.jpg)
ក្មេងជំទង់ចូលសម្រាកនៅមន្ទីរពេទ្យ ក្រោយពុលត្រីខកំប៉ុង។ រូបថត ប៉ូលិស
រតនគិរី៖ អធិការនគរបាលស្រុកអូរយ៉ាដាវ ខេត្តរតនគិរី លោក សូយ សំណាង បានឱ្យដឹងនៅរសៀលថ្ងៃទី ២ មេសានេះថា ក្មេងជំទង់ចំនួន ៧ នាក់នៅថ្ងៃនេះ ត្រូវបានគ្រូពេទ្យអនុញ្ញាតឲ្យចេញពីមន្ទីរពេទ្យស្រុកវិញហើយ បន្ទាប់ពីចូលព្យាបាលក្រោយបរិភោគត្រីខកំប៉ុង ហើយពុលកាលពីថ្ងៃទី ១ ខែមេសា នៅភូមិភិឃុំសេសាន ស្រុកអូរយ៉ាដាវ។
លោកវរសេនីយ៍ឯក សូយ សំណាង បានឱ្យដឹងថា ក្មេងទាំង ៧ នាក់នោះ ទី១-ឈ្មោះ សល់ ព្រំ ភេទ ប្រុស អាយុ ១២ ឆ្នាំ, ទី២-ឈ្មោះ សល់ សេ ភេទ ប្រុស អាយុ ១៣ ឆ្នាំ, ទី៣-ឈ្មោះ សល់ ដានី ភេទ ស្រី អាយុ ១១ ឆ្នាំ, ទី៤-ឈ្មោះ សល់ ញូង ភេទ ប្រុស អាយុ ១៣ ឆ្នាំ, ទី៥-ឈ្មោះ សេវ លីន ភេទ ស្រី អាយុ ១៤ ឆ្នាំ, ទី៦-ឈ្មោះ សល់ ឡេស ភេទ ប្រុស អាយុ ១៥ ឆ្នាំ និងទី៧-ឈ្មោះ សល់ សី ភេទប្រុស អាយុ ១៦ឆ្នាំ។ ពួកគេទាំងអស់គ្នារស់នៅភូមិឃុំកើតហេតុខាងលើ។
លោក សូយ សំណាង បានបន្តថា តាមការសាកសួរ ករណីនេះ គឺពួកគេបានហូបត្រីខជាមួយបាយជុំគ្នាជាមួយបងប្អូនបង្កើត និងបងប្អូនជីដូននៅចម្ការនាពេល
រសៀល។ លុះក្រោយមកពួកគេមាន អាការវិលមុខ ក្អួតចង្អោរ ហើយត្រូវបានក្រុមគ្រួសារយកទៅមន្ទីរពេទ្យស្រុកអូរយ៉ាដាវ។
លោកបានបញ្ជាក់ថា៖ «ទាំងក្រុមគ្រូពេទ្យទាំងសមត្ថកិច្ចមិនបានឃើញសម្បកកំប៉ុងនោះទេ តែខាងកាំកុងត្រូលដែលចុះអង្កេតដែរគាត់ប្រាប់ខ្ញុំថា ត្រីខកំប៉ុងបើកាលណាទុកវាចោលត្រូវថ្ងៃខ្លាំង គឺវាខូចគុណភាព និងបង្កបញ្ហាដល់សុខភាព»។
ទោះជាយ៉ាងណា លោក សំណាង បានឱ្យដឹងថា ឥឡូវនេះពួកគេត្រូវបានគ្រូពេទ្យអនុញ្ញាតឱ្យចេញពីមន្ទីរពេទ្យវិញហើយ បន្ទាប់ពីបានធូរស្រាលឡើងវិញ៕
