.jpg)
ក្មេងប្រុសរងគ្រោះផ្ទុះក្បាលគ្រាប់ដាច់ប្រអប់ដៃស្តាំនៅខេត្តកំពង់ធំ។ រូបថត សហការី
កំពង់ធំ/បាត់ដំបង: កុមារាអាយុ ១២ ឆ្នាំម្នាក់ បានរងរបួសធ្ងន់ដាច់ប្រអប់ដៃខាងស្ដាំដោយសារយកក្បាលគ្រាប់ B40 ទៅគប់លេង នៅភូមិអណ្តាស ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំកាលពីថ្ងៃទី ១៧ ខែកុម្ភៈ ខណៈអាជ្ញាធរខេត្តបាត់ដំបងបានបំផ្ទុះចោលគ្រាប់ B40 ចំនួន ២ គ្រាប់ នៅច្រាំងស្ទឹងសង្កែ ស្ថិតក្នុងភូមិរំចេក ៤ សង្កាត់រតនៈ។
លោក ជ័យ សំអាត អធិការរងស្រុកប្រាសាទបល្ល័ង្កបានថ្លែងពីថ្ងៃអង្គារថា ក្មេងប្រុសម្នាក់ឈ្មោះ ឡង ពន្លឺ អាយុ ១២ ឆ្នាំ បានរងរបួសដាច់ប្រអប់ដៃខាងស្ដាំ ដោយសាររូបគេរើសបានក្បាលគ្រាប់ ១ គ្រាប់ ប្រភេទ B40 ដែលជាគ្រាប់បាញ់ប្រឆាំងរថក្រោះយកទៅគប់លេង។ ក្រោយពេលមានហេតុការណ៍នេះ សមត្ថកិច្ចបានទៅដល់ទីតាំងខាងលើ និងបានបញ្ជូនកុមារារងគ្រោះទៅព្យាបាលនៅមន្ទីរពេទ្យគន្ធបុប្ផាខេត្តសៀមរាប។
លោកបញ្ជាក់ថា៖ «កន្លងមកយើងបានផ្សព្វផ្សាយ អប់រំ កុំឲ្យប្រជាពលរដ្ឋទាំងចាស់ទាំងក្មេងបើជួបប្រទះគ្រាប់យុទ្ធភណ្ឌមិនទាន់ផ្ទុះកុំប៉ះពាល់វា ហើយរាយការណ៍ប្រាប់សមត្ថកិច្ចជំនាញ ដើម្បីយកមករក្សាទុកទីកន្លែងមានសុវត្ថិភាព។ ដោយឡែកក្មេងរងគ្រោះនេះ ខ្ញុំគិតថាប្រហែលជាគាត់មិនស្គាល់គ្រាប់នេះបានជាគាត់យកទៅគប់លេងបែបនេះ»។
លោក ហង្ស ឡែម នាយប៉ុស្ដិ៍នគរបាលរដ្ឋបាលឃុំសាលាវិស័យបានថ្លែងថា ក្មេងប្រុសរងគ្រោះមានឪពុកឈ្មោះ ឡាន់ ឡង អាយុ ៣៦ ឆ្នាំ និងម្តាយឈ្មោះ ជឿន ចែម អាយុ ៣៥ ឆ្នាំ។ លោកបន្តថា ករណីនេះដោយសារកុមារារងគ្រោះបានទៅចម្ការជាមួយឪពុករបស់គាត់ ហើយឪពុកកំពុងទៅអូសត្រីនៅក្នុងស្រះក្បែរនោះ ដើម្បីធ្វើម្ហូបដោយកុមារារូបនេះបានរើសក្បាលគ្រាប់នៅក្នុងចម្ការ ប៉ុន្ដែមិនបានស្គាល់ថា ជាគ្រាប់ផ្ទុះទេ ហើយបានយកទៅគប់លេងនៅលើដីដំបូកបណ្តាលឲ្យផ្ទុះរងរបួសតែម្តង។
លោកបញ្ជាក់ថា៖ «ក្រោយពេលកើតហេតុសមត្ថកិច្ចយើងបានចុះត្រួតពិនិត្យ ក្នុងអំឡុងពេលនោះស្រាប់តែប្រទះឃើញមានគ្រាប់បែក B40 ចំនួន ២ គ្រាប់ផ្សេងទៀតនៅក្បែរកន្លែងកើតហេតុ។ យើងក៏បានស្នើឲ្យជំនាញស៊ីម៉ាក់ឆាប់ទៅយកគ្រាប់នោះផងដែរ»។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានបដិសេធធ្វើអត្ថាធិប្បាយជុំវិញករណីនេះ ប៉ុន្ដែលោកបានសរសេរលើហ្វេសប៊ុករបស់លោកថា៖ «ពិតជាសោកស្តាយចំពោះកុមារាអាយុ ១២ ឆ្នាំម្នាក់ ធ្លាក់ខ្លួនពិការដៃម្ខាង ដោយសារគ្រាប់មិនទាន់ផ្ទុះ។ គ្រោះថ្នាក់នេះកើតឡើងនៅស្រុកប្រាសាទបល្ល័ង្ក ខេត្តកំពង់ធំនៅថ្ងៃទី ១៧ ខែ កុម្ភៈ ២០២០ ។ សូមអំពាវនាវជាថ្មីទៀតសូមកុំវាយដំគ្រាប់មិនទាន់ផ្ទុះ ឬវត្ថុអ្វីមួយដែលសង្ស័យថា ជាគ្រាប់មិនទាន់ផ្ទុះ»។
ចំណែកករណីដាច់ដោយឡែកមួយទៀតកាលពីថ្ងៃទី ១៧ ខែកុម្ភៈ សាលាក្រុងបាត់ដំបង សហការជាមួយ CMAC បានធ្វើការបំផ្ទុះគ្រាប់យុទ្ធភណ្ឌមិនទាន់ផ្ទុះប្រភេទគ្រាប់ B40 ចំនួន ២ គ្រាប់នៅច្រាំងស្ទឹងសង្កែ ស្ថិតក្នុងភូមិរំចេក ៤ សង្កាត់រតនៈក្រុងបាត់ដំបង។
លោក សេក ចិត្ត្រា នាយករងរដ្ឋបាលក្រុងបាត់ដំបងបានថ្លែងថា គ្រាប់យុទ្ធភណ្ឌដែលត្រូវបំផ្ទុះចោលទាំង ២ គ្រាប់គឺប្រភេទគ្រាប់ B40 សម្រាប់បាញ់កម្ទេចរថក្រោះដែលនៅសេសសល់ពីសម័យសង្គ្រាម។ គ្រាប់នេះត្រូវបានស៊ីម៉ាក់រាវរកឃើញជាបន្តបន្ទាប់នៅក្នុងស្ទឹងសង្កែ និងតាមជម្រាលមាត់ស្ទឹងសង្កែក្នុងអំឡុងពេលជួសជុលជម្រាលមាត់ស្ទឹង។
លោកបន្តថា គ្រាប់យុទ្ធភណ្ឌមិនទាន់ផ្ទុះទាំង ២ គ្រាប់នេះសុទ្ធតែជាគ្រាប់មិនអាចដឹកយកទៅកម្ទេចចោលនៅទីកន្លែងផ្សេងបានទេ ដោយសារវាមានសភាពច្រែះរេចរឹលខ្លាំងទើបខាងជំនាញ CMAC សហការជាមួយអាជ្ញាធរមូលដ្ឋានបានសម្រេចចិត្តបំផ្ទុះនៅនឹងកន្លែងតែម្តង។ មន្ត្រីអង្គភាព CMAC នៅតែបន្តធ្វើសកម្មភាពរុករកគ្រាប់យុទ្ធភណ្ឌមិនទាន់ផ្ទុះបន្តទៀតនៅតាមជំរាលស្ទឹងសង្កែនោះ។
លោកបានបញ្ជាក់ថា៖ «កន្លងមក យើងបានប្រទះឃើញគ្រាប់យុទ្ធភណ្ឌមិនទាន់ផ្ទុះនេះជាបន្តបន្ទាប់ក្នុងអំឡុងយើងឈូសធ្វើច្រាំងស្ទឹងសង្កែហ្នឹង ប៉ុន្ដែខ្ញុំមិនចាំចំនួនគ្រាប់ដែលរកឃើញទេ តែកន្លងមកយើងបានរៀបចំបំផ្ទុះចំនួន ៥ លើករួចមកហើយ ហើយក្នុងមួយលើកៗគឺយើងបំផ្ទុះចន្លោះពី ២ គ្រាប់ទៅ ៣ គ្រាប់»។
បើតាមលោក សេក ចិត្ត្រា ឥឡូវនេះមានកម្លាំងជំនាញរបស់ស៊ីម៉ាក់នៅប្រចាំការនៅការដ្ឋានសង់ជំរាលច្រាំងស្ទឹងសង្កែនោះតែម្ដង៕
