.jpg)
កំពង់ឆ្នាំងៈ ក្មេងប្រុសស្រី ៥ នាក់ ដែលបានពុលសត្វគីង្គក់កាលពីថ្ងៃទី ៣ មីនា នៅភូមិ រពាំងភ្នៅ ឃុំច្រេស ស្រុក កំពង់ត្រឡាច ខេត្តកំពង់ឆ្នាំងនោះ ពេលនេះពួកគេមានសុខភាពល្អឡើងវិញហើយ ថ្វីបើមានក្មេងម្នាក់ផ្សេងបានស្លាប់ក៏ដោយ។ នេះបើតាមការអះអាងរបស់ប្រធានមន្ទីរពេទ្យបង្អែកស្រុកកំពង់ត្រឡាចនៅថ្ងៃទី ៤ មីនានេះ។
លោក តែ វណ្ណា ប្រធានមន្ទីរពេទ្យបង្អែកស្រុកកំពង់ត្រឡាចប្រាប់ ភ្នំពេញ ប៉ុស្តិ៍ នៅថ្ងៃ ៤ មីនានេះថា ករណីក្មេងប្រុស ៤ នាក់ និងក្មេងស្រីម្នាក់ពុលសត្វគីង្គក់គិតរហូតដល់ថ្ងៃទី ៤ មីនា គឺពួកគេមានសុខភាពល្អប្រសើរឡើងវិញហើយបន្ទាប់ពីក្រុមគ្រូពេទ្យលោកជួយសង្ក្រោះ។ ចំណែកក្មេងប្រុសម្នាក់អាយុ ១ ឆ្នាំ ៨ ខែ ដែលស្លាប់ដោយសារពុលសត្វគីង្គក់ដែរនោះ គឺគាត់បានដាច់ខ្យល់ស្លាប់មុនពេលបញ្ជូនដល់មន្ទីរពេទ្យម្ល៉េះ។
លោកថ្លែងថា «អ្នកជំងឺពុលសត្វគីង្គក់ទាំង ៥ នាក់នេះ គឺពួកគេមានអាការវិលមុខក្អួតចង្អោរ និងចេះតែក្អួតរហូត ហើយបើស្ថានភាពពុលខ្លាំង និងមកមន្ទីរពេទ្យមិនទាន់ពេលទេនោះក៏អាចនឹងស្លាប់បាត់បង់ជីវិតបានដែរ»។
ដោយឡែក អ្នកស្រី ពៅ សុភា ដែលមានតួនាទីជាស្មៀនឃុំច្រេស ប្រាប់ពីម្សិលមិញដែរថា ក្មេងប្រុសស្លាប់ឈ្មោះ ត្រុង វាសនា អាយុ ១ ឆ្នាំ ៨ ខែ។ រីឯបងស្រីរបស់គេក៏ត្រូវសង្គ្រោះបន្ទាន់ជាមួយក្មេង ៤ នាក់ខាងលើដែរ។
បើតាមគ្រូពេទ្យប្រាប់ថា មូលហេតុនៃការពុលនេះដោយសារពួកគេនាំគ្នាចាប់សត្វគីង្គក់មកដុតហូបទាំងពងសត្វគីង្គក់ផង ទើបពួកគេជួបគ្រោះថ្នាក់បែបនេះ។ ក្មេងៗទាំង ៦ នាក់ ដែលពុលសត្វគីង្គក់នោះសុទ្ធតែជាបងប្អូនជីដូនមួយនឹងគ្នាហើយឪពុកម្តាយមានជីវភាពក្រីក្រផង។
អ្នកស្រីបញ្ជាក់ថា៖ «ឪពុកម្តាយពួកគេមានជីវភាពខ្វះខាតហើយទុកកូនៗឲ្យនៅផ្ទះគ្មានមនុស្សចាស់មើលថែទាំត្រឹមត្រូវ។ ពួកគាត់នៅក្មេងៗមិនដឹងក៏នាំគ្នាដុតគីង្គក់ហូប»។
អ្នកស្រីបន្ថែមថា បើតាមដឹងគឺនៅថ្ងៃពុលនោះ ម្តាយឪពុកពួកគេចេញទៅស្រែនិងអ្នកខ្លះទៀត ទៅធ្វើការរោងចក្រហើយទុកកូនឲ្យយាយមើលតែដោយសារជីដូនពួកគេនាំគ្នាទៅវត្តអស់ក៏ទុកចៅចោលទើបបណ្តាលឲ្យជួបបញ្ហាបែបនេះ។
ប៉ុន្តែក្រោយពីកើតហេតុខាងកាកបាទក្រហមស្រុកបានចុះទៅចែកអំណោយដល់ក្មេងស្លាប់ផ្តល់នូវថវិកាជាង ២០ ម៉ឺនរៀលត្រីខ និងសម្ភារហូបចុកមួយចំនួនទៀត។ រីឯក្មេងប្រុសស្រី ៥ នាក់ ដែលកំពុងសម្រាកក្នុងមន្ទីរពេទ្យក៏ត្រូវទទួលបានការឧបត្ថម្ភពីក្រុមការងារកាកបាទក្រហមស្រុកកំពង់ត្រឡាចផងដែរ៕
