ភ្នំពេញ៖ គិតត្រឹមថ្ងៃទី ១៨ ខែមេសា ក្រុមហ៊ុនផ្សារកសិផលធម្មជាតិ ឡេង ណាវ៉ាត្រា បានលក់អង្ករក្នុងតម្លៃថោក និងដឹកដល់ផ្ទះរបស់ពលរដ្ឋក្នុងរាជធានីភ្នំពេញ ដែលកំពុងស្ថិតក្នុងការបិទខ្ទប់បានជាង ១០០ តោន ខណៈការបញ្ជាទិញរបស់ប្រជាពលរដ្ឋមកកាន់ក្រុមហ៊ុននេះ មានរហូតដល់ ៣៤ ៩២២ គ្រួសារ។
លោក សុខ ដារ៉ាវុធ អ្នកគ្រប់គ្រងទូទៅរបស់ក្រុមហ៊ុន ឡេង ណាវ៉ាត្រា បានប្រាប់ ភ្នំពេញ ប៉ុស្តិ៍ នៅថ្ងៃនេះថា មានពលរដ្ឋជាង ៣ ម៉ឺនគ្រួសារហើយ ដែលបានបញ្ជាទិញអង្ករពីក្រុមហ៊ុនតាមរយៈការខមមិនទិញពីបណ្តាញសង្គមហ្វេសប៊ុក។
លោកថា បើគិតជាមធ្យមក្នុងមួយគ្រួសារ ត្រូវបញ្ជាទិញបីបាវនោះ ក្រុមហ៊ុនត្រូវត្រៀមអង្ករយ៉ាងហោចណាស់ ៦ ០០០ តោន។
លោកបន្ថែមថា ដោយសារតែក្នុងពេលនេះ ក្រុមហ៊ុនទើបតែបានប្រមូលទិញអង្ករបន្តពីគ្រប់ទិសទីបានមួយចំនួនប៉ុណ្ណោះ ហើយអង្ករដែលបានដឹកមកដល់រាជធានីភ្នំពេញក៏បានបញ្ចូនទៅដល់ផ្ទះរបស់ប្រជាពលរដ្ឋជាង ១០០ តោន រួចមកហើយដែរ ខណៈក្រុមការងារបានបន្តដឹកអង្ករនេះ ជាបន្តបន្ទាប់ទៀត ដើម្បីឲ្យប្រាកដថា ពលរដ្ឋដែលបានបញ្ជាទិញ គឺនឹងទទួលបានអង្ករគ្រប់ៗគ្នា។
លោកបញ្ជាក់ថា ៖«យើងដឹកអង្ករជូនពលរដ្ឋបណ្តើរៗហើយ តែឥឡូវមិនទាន់បានគ្រប់គ្នា ព្រោះតែអ្នកបញ្ជាទិញវាច្រើន សូមអធ្យាស្រ័យ។ ដោយសារតែមើលឃើញពីកង្វះខាតអង្ករនេះ ផ្សារកសិផល ឡេង ណាវ៉ាត្រា នឹងបន្តធ្វើទៅមុខរហូត ហើយយើងលក់នេះ មិនធ្វើតែក្នុងរយៈពេលខ្លីទេ គឺរយៈពេលវែងតែម្តង សូមកុំបារម្ភ»។
បើតាមការប្រកាសរបស់ទំព័រហ្វេសប៊ុករបស់លោក ឡេង ណាវ៉ាត្រា បានឲ្យដឹងថា ផ្សារកសិផល ឡេង ណាវ៉ាត្រា នឹងលក់អង្ករដែលបានប្រមូលទិញពីគ្រប់ទិសទីចេញវិញក្នុងតម្លៃ ៣៨០ ដុល្លារ ក្នុងមួយតោន គឺខាត ៤០ ដុល្លារក្នុងមួយតោន ដើម្បីជួយសម្រួលដល់បងប្អូនជនរួមជាតិក្នុងគ្រាដ៏លំបាកនេះ។
ទំព័រហ្វេសប៊ុកដដែលនេះ បានបន្តទៀតថា ការលក់ចេញនេះ គឺពលរដ្ឋដែលរស់នៅរាជធានីភ្នំពេញ អាចកុម្ម៉ង់ទិញបានក្នុងមួយគ្រួសារ ត្រឹមតែ ៦ បាវស្មើនឹង ៣០០ គីឡូក្រាមប៉ុណ្ណោះ ហើយមិនអាចទិញលក់បន្ដទេ ដោយមួយបាវ ៥០ គីឡូ មានតម្លៃ ១៩ ដុល្លារ ឬស្មើនឹង ៧៦ ០០០ រៀល៕