកស្រី ប៉ិច ចន្ធូ អាយុ ៣៣ ឆ្នាំ និងកូនស្រីរបស់គាត់ ២ នាក់ទៀត ត្រូវបានរន្ទះបាញ់ឲ្យរងរបួសធ្ងន់ ខណៈពួកគាត់កំពុងមើលទូរទស្សន៍នៅលើគ្រែក្រោមផ្ទះពេលមេឃកំពុងភ្លៀង។ នេះបើយោងតាម លោក ប៊ុន ឈឿន អធិការស្រុកសំបូរ។
ចំណែកលោក ចាន់ សុធា នាយសេនាធិការនគរបាលក្រុងសៀមរាប បាននិយាយថា បុរស ២ នាក់ រួមមានឈ្មោះ សាយ ប៊ុនតាន់ អាយុ ៣៣ ឆ្នាំ ជាអ្នកលក់ទឹកសុទ្ធ នៅភូមិត្រៀក សង្កាត់-ក្រុងសៀមរាប ខេត្តសៀមរាប និងម្នាក់ទៀតឈ្មោះ ទៀង សំបូរ អាយុ ២៧ ឆ្នាំ ជាអ្នករកស៊ីបេះឈូកលក់ មានទីលំនៅក្នុងខេត្តបាត់ដំបង ត្រូវបានរន្ទះបាញ់ស្លាប់កាលពីរសៀលថ្ងៃសុក្រ ខណៈពួកគេកំពុងជ្រកភ្លៀង នៅក្រោមដើមឈើធំមួយដើម ស្ថិតនៅភូមិអារញ្ញ សង្កាត់សៀមរាប ក្រុងសៀមរាប៕
