.jpg)
ក្រុមក្មេងទំនើង ដែលបង្កហិង្សា។ រូបថត ស្នងការដ្ឋាននគរបាលខេត្តបាត់ដំបង
បាត់ដំបង: ស្នងការដ្ឋាននគរបាលខេត្តបាត់ដំបងបានបញ្ជូនក្រុមក្មេងទំនើងប្រើដាវកាប់គ្នាចំនួន ៦ នាក់ទៅសាលាដំបូងខេត្តបាត់ដំបងនៅថ្ងៃចន្ទនេះបន្ទាប់ពីសមត្ថកិច្ចចាប់ខ្លួនបាន នៅក្នុងភូមិរំចេក សង្កាត់រតនៈក្រុង-ខេត្តបាត់ដំបង កាលពីថ្ងៃទី ២៩ មីនា។
លោក ជេត វណ្ណនី ស្នងការរងទទួលផែនព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបាត់ដំបងបានឲ្យដឹងកាលពីម្សិលមិញថា ជនសង្ស័យ ១-ឈ្មោះ ជ័យ សុផាត ភេទប្រុសអាយុ ២១ ឆ្នាំ (ជនដៃដល់) ២-ឈ្មោះ វឿន សុខផេង ភេទប្រុសអាយុ ១៩ ឆ្នាំ (ជនដៃដល់) ៣-ឈ្មោះ ចិត្ត រក្សា ហៅវិបុត្រ ភេទប្រុស អាយុ ១៧ ឆ្នាំ ៤-ឈ្មោះ រ៉ាត់ ធារ៉ា ភេទប្រុស អាយុ ១៨ ឆ្នាំ ៥-ឈ្មោះ សាន្ត សារិទ្ធិ ភេទប្រុស អាយុ ១៦ ឆ្នាំ ៦-ឈ្មោះ ណាន យ៉ារ៉ាហ្វាត់ ភេទប្រុសអាយុ ១៥ ឆ្នាំ។
លោកប្រាប់ថា៖ «ខ្ញុំបញ្ជូនពួកគេទៅតុលាការមិនទាន់ទេនៅថ្ងៃអាទិត្យ ប៉ុន្តែនៅក្នុងកំណត់ហេតុខ្ញុំបានចោទពួកគេពីបទហិង្សាដោយចេតនាមានស្ថានទម្ងន់ទោស។ពួកគេទាំង ៦ នាក់បានកាប់លើជនរងគ្រោះ ២ នាក់របួសធ្ងន់»។
លោករំឭកប្រាប់ថា ករណីទំនាស់ឈានទៅកាប់ចាក់គ្នានេះដោយពួកគេទាំង ២ ក្រុមដែលមួយក្រុមៗមានគ្នាពី ៦ ទៅ ១០ នាក់នោះមានគំនុំជាមួយគ្នាយូរមកហើយ។ លុះដល់ពេលដើរជួបគ្នាទាំង ២ ភាគីបានទាស់ពាក្យសម្តីគ្នាហើយក៏វាយកាប់ចាក់គ្នាតែម្តងទៅដែលហេតុការណ៍កើតឡើងកាលពីយប់រំលងអា្រធាត្រថ្ងៃទី ២៩ មីនា ឆ្នាំ ២០១៩ នៅភូមិ-សង្កាត់កើតហេតុខាងលើ។
ក្រោយបង្កហេតុភាគីខាងជនបង្កបានព្យាយាមរត់គេចខ្លួនប៉ុន្តែដោយសារសមត្ថកិច្ចដាក់កម្លាំងដើរល្បាតប្រចាំក្នុងមូលដ្ឋានក៏បានស្ទាក់ចាប់ជនសង្ស័យបានជាបន្តបន្ទាប់៕
