ភ្នំពេញ: អ្នកជំនាញ និងអង្គការសង្គមស៊ីវិលដែលធ្វើការពាក់ព័ន្ធនឹងសុខភាពបានលើកឡើងកាលពីម្សិលមិញថា ពលរដ្ឋកម្ពុជាដែលស្លាប់ដោយសារការជក់បារីជិត ១ ម៉ឺននាក់ ខណៈនៅលើពិភពលោកមានអ្នកស្លាប់មាន ៧ លាននាក់ក្នុងនោះ ៦ សែននាក់ស្លាប់ដោយស្រូបផ្សែងបារីពីអ្នកដទៃក្នុង ១ ឆ្នាំៗ។
ការបង្ហាញតួលេខនេះបានធ្វើឡើងក្នុងកម្មវិធីបង្ហាញលទ្ធផលស្រាវជ្រាវស្ដីពី«ការលើកទឹកចិត្តរបស់ក្រុមហ៊ុនចំពោះការលក់បារី និងការផ្សព្វផ្សាយពាណិជ្ជកម្មថ្នាំជក់» នៅមជ្ឈមណ្ឌលមិត្តភាពកម្ពុជា-កូរ៉េ (CKCC) ដើម្បីជំរុញឲ្យចូលរួមលុបបំបាត់ការប្រើប្រាស់ផលិតផលថ្នាំជក់ដើម្បីលើកកម្ពស់សុខភាពសាធារណៈ និងបរិស្ថាន ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានថ្លែងថាក្នុង ១ ឆ្នាំៗមានអ្នកស្លាប់ដោយការជក់បារីចំនួន ៧ លាននាក់លើពិភពលោកក្នុងនោះមាន ៦ សែននាក់ស្លាប់ដោយការស្រូបផ្សែងពីអ្នកដទៃ។
ចំណែកនៅកម្ពុជាមានអ្នកស្លាប់ប្រមាណជិត ១ ម៉ឺននាក់ក្នុង ១ ឆ្នាំដោយក្នុង ១ ថ្ងៃមានអ្នកស្លាប់ពី ៣០ ទៅ ៤០ នាក់។
លោកវេជ្ជបណ្ឌិតបន្តថាតាមរយៈការស្រាវជ្រាវពី ១ ឆ្នាំទៅ ១ ឆ្នាំតួលេខអ្នកស្លាប់ដោយសារបារីមិនសូវខុសគ្នាប៉ុន្មានទេ ព្រោះមានការខិតខំប្រឹងប្រែងរួមគ្នាពីអង្គការសង្គមស៊ីវិល និងរដ្ឋាភិបាលធ្វើឲ្យអត្រាលក់បារីថយចុះ ប៉ុន្ដែចំនួនអ្នកជក់មិនបានថយទេ ដោយសារកំណើនប្រជាជន។
លោក គង់ បានបញ្ជាក់ថា៖ «អ៊ីចឹងចំនួនអ្នកជក់ក៏នៅដដែល និងចំនួនអ្នកស្លាប់ក៏នៅប្រហែលគ្នានេះដែរ។ អ្នកជក់បានបណ្ដាលឲ្យមានជំងឺប្រចាំកាយជាច្រើនមុខ ប៉ុន្ដែយើងផ្ដោតលើជំងឺ ៥ មុខសិន ព្រោះវាតែងតែកើតលើអ្នកជក់បារី និងអ្នកស្រូបផ្សែងបារីមានដូចជា ជំងឺមហារីកសួត ដាច់សរសៃឈាមខួរក្បាល ជំងឺត្បៀតទងសួតរ៉ាំរ៉ៃ ត្បៀតសរសៃឈាម និងហើមសួត ជាដើម»។
លោក ផាន់ ចាន់ពៅ ប្រធានដេប៉ាតឺម៉ង់ចិត្តវិទ្យានៃសាកលវិទ្យាល័យភូមិន្ទភ្នំពេញបានថ្លែងថា ថ្នាំជក់គឺជាផលិតផលតែមួយគត់ដែលធ្វើឲ្យអ្នកប្រើពាក់កណ្ដាលស្លាប់មុនអាយុ ហើយភាគីក្រុមហ៊ុននៅតែបន្តផ្សព្វផ្សាយការលក់ និងជំរុញការលក់បារីឲ្យមានសម្ទុះកាន់តែខ្លាំងដោយស្ទើរគ្រប់ក្រុមហ៊ុនថ្នាំជក់នៅកម្ពុជាបានផ្ដល់រង្វាន់លើកទឹកចិត្តដល់អ្នកជក់បារីដូចជា ប្រាក់ឧបត្ថម្ភ សម្ភារប្រើប្រាស់ វត្ថុអនុស្សាវរីយ៍ បារី និងការលើកទឹកចិត្តផ្សេងទៀតដល់ក្រុមអ្នកលក់បារី។
យ៉ាងណាក្ដីលោកថារហូតមកទល់ពេលនេះគ្មានក្រុមហ៊ុនថ្នាំជក់ណាមួយបានបង្ហាញពីការចំណាយលើការផ្សព្វផ្សាយពាណិជ្ជកម្មទេ។ ចាប់តាំងកម្ពុជាអនុម័តច្បាប់ស្ដីពីការគ្រប់គ្រងផលិតផលថ្នាំជក់កាលពីឆ្នាំ ២០១៥ ការផ្សព្វផ្សាយពាណិជ្ជកម្មថ្នាំជក់ ការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហកម្មថ្នាំជក់ត្រូវបានហាមឃាត់។
លោកថា៖ «ក្រោយពីច្បាប់ហាមឃាត់នេះចេញមកក្រុមហ៊ុនបានបង្វែរជាការផ្ដល់រង្វាន់ដល់អ្នកលក់បារីវិញម្ដងក្នុងគោលបំណងដូចគ្នាគឺបង្កើនការលក់ផលិតផលថ្នាំជក់របស់ខ្លួនឲ្យប្រសើរឡើងដែលជាឧបសគ្គរារាំងដល់ការកាត់បន្ថយចំនួនពលរដ្ឋដែលស្លាប់ ពិការ និងកើតជំងឺបណ្ដាលមកពីការប្រើប្រាស់ផលិតផលថ្នាំជក់»។
ចំណែកតំណាងអង្គការសុខភាពពិភពលោកប្រចាំកម្ពុជាលោកវេជ្ជបណ្ឌិត យ៉ិល ដារ៉ាវុធ បានឲ្យដឹងថាអង្គការសុខភាពពិភពលោកនៅតែអំពាវនាវឲ្យរដ្ឋាភិបាលកម្ពុជា អនុម័ត និងអនុវត្តដោយមិនពន្យារពេលលើបទដ្ឋានគតិយុត្ត ដែលទាមទារឲ្យមានសារព្រមានជារូបភាពមានទំហំធំលើកញ្ចប់បារីដោយអនុលោមតាមមាត្រា ១១ នៃអនុសញ្ញាស្តីពីការត្រួតពិនិត្យថ្នាំជក់។
លោកបន្តថាបើតាមការសង្កេតកន្លងមកឃើញថា អត្រាសិស្សគិតពីអាយុត្រឹម ១៣ ទៅ ១៥ ឆ្នាំដែលចេះជក់បារីបានធ្លាក់ចុះប្រហែល ២ ភាគរយ និងអាយុចាប់ពី ១៥ ឆ្នាំឡើងទៅមានជាង ៣៥ ភាគរយ។
លោកថា៖ «ខ្ញុំគ្រាន់តែចង់ជម្រាបថា ហេតុអ្វីអ្នកជក់បារីបានជក់ម្ដងហើយ ម្ដងទៀត? ព្រោះក្នុងផ្សែងបារីមានជាតិគីមីជាង ៧ ពាន់ប្រភេទ ប៉ុន្ដែមានសារជាតិម្យ៉ាងធ្វើឲ្យយើងចង់ជក់ម្ដងហើយ ចង់ជក់បន្តទៀត...អាហ្នឹងគេហៅថា សារជាតិញៀនដែលយើងមិនបានដឹង»។
លោកវេជ្ជបណ្ឌិត ដារ៉ាវុធ បានបន្ថែមថារដ្ឋាភិបាល អ្នកជំនាញ និងអង្គការសង្គមស៊ីវិលដែលធ្វើការពាក់ព័ន្ធនឹងសុខភាព គួរបើកវគ្គបំប៉នដល់អាជ្ញាធរ និងមន្ត្រីពាក់ព័ន្ធដើម្បីឲ្យពួកគេមានចំណេះដឹងយកទៅអប់រំពីផលបះពាល់នៃការប្រើប្រាស់ថ្នាំជក់នេះបន្តនៅតាមកន្លែងអាជីវកម្មនីមួយៗ។
លោកស្រី ឱ វណ្ណឌិន អគ្គនាយកបច្ចេកទេសសុខាភិបាល និងជាអ្នកនាំពាក្យនៃក្រសួងសុខាភិបាល និងលោក ឡូ វាសនាគិរីប្រធាននាយកដ្ឋានផែនការ និងព័ត៌មានសុខាភិបាលបានបដិសេធធ្វើអត្ថាធិប្បាយដោយពួកគាត់អះអាងថា កំពុងរវល់ប្រជុំកាលពីម្សិលមិញ៕