ព្រះវិហារៈ ក្មេងប្រុស ៣ នាក់ ក្នុងចំណោម ៤ នាក់ បានលង់ទឹកស្រះស្លាប់កាលពីវេលាម៉ោង ១២ ថ្ងៃត្រង់ ថ្ងៃទី ៨ ខែ មីនា ឆ្នាំ ២០២១ បន្ទាប់ពីពួកគេត្រឡប់មកពីឃ្វាលគោ ហើយនាំគ្នាចុះងូតទឹកស្រះលេងនៅក្បែរអនុវិទ្យាល័យស្រយ៉ង់ ក្នុងឃុំស្រយ៉ង់ ស្រុកគូលែន។
លោក គឹម សារឿន អធិការរងស្រុកគូលែនទទួលបន្ទុកផ្នែកព្រហ្មទណ្ឌប្រាប់ ភ្នំពេញ ប៉ុស្តិ៍ថា កុមារា ជេត ផល អាយុ ១០ ឆ្នាំមានទីលំនៅភូមិស្រយ៉ង់ជើង ឃុំស្រយ៉ង់ និងកុមារា ២ នាក់ទៀតដែលជាអ្នកជិតខាងរួមមានឈ្មោះ សុខ ចិត្រា អាយុ ៩ ឆ្នាំ និង ផាត ចាន់បុត្រ អាយុ ៦ ឆ្នាំ បាននាំគ្នាចុះងូតទឹកស្រះហើយលង់ស្លាប់។
លោកថ្លែងថា៖ «យើងពិតជាសង្វេគចិត្តណាស់ នៅពេលឃើញឪពុកម្ដាយរបស់ពួកគេស្រង់សពរបស់ពួកគេចេញពីក្នុងស្រះទឹក ហើយយំសោកឱបសពរបស់ពួកគេទាំងខ្លួនប្រាណទទឹកជោក»។
លោកបានបន្តថា៖ «ការស្លាប់របស់កុមារាទាំង ៣ នេះ គឺបណ្ដាលមកពីភាពធ្វេសប្រហែសរបស់ឪពុកម្ដាយរបស់ពួកគេផងដែរដែលបានបណ្ដែតបណ្ដោយឱ្យពួកគេ ជាក្មេងតូចៗឱ្យទៅឃ្វាលគោ និងងូតទឹកស្រះលេងដោយគ្មានមនុស្សចាស់ទៅជាមួយ»។
លោក ឡែ សុផាត អាយុ ៣៣ ឆ្នាំជាឪពុកកុមាររងគ្រោះឈ្មោះ ផាត ចាន់បុត្រ ប្រាប់ភ្នំពេញប៉ុស្តិ៍ថា នៅព្រឹកថ្ងៃកើតហេតុ លោកបានដឹកគោទៅចងឱ្យស៊ីស្មៅ នៅក្រោយអនុវិទ្យាល័យស្រយ៉ង់លុះក្រោយទទួលទានអាហារថ្ងៃត្រង់រួច លោកបានប្រើឱ្យកូនប្រុសច្បង ឈ្មោះ ផាត ផានិត អាយុ ១១ ឆ្នាំទៅមើលគោ ខ្លាចក្រែងវាដាច់ និងដើម្បីផ្លាស់ទីកន្លែងចងគោ ប៉ុន្តែកូនប្រុសពៅរបស់លោកឈ្មោះ ផាត ចាន់បុត្រ បានរត់តាមក្រោយបងរបស់វា។
លោកថ្លែងថា៖ «កន្លងមក ខ្ញុំធ្លាប់ប្រើកូនប្រុសច្បងរបស់ខ្ញុំឱ្យទៅមើលផ្លាស់កន្លែងចងគោដែរ ហើយមិនដែលមានបញ្ហានោះទេ ពីព្រោះពីផ្ទះខ្ញុំទៅកន្លែងចងគោក្រោយសាលារៀននោះមានចម្ងាយជាង ៥០០ ម៉ែត្រប៉ុណ្ណោះ»។
បើតាមការរៀបរាប់របស់លោក សុផាត ប្រមាណជា ៣០ នាទីក្រោយមក ស្រាប់តែកូនប្រុសច្បងរបស់លោកបានរត់ត្រឡប់មកផ្ទះវិញទាំងយំសស្រាក់ដោយស្រែកប្រាប់លោកថា៖ «ពុក! ម៉ែ ! អាបុត្រលង់ទឹក!... អាផល និងអាចិត្រាក៏លង់ដែរ!»។ បន្ទាប់មកលោក និងប្រពន្ធបានរត់ទៅកន្លែងកើតហេតុ ដោយបានស្រែកហៅអ្នកជិតខាងមួយចំនួនឱ្យទៅជួយ។ ទោះយ៉ាងណា ទម្រាំពួកគាត់រត់ទៅដល់ស្រះទឹកនោះ និងទម្រាំមុជទឹករាវរកពួកគេឃើញ ពួកគេបានស្លាប់បាត់ទៅហើយ។
យោងតាមរបាយការណ៍របស់នគរបាលប៉ុស្តិ៍រដ្ឋបាលឃុំស្រយ៉ង់ដែល ភ្នំពេញ ប៉ុស្តិ៍ ទទួលបានពេលចេញទៅផ្លាស់កន្លែងចងគោនោះ កុមារាទាំង ២ នាក់បងប្អូនបានជួបកុមារារងគ្រោះ ២ នាក់ទៀតនៅតាមផ្លូវ ហើយពួកគេក៏នាំគ្នាទៅមើលកន្លែងចងគោ។ លុះត្រឡប់មកផ្ទះវិញ ពួកគេក៏នាំគ្នាចុះងូតទឹកស្រះលេង ហើយក៏រអិលជើងធ្លាក់ចូលទៅក្នុងទឹកជ្រៅបណ្ដាលឱ្យលង់ទឹកស្លាប់អស់ ៣ នាក់។ ស្រះនេះមានជម្រៅ ៣ ម៉ែត្រ និងមានរាងចំណោតដែលងាយនឹងរអិលធ្លាក់ចូលទៅក្នុងទឹកជ្រៅ៕