រតនគិរីៈ ក្មេងប្រុស-ស្រី ២ នាក់ដែលកំពុងដេកលក់នៅក្នុងផ្ទះបានស្លាប់ ខណៈពេលដែលភ្លើងកំពុងឆេះផ្ទះពេលរំលងអធ្រាត្រស្ថិតនៅភូមិអូរជុំ ឃុំ-ស្រុកអូរជុំ ខេត្តរតនគិរីកាលពីថ្ងៃទី ០៥ ខែឧសភា ឆ្នាំ ២០២០។
លោក ងែន សំ នាយរងនគរបាលប៉ុស្តិ៍ឃុំអូរជុំបានប្រាប់ភ្នំពេញប៉ុស្តិ៍កាលពីថ្ងៃអង្គារថា កុមារី ប៊ី ឡែន អាយុ ៥ ឆ្នាំ និង កុមារា សឿន វណ្ណៈ អាយុ ៣ ឆ្នាំដែលត្រូវជាកូនរបស់ស្ត្រីម្ចាស់ផ្ទះរងគ្រោះឈ្មោះ ជីន សុជាតិ អាយុ ២៧ ឆ្នាំ បានឆេះស្លាប់នៅក្នុងភ្នក់ភ្លើង បន្ទាប់ពីស្ត្រីជាម្ដាយបានចាក់ផ្ទេរសាំងពីប៊ីដុងចំណុះ ៣០ លីត្រចូលទៅក្នុងដប ដោយខ្វះការប្រុងប្រយ័ត្នបណ្ដាលឲ្យហៀរកំពុបទៅប៉ះនឹងភ្លើងទៀនដែលគាត់បានអុជបំភ្លឺនៅក្បែរនោះបង្កឲ្យឆាបឆេះជាអគ្គិភ័យកើតឡើង។
លោកថ្លែងថា៖ «ក្រោយឆាបឆេះជាអគ្គិភ័យ ស្ត្រីជាម្ដាយបានភ័យតក់ស្លុតខ្លាំងពេកមិនបានស្ទុះទៅយកកូនដែលកំពុងដេកលង់លក់នៅលើគ្រែក្នុងមុងនោះទេ គឺគាត់គិតតែពីស្រែកយំ និងរត់ឆ្លេឆ្លាហៅអ្នកជិតខាងមកជួយ»។
លោកបានបន្ថែមថា៖ «ទម្រាំអ្នកជិតខាង និងសមត្ថកិច្ចមកដល់កូនប្រុស-ស្រីរបស់គាត់ទាំង ២ នាក់បានឆេះស្លាប់នៅក្នុងភ្នក់ភ្លើង និងក្លាយជាដុំធ្យូងបាត់ទៅហើយ»។
លោក រ៉ុង សារិទ្ធ នាយផ្នែកសណ្ដាប់ធ្នាប់ និង អគ្គិភ័យ ស្រុកអូរជុំបានឲ្យដឹងថា ក្រោយពីទទួលបានសេចក្ដីរាយការណ៍ពីអាជ្ញាធរភូមិឃុំ កម្លាំងជួយអន្តរាគមន៍ភ្លាមៗផងដែរ ប៉ុន្តែកំសួលភ្លើងឆាបឆេះសន្ធោសន្ធៅឡើងយ៉ាងឆាប់រហ័ស។
លោកថា៖ «យើងទៅដល់ភ្លើងបានឆេះឡើងពេញបន្ទុកទៅហើយជាហេតុដែលនាំឲ្យមន្ត្រីយើងមិនអាចចូលទៅជួយកុមាររងគ្រោះទាំង ២ បាន។ យើងពិតជាមានការសោកស្ដាយខ្លាំងណាស់»៕