ភ្នំពេញៈ ក្មេងប្រុសអាយុ ១២ ឆ្នាំម្នាក់ និងបុរសពេញវ័យ ២ នាក់ បានរងរបួសស្រាលដោយសាររលាកភ្លើង ក្រោយពីផ្ទុះគម្របស៊ីទែនស្តុកប្រេងសាំងក្រោមដីនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ កាលពីថ្ងៃទី ២២ មីនាកន្លងមកនេះ។
លោក ស៊ី ឌី អធិការនគរបាលក្រុងសេរីសោភ័ណបានថ្លែងឲ្យដឹងថា ក្មេងប្រុសរងគ្រោះឈ្មោះ សាន វីរៈពីទូ ភេទប្រុសអាយុ ១២ ឆ្នាំ ត្រូវភ្លើងរលាកជើងទាំងសងខាង ចំណែកឈ្មោះ គឺម ផ្លា ភេទប្រុសអាយុ ៤៩ ឆ្នាំ និងឈ្មោះ ឌុច ចាន់ហេង ភេទប្រុសអាយុ ២០ ឆ្នាំ រងរបួសស្រាល។ លោកបន្តថា មនុស្ស ៣ នាក់ត្រូវជាសាច់ញាតិក្នុងគ្រួសារតែមួយទេ។
លោក ងួន សុង៉ម អាយុ ៣៣ ឆ្នាំ ត្រូវជាឪពុកមារបស់ក្មេងរងគ្រោះបានរៀបរាប់ប្រាប់ថា ផ្ទះរបស់គាត់បានបើកហ្គារ៉ាសលក់ប្រេងឥន្ធនៈហើយកាលពីរសៀលថ្ងៃទី ២០ ខែមីនា នៅក្បែរផ្ទះរបស់គាត់មានអ្នកភូមិម្នាក់បានដុតសំរាមប៉ុន្តែដោយសារបាំងរបងថ្មធ្វើឲ្យគាត់មិនដឹង។ លុះភ្លើងដែលដុតសំរាមនោះបានប៉ើងមកចូលក្នុងដីរបស់គាត់ដែលផ្កាភ្លើងនោះបានប៉ើងទៅទើលើគម្របស៊ីទែនសាំងធ្វើឲ្យឆាបឆេះតែម្តង។
ពេលនោះក្មួយរបស់គាត់ដែលនៅក្បែរនោះត្រូវអណ្តាតភ្លើងសាំងឆាបឆេះរលាករបួសជើងតែមិនធ្ងន់ទេ ហើយឪពុករបស់គាត់ឈ្មោះ គឺម ផ្លា អាយុ ៤៩ ឆ្នាំ បានយកបំពង់ពណ៌ក្រហមដែលប្រើដើម្បីការពារអគ្គិភ័យទៅបាញ់ពន្លត់ឲ្យរលត់ភ្លាមៗដែរ។ លោកបន្តថាចំពោះក្មួយប្រុសរបស់លោកពេលនេះកំពុងសម្រាកព្យាបាលនៅមន្ទីរពេទ្យបង្អែក មិត្តភាពកម្ពុជា ជប៉ុន នៅស្រុកមង្គលបុរី ហើយស្ថានភាពរបួសមានសភាពធូរស្រាលទេព្រោះត្រូវភ្លើងរលាកស្រាលទេ៕