ភ្នំពេញៈ នគរបាលសង្កាត់ជ្រោយចង្វារកាលពីម្សិលមិញបានស្រាវជ្រាវឃាត់ខ្លួនក្មេងទំនើង ២ នាក់ ក្រោយពីពួកគេជិះម៉ូតូឌុបគ្នាតាមផ្លូវសាធារណៈ និងយកដៃវាយក្បាលបុរសបរទេសម្នាក់ដែលកំពុងជិះកង់ស្របទិសគ្នា ហើយរូបភាពនោះត្រូវបានបង្ហោះតាមបណ្តាញសង្គមហ្វេសប៊ុក។
លោក ចាន់ ប៊ុនធឿន នាយនគរបាលប៉ុស្តិ៍សង្កាត់ជ្រោយចង្វារបានប្រាប់ឱ្យដឹងកាលពីម្សិលមិញថា ជនសង្ស័យឈ្មោះ លឹម ហុងឡេង អាយុ ១៨ ឆ្នាំ ជាសិស្សថ្នាក់ទី ១១ និងរស់នៅផ្ទះជួលក្នុងភូមិកៀនឃ្លាំងសង្កាត់-ខណ្ឌជ្រោយចង្វារ និងម្នាក់ទៀតឈ្មោះ រិទ្ធ ចាន់តារា អាយុ ១៧ ឆ្នាំ គ្មានមុខរបរពិតប្រាកដស្នាក់នៅបន្ទប់ជួលនៅភូមិ ១ សង្កាត់-ខណ្ឌជ្រោយចង្វាររាជធានីភ្នំពេញ។
លោកបន្តថា នគរបាលបានកំណត់អត្តសញ្ញាណបានក្នុងបណ្តាញសង្គមហ្វេសប៊ុកបន្ទាប់ពីទទួលបញ្ជាពីថ្នាក់លើឱ្យចាត់កម្លាំងនគរបាលតាមស្រាវជ្រាវរហូតចាប់បានជនសង្ស័យ។
លោកថ្លែងថា៖ «ជនសង្ស័យទាំង ២ នាក់ សមត្ថកិច្ចខ្ញុំបានបញ្ជូនបន្តទៅអធិការដ្ឋាននគរបាលខណ្ឌឫស្សីកែវចាត់ការបន្តហើយ។ ចំពោះនីតិវិធី ឬចំណាត់ការបន្តយ៉ាងណាទៀតនោះជាសមត្ថកិច្ចរបស់ខណ្ឌ»។
លោក ចាន់ ប៊ុនធឿន បញ្ជាក់ថាក្រុមជនសង្ស័យ មុនបង្កហេតុពួកគេបាននាំគ្នាផឹកស្រាបៀររហូតស្រវឹង។ បន្ទាប់មកពួកគេបានជិះម៉ូតូ ១ គ្រឿង ចេញពីកន្លែងផឹកស៊ីហើយចៃដន្យពេលកំពុងជិះម៉ូតូ ក៏ឃើញបុរសជនបរទេសម្នាក់ដែលក្បាលកោរត្រងោល កំពុងជិះកង់ស្របទិសគ្នា។ ម្នាក់ក្នុងចំណោមពួកគេបានលើកដៃទះក្បាលបុរសនោះមួយទំហឹងហើយគ្នីគ្នាពួកគេ ២ ទៅ ៣ នាក់ទៀតចាំថតសកម្មភាពយកទៅបង្ហោះ។
លោក ឯក សេរីវុធ អធិការរងទទួលផែនព្រហ្មទណ្ឌនៃអធិការដ្ឋាននគរបាលខណ្ឌឫស្សីកែវ បានឱ្យដឹងថា លោកកំពុងចាត់ការក្នុងរឿងនេះ៕