.jpg)
ក្មេងប្រុសម្នាក់ដែលសង្ស័យចាប់ក្មេងស្រីម្នាក់រំលោភសេពសន្ថវៈ នៅស្រុកស្អាង។
កណ្តាលៈ ក្មេងប្រុសម្នាក់ដែលសង្ស័យចាប់ក្មេងស្រីម្នាក់រំលោភសេពសន្ថវៈ នៅស្រុកស្អាង កាលពីថ្ងៃទី ៣០ មីនា ត្រូវបានស្នងការនគរបាលខេត្តកណ្តាល បញ្ជូនទៅសាលាដំបូងខេត្ត នៅរសៀលថ្ងៃទី ១ មេសា បើទោះបីជាឪពុកម្តាយទាំងសងខាងចង់ឲ្យមានការសម្របសម្រួលដោយថា កូនរបស់ពួកគេស្រឡាញ់គ្នាក្តី។
លោកស្រី ឈឹម វណ្ណនី ស្នងការរងទទួលផែនប្រឆាំងបទល្មើសជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកណ្តាលបានឲ្យដឹងកាលពីម្សិលមិញថា ក្មេងប្រុសដែលពាក់ព័ន្ធអំពើរំលោភសេពសន្ថវៈនេះ ឈ្មោះអៀង ភារិទ្ធ អាយុ ១៦ ឆ្នាំ រីឯក្មេងស្រីរងគ្រោះឈ្មោះ ញ.ស.អាយុ ១៦ ឆ្នាំដូចគ្នា ដែលអ្នកទាំង ២ ជាសិស្សសាលា។
លោកស្រីបន្តថា ក្មេងប្រុសសង្ស័យរូបនេះត្រូវសមត្ថកិច្ចខាងប្រឆាំងបទល្មើសជួញដូរមនុស្សខេត្តបញ្ជូនបន្តទៅសាលាដំបូងខេត្តហើយ ដើម្បីចាត់ការទៅតាមនីតិវិធី ប៉ុន្តែក្រុម គ្រួសារទាំងសងខាងក៏មានការសម្រុះសម្រួលគ្នាដែរ ប៉ុន្តែលោកស្រីគិតថា ជារឿងខុសទៅនឹងនីតិវិធីរបស់សមត្ថកិច្ច។
លោកស្រីថ្លែងថា៖ «រឿងនេះ ក្រុមគ្រួសារក្មេងទាំង ២ មកសុំសម្រុះសម្រួលគ្នានៅការិយាល័យខ្ញុំ ប៉ុន្តែខ្ញុំមិនអាចឲ្យពួកគាត់ធ្វើបែបនេះបានទេព្រោះខ្ញុំអនុវត្តតាមតួនាទីរបស់ខ្ញុំ។ រឿងនេះ បើគាត់មិនបានប្តឹងមកសមត្ថកិច្ចរបស់ខ្ញុំ ហើយគាត់ទៅសម្រុះសម្រួលគ្នានៅកន្លែងណាក៏ស្រេចតែពួកគាត់ ហើយពួកគាត់អះអាងថា ក្មេងទាំង ២ នាក់ជាបងប្អូនជីដូនមួយនឹងគ្នាផង ប៉ុន្តែនេះ គឺខាងគ្រួសារក្មេងរងគ្រោះប្តឹងមក ការិយាល័យខ្ញុំដូច្នេះខ្ញុំត្រូវតែអនុវត្តតាមច្បាប់»។
លោកស្រីស្នងការរងរំឭកប្រាប់តាមចម្លើយរបស់ក្មេងស្រីរងគ្រោះ និងជនសង្ស័យថា ករណីនេះ ពួកគេទាំង ២ នាក់បានលេងហ្វេសប៊ុក និងបានឆាតលេងជាមួយគ្នារហូតស្គាល់គ្នា។ ដោយសារពួកគេមានចិត្តស្រឡាញ់គ្នាទៅវិញទៅមកនិងដោយចង់និយាយគ្នាឃើញមុខគ្នាផ្ទាល់ផងនោះ មុនពេលកើតហេតុ ពួកគេក៏បានណាត់ជួបគ្នា និងរកទីតាំងនៅកន្លែងស្ងាត់ផង។
បើយោងតាមចម្លើយរបស់ក្មេងស្រីរងគ្រោះ និងដោយផ្អែកតាមចម្លើយរបស់ក្មេងប្រុសសង្ស័យ វាអាចឲ្យសមត្ថកិច្ចរបស់លោកស្រីយកជាសំអាងហេតុបាន ដែលជាប់ពាក់ព័ន្ធនឹងករណីរំលោភនេះ។
លោកស្រីបន្តថា លុះមុនថ្ងៃចាប់ខ្លួន នៅថ្ងៃទី ៣០ ខែ មីនា ឆ្នាំ ២០១៩ ពួកគេបានណាត់ជួបគ្នានៅភូមិមួយក្នុងស្រុកស្អាងខណៈពេលជួបគ្នានោះ ក្មេងស្រីរងគ្រោះបានទៅបត់ជើងតូច ហើយប្រហែលជនសង្ស័យគិតថា ជាឱកាសល្អក៏បានចាប់ក្មេងស្រីរងគ្រោះរំលោភសេពសន្ថវៈរហូតបានសម្រេចតែម្តង៕
