កំពង់ចាមៈ ក្មេងប្រុស និងស្រី ៤ នាក់ ដែលលង់ទឹកស្លាប់នៅក្នុងរណ្ដៅដីមួយកន្លែងនៅក្នុងភូមិបែកអន្លូង ឃុំអារក្សត្នោត ស្រុកស្ទឹងត្រង់ ខេត្តកំពង់ចាម កាលពីចុងសប្ដាហ៍កន្លងមកបន្ទាប់ពីពួកគេបានចុះទៅលេងនៅក្នុងនោះដោយមិនចេះហែលទឹក។
លោក ប៉ាក ជាតិ អធិការនគរបាលស្រុកស្ទឹងត្រង់បានឲ្យដឹងដោយយោងតាមសម្តីក្មេង ២ នាក់ ដែលទៅជាមួយក្មេងរងគ្រោះថា កាលពីព្រឹកថ្ងៃទី ៨ មិថុនា ក្មេងរងគ្រោះបាននាំគ្នាទៅរើសគ្រាប់ស្វាយចន្ទីនៅចម្ការស្វាយចន្ទីមួយត្រង់ចំណុចគីឡូ ៦ ស្ថិតក្នុងភូមិ-ឃុំខាងលើដែលមានចម្ងាយពីភូមិប្រហែល ១ ៥០០ ម៉ែត្រ។ បន្ទាប់ពីនាំគ្នារើសគ្រាប់ស្វាយចន្ទីបានហើយក៏ត្រឡប់មកផ្ទះវិញ ប៉ុន្តែដោយពួកគេចង់ងូតទឹកក៏នាំគ្នាចុះងូតទឹកក្នុងរណ្តៅដីដែលគេជីកសម្រាប់ទុកទឹកស្រោចស្វាយចន្ទី។
លោកបន្តថា ក្នុងចំណោមក្មេង ៦ នាក់ មាន ២ នាក់ មិនបានចុះងូតទឹកទេហើយមួយសន្ទុះក្រោយមកក្មេងដែលនៅលើគោកក៏ឃើញគ្នាគេទាំង ៤ នាក់ លើកដៃវ៉ៃទឹក និងលិចបាត់ចូលទៅក្នុងទឹក ដោយឃើញដូច្នេះ ពួកក្មេងទាំង ២ នាក់ ក៏រត់មកប្រាប់អ្នកភូមិឲ្យទៅជួយ។
លោកប្រាប់ថា៖ «បន្ទាប់ពីដឹងដំណឹងហើយពលរដ្ឋបានប្តឹងសមត្ថកិច្ចរបស់យើងហើយទាំងសមត្ថកិច្ចទាំងអ្នកភូមិនាំគ្នាទៅកន្លែងកើតហេតុ និងនាំគ្នាចុះរាវរកក្មេងរងគ្រោះ ប៉ុន្តែពេលរាវរកឃើញនិងស្រង់ឡើងពីទឹកមកគឺពួកគេបានដាច់ខ្យល់ស្លាប់អស់ទៅហើយ»។
លោក ប៉ាក ជាតិ បានឲ្យដឹងថាក្មេងរងគ្រោះ ៤ នាក់ ដែលលង់ទឹកស្លាប់នោះត្រូវខាងកាកបាទក្រហមខេត្តកំពង់ចាមកាលពីថ្ងៃទី ៩ មិថុនា បានផ្តល់ប្រាក់ ២០ ម៉ឺនរៀល ក្នុងសពម្នាក់អង្ករចំនួន ៥០ គីឡូក្រាម រួមមានគ្រឿងឧបភោគបរិភោគមួយចំនួនទៀត។
លោកប្រាប់ថា ក្មេងរងគ្រោះមានទី១-ឈ្មោះ ជុន លីតា ភេទស្រី អាយុ ១២ ឆ្នាំ, ទី២-ឈ្មោះ ជុន ជូ ភេទប្រុស អាយុ ១០ ឆ្នាំ (បងប្អូនបង្កើត), ទី៣-ឈ្មោះ រ៉េត ណូយ ភេទស្រី អាយុ ១៣ ឆ្នាំ និងឈ្មោះ ហង្ស ហ៊ី ភេទប្រុស អាយុ ១១ ឆ្នាំ ពួកគេមានលំនៅក្នុងភូមិបែកអន្លូង ឃុំអារក្សត្នោត ស្រុកស្ទឹងត្រង់។
លោកប្រាប់ថា៖ «សាកសពក្មេងទាំង ៤ នាក់ កំពុងធ្វើបុណ្យតាមប្រពៃណីហើយអាជ្ញាធរក៏មានការសោកស្តាយចំពោះការបាត់បង់អាយុជីវិតក្មេងដែរ»៕