.jpg)
ក្មេងស្រីដែលរងរបួសដោយសារផ្ទុះគ្រាប់បេនៅខេត្តព្រះវិហារថ្ងៃទី ២៦ កក្កដា។ រូបថត CMAA
ព្រះវិហារៈ ក្មេងប្រុសអាយុ ៥ ឆ្នាំម្នាក់ ដែលត្រូវជាកូនបានស្លាប់ ខណៈក្មេងស្រី ២ នាក់ទៀត ដែលជាក្មួយរបួសធ្ងន់ ឯឪពុករងរបួសស្រាលក្នុងហេតុការណ៍ផ្ទុះគ្រាប់បេប្រភេទ ៤០ មិលី្លម៉ែត្រ ១ គ្រាប់ នៅភូមិស្រអែមខាងត្បូង ឃុំកន្ទួត ស្រុកជាំក្សាន្ត ខេត្តព្រះវិហារនៅថ្ងៃទី ២៦ កក្កដា ដោយសារក្មេងប្រុសរងគ្រោះយកគ្រាប់បេដែលឪពុករើសពីវាលស្រែមកដំលេងនៅក្នុងផ្ទះរបស់ខ្លួន។
លោក ឱ សេង អធិការនគរបាលស្រុកជាំក្សាន្ដថ្លែងពីម្សិលមិញថា ក្មេងម្នាក់ឈ្មោះ ម៉ាន ម៉ា អាយុ ៥ ឆ្នាំបានស្លាប់ និងក្មេងស្រី ២ នាក់ផ្សេងទៀតបានរងរបួសធ្ងន់ក្នុងហេតុការណ៍ផ្ទុះគ្រាប់បេប្រភេទ ៤០ មិល្លីម៉ែត្រ ១ គ្រាប់ស្ថិតនៅទីតាំងខាងលើនេះ។ ក្នុងនោះឪពុករបស់កុមាររងគ្រោះរងរបួសស្រាល ពេលដែលគាត់កំពុងដេកក្នុងអង្រឹងក្រោមផ្ទះដែរ។
លោកបន្តថា កុមារីទាំង ២ នាក់ដែលរងរបួសធ្ងន់ត្រូវបានក្រុមគ្រួសារ និងសមត្ថកិច្ចបញ្ជូនទៅមន្ទីរពេទ្យបង្អែកខេត្តព្រះវិហារភ្លាមៗ ក្រោយពីមានហេតុការណ៍នេះ។ ក្មេងស្រីម្នាក់ត្រូវចំកំភួនជើងខាងឆ្វេងត្រូវចំដៃ និងដាច់រលាត់លើដងខ្លួន រីឯកុមារីម្នាក់ទៀតត្រូវចំភ្លៅខាងស្ដាំ និងត្រូវចំទ្រូងធ្ងន់ធ្ងរ ខណៈបុរសឈ្មោះ សំ សាម៉ាន ដែលជាឪពុកក្មេងប្រុសខាងលើរងរបួសស្រាលដោយដាច់រលាត់ដៃតិចតួច។
លោក ឱ សេង បញ្ជាក់ថា៖ «ខ្ញុំអត់ទាន់បានទទួលព័ត៌មានអ្វីបន្ថែមជុំវិញស្ថានភាពរបួសរបស់កុមារីទាំង ២ នាក់នៅឡើយ។ ប៉ុន្ដែឪពុកម្ដាយគាត់កំពុងមើលថែនៅមន្ទីរពេទ្យហ្នឹងហើយ ហើយសមត្ថកិច្ចជំនាញយើងបានធ្វើកំណត់ហេតុនៅផ្ទះគាត់រួចរាល់ដែរ។ ពេលកើតហេតុភ្លាមៗហ្នឹងពួកខ្ញុំចុះទៅពិនិត្យមើលស្ថានភាពជាក់ស្ដែង និងសាកសួរសាក្សីនៅក្នុង [ហេតុការណ៍] នោះ»។
លោក ចាន់ ហ៊ុន នាយប៉ុស្ដិ៍នគរបាលរដ្ឋបាលឃុំកន្ទួត ស្រុកជាំក្សាន្ត ប្រាប់ពីម្សិលមិញថា ក្បាលគ្រាប់បេប្រភេទ ៤០ មិល្លីម៉ែត្រ ១ គ្រាប់នេះត្រូវបានឪពុកឈ្មោះ សំ សាម៉ាន រើសយកមកពីវាលស្រែរបស់ខ្លួនកាលពី ៣ ខែមុន ដោយបានដុតកម្ទេចចោលដែរ ប៉ុន្ដែមិនផ្ទុះ។ ក្រោយមកគាត់ក៏រើសយកមកទុកក្រោមផ្ទះរបស់ខ្លួន ស្រាប់តែថ្ងៃកើតហេតុនេះក្មេងៗដែលត្រូវជាកូន និងក្មួយៗរបស់គាត់ក៏រើសយកមកធ្វើក្បាលមេក្រូច្រៀងរាំលេងនៅក្រោមផ្ទះខ្លួន ហើយក្មេងប្រុសអាយុ ៥ ឆ្នាំក៏យកមកដំលេងបណ្ដាលឲ្យផ្ទុះតែម្តង។
លោកបន្តថា ជនរងគ្រោះដោយសារយកគ្រាប់មកដំលេងបណ្តាលឲ្យផ្ទុះស្លាប់ និងរងរបួសធ្ងន់ ស្រាលចំនួន ៤ នាក់នោះរួមមាន ទី១- កុមារា ម៉ាន ម៉ា អាយុ ៥ ឆ្នាំ (ស្លាប់ និងជាអ្នកដំគ្រាប់បេ) ទី២- កុមារី បូ ឃីម (របួសធ្ងន់) ទី៣- កុមារី ហេង ស្រីពៅ (របួសធ្ងន់) និងទី៤- ឪពុកឈ្មោះ សំ សាម៉ាន (របួសស្រាល)។ ក្មេងប្រុសដែលស្លាប់នោះគឺសាកសពត្រូវផ្ទុះដាច់សាច់ខ្ទាតចេញ ដោយឪពុកម្ដាយដើររើសសាច់យកមកធ្វើបុណ្យតាមប្រពៃណី។
លោកបញ្ជាក់ថា៖ «នៅតំបន់ឃុំកន្ទួត និងតំបន់មួយចំនួននៃស្រុកជាំក្សាន្តនេះ តែងតែមានពលរដ្ឋគ្រោះថ្នាក់ដោយសារគ្រាប់មីន និងគ្រាប់យុទ្ធភណ្ឌមិនទាន់ផ្ទុះ។ ព្រោះតំបន់យើងនេះជាកន្លែងសង្គ្រាមក្ដៅជាមួយសៀម ជាពិសេសគឺសម័យខ្មែរក្រហមគឺជាកន្លែងប្រយុទ្ធគ្នាខ្លាំងណាស់ ទើបសម្បូរសំណល់ជាតិផ្ទុះបែបនេះ»។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី ១ នៃអាជ្ញាធរមីនបានថ្លែងកាលពីថ្ងៃទី ១៤ កក្កដា ថា រាជរដ្ឋាភិបាលកម្ពុជាបានដាក់ចេញចក្ខុវិស័យ និងផែនការយុទ្ធសាស្ត្រយ៉ាងច្បាស់លាស់ក្នុងការបញ្ចប់ការគំរាមកំហែងដោយសារមីន និងសំណល់ជាតិផ្ទុះពីសង្គ្រាមនៅកម្ពុជា។ ការងារបោសសម្អាតនេះត្រូវការធនធានមនុស្ស សម្ភារ និងថវិកាជាច្រើនថែមទៀតទើបជំរុញការបោសសម្អាតបានរួចរាល់តាមផែនការកំណត់នៅឆ្នាំ ២០២៥។
លោកសំណូមពរដល់ប្រតិបត្តិករជាតិ អន្តរជាតិ និងភាគីពាក់ព័ន្ធត្រូវបន្តសហការចូលរួមអប់រំប្រជាពលរដ្ឋឲ្យបានចំគោលដៅ និងប្រកបដោយប្រសិទ្ធភាពអំពីការយល់ដឹងពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម។
លោកក៏បានស្នើឲ្យអាជ្ញាធរមូលដ្ឋាន ភូមិ ឃុំ ស្រុក ជួយធ្វើការអប់រំការយល់ដឹងអំពីមីន និងសំណល់ជាតិផ្ទុះពីសង្គ្រាមឲ្យបានទូលំទូលាយជាសាធារណៈនៅក្នុង និងក្រៅសហគមន៍របស់ខ្លួនដើម្បីចៀសវាងគ្រោះថ្នាក់ពីគ្រាប់ទាំងនោះជាយថាហេតុ៕
