ភ្នំពេញៈ អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មរុក្ខាប្រមាញ់ និងនេសាទ កំពុងសិក្សាដើម្បីនាំចូលវ៉ាក់សាំងការពារជំងឺប្រភេទថ្មីដែលមានឈ្មោះថាដុំពកស្បែកគោក្របី ឬ LSD បន្ទាប់ពីដាក់ចេញវិធានការបន្ទាន់មួយ ដោយតម្រូវឱ្យអាជ្ញាធរជាប់ព្រំដែនទប់ស្កាត់កុំឱ្យមានការឆ្លងពីក្រៅប្រទេសចូលមកកម្ពុជា។
កាលពីថ្ងៃទី ២៥ ខែ ឧសភា ឆ្នាំ ២០២១ លោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានដឹកនាំកិច្ចប្រជុំមួយ តាមរយ:ប្រព័ន្ធវីដេអូពីចម្ងាយ ស្តីពីវិធានការបន្ទាន់ដើម្បីត្រួតពិនិត្យ និងទប់ស្កាត់ការឆ្លងរាលដាលជំងឺដុំពកស្បែកគោ ក្របី។
កិច្ចប្រជុំនេះមានការចូលរួមពីអគ្គនាយករងនៃអគ្គនាយកដ្ឋានសុខភាពសត្វ និងផលិតកម្មសត្វ នាយកដ្ឋានរដ្ឋបាល ផែនការគណនេយ្យ និងសហប្រតិបត្តិការ,នាយកដ្ឋានផលិតកម្មសត្វ,នាយកដ្ឋានសុខភាពសត្វ និងសុខភាពសាធារណ:បសុព្យាបាល, នាយកដ្ឋានផ្សព្វផ្សាយបច្ចេកទេស និងនីតិកម្ម,នាយកវិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ រួមទាំងប្រធានការិយាល័យផលិតកម្ម និងបសុព្យាបាលរាជធានី-ខេត្ត។
លោក តាន់ ផាន់ណារ៉ា បានប្រាប់ ភ្នំពេញ ប៉ុស្តិ៍ ពីម្សិលមិញថា កិច្ចប្រជុំនេះគឺជាការណែនាំបន្ថែមឱ្យសមត្ថកិច្ចតាមព្រំដែនត្រូវទប់ស្កាត់ឱ្យបានរឹងមាំ កុំឱ្យនាំចូលសត្វ ផលិតផលសត្វខុសច្បាប់គ្រប់ប្រភេទ ជាពិសេស គោ ក្របី ដែលអាចប្រឈមនឹងជំងឺថ្មីនេះ ព្រោះនៅកម្ពុជាមិនធ្លាប់មានប្រវត្តិកើតជំងឺនេះទេ។
លោកបន្តថា ក្នុងករណីដែលខេត្តជាប់ព្រំដែន មានការថ្លោះធ្លោយនោះ បណ្តាខេត្តនានាត្រូវពង្រឹងការត្រួតពិនិត្យឱ្យបានហ្មត់ចត់ដើម្បីទប់ស្កាត់កុំឱ្យជំងឺនេះចូលមកកម្ពុជាបាន។
លោកថា៖ «យើងបានស្រាវជ្រាវអស់ហើយថា កម្ពុជាយើងត្រូវធ្វើម៉េចៗ បន្ទាប់ពីបានស្រាវជ្រាវអស់ហើយ ពីប្រទេសជិតខាងដែលមានប្រវត្តិឆ្លងជំងឺនេះ។ យើងក៏បានដកពិសោធន៍ផ្សេងៗពីរបៀបព្យាបាលពីប្រទេសជិតខាង ព្រោះការព្យាបាលជំងឺនេះគឺអាចព្យាបាលបាន»។
ដោយសារកម្ពុជាមិនទាន់សម្រេចឱ្យប្រើប្រាស់វ៉ាក់សាំងការពារជំងឺនេះ លោក តាន់ ផាន់ណារ៉ា បានឱ្យដឹងថា កម្ពុជាកំពុងសិក្សាជុំវិញវ៉ាក់សាំងនានាដែលប្រទេសនីមួយៗប្រើប្រាស់ ដើម្បីអនុញ្ញាតឱ្យនាំចូលមកប្រើនៅកម្ពុជាឆាប់ៗនេះ។
លោកបានបន្ថែមថា៖ «យើងបានត្រៀមលើកជាផែនការចរចាជាមួយក្រសួងសេដ្ឋកិច្ចហើយយើងក៏បានជជែកជាមួយគម្រោងអង្គការនានាដើម្បីទទួលជំនួយជាវ៉ាក់សាំងនេះ។
ប៉ុន្តែរហូតមកទល់បច្ចុប្បន្ន យើងមិនទាន់សម្រេចចិត្តថា យកវ៉ាក់សាំងពីខាងណាទេ»។
បើតាមលោក ផាន់ណារ៉ា កម្ពុជាកំពុងពិចារណាលើវ៉ាក់សាំង ២ ប្រភេទដែលនាំចូលពីប្រទេសថៃ និងវៀតណាម ខណៈកម្ពុជាមានសត្វគោក្របីប្រមាណជាង ៣ លានក្បាល។
ជំងឺដុំពកស្បែកគោក្របីនេះ កើតឡើងដោយមានរោគសញ្ញាសំខាន់ៗ ដែលមានអត្រាសត្វឈឺពី ៥-៤៥ ភាគរយ និងអត្រាងាប់តិចជាង ១០ ភាគរយ ដែលបង្កឱ្យមានការខាតបង់ធ្ងន់ធ្ងរដល់សេដ្ឋកិច្ចជាតិ។
ជំងឺនេះមានលេចចេញនូវរោគសញ្ញាមានលក្ខណៈដុំពកៗតូច ឬធំទៅតាមស្ថានភាពនៃជំងឺដែលគេរកឃើញនៅលើស្បែកនៃដងខ្លួនសត្វ កញ្ចឹងក ច្រមុះ ក្រអូមមាត់ ប្រដាប់ភេទ កន្សោមដោះ និងកម្ដៅខ្លួនអាចឡើងដល់ ៤១ អង្សាសេ។
ដុំពកនេះអាចបង្កទៅជាក្រមរ ហើយអាចបង្កទៅជាដំបៅចំពោះសត្វឈ្មោលអាចបាត់បង់សមត្ថភាពបង្កកំណើត និងមេផើម អាចរលូតកូន ខណៈមេរោគនេះអាចឆ្លងពីសត្វមួយទៅសត្វមួយតាមការប៉ះពាល់ផ្ទាល់ ឬពីសត្វទៅសត្វ ដោយប្រយោលតាមភ្នាក់ងារចម្លងផ្សេងៗ។ នេះបើតាមសេចក្តីណែនាំរបស់ក្រសួងកសិកម្ម។
ជំងឺនេះបង្កឡើងដោយវីរុសក្នុងក្រុម Poxviridae នៃប្រភេទ Capripoxvirus ដែលបានផ្ទុះឡើងជាលើកដំបូងនៅប្រទេសហ្សំប៊ីកាលពីឆ្នាំ ១៩២៩ ហើយបានឆ្លងពាសពេញពិភពលោកក្នុងនោះមានទ្វីបអាហ្វ្រិក មជ្ឈិមបូព៌ា អឺរ៉ុបប៉ែកអាគ្នេយ៍ អាស៊ីកណ្ដាល អាស៊ីខាងត្បូង និងប្រទេសចិន ដែលបង្កផលប៉ះពាល់ធ្ងន់ធ្ងរដល់គ្រួសារកសិករចិញ្ចឹមសត្វ និងសេដ្ឋកិច្ចជាតិ។
នៅចិនជំងឺនេះបានឆ្លងតាំងពីខែសីហាឆ្នាំ ២០១៩ ដល់ខែមិថុនា ឆ្នាំ ២០២០។ ចំណែកនៅវៀតណាម ជំងឺនេះបានផ្ទុះឡើងពីថ្ងៃទី ៥ ខែ តុលា ឆ្នាំ ២០២០ ដល់ថ្ងៃទី ៦ ធ្នូ ឆ្នាំ ២០២០ ចំនួន ២០ កន្លែងនៅភាគខាងជើង និងភាគកណ្ដាល។
ជាមួយនឹងហានិភ័យដែលអាចចូលមកកម្ពុជានេះ ក្រសួងកសិកម្មអះអាងថា ថ្មីៗនេះ តាមរបាយការណ៍ចុះថ្ងៃទី ៧ ឧសភា ឆ្នាំនេះនៅថៃក៏មានផ្ទុះជំងឺនេះចំនួន ១៧ ខេត្ត-ក្រុង ដែលក្នុងនោះមានខេត្តចំនួន ៤ មានព្រំប្រទល់ជាប់នឹងកម្ពុជា ដូចជា ខេត្តសុរិន្ទ ជាដើម៕