ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានចេញសារាចរណែនាំមួយកាលពីថ្ងៃទី ១៣ វិច្ឆិកា អំពីវិធានការជំរុញការស្ដារឡើងវិញ ការខូចខាតដំណាំកសិកម្ម ដោយគ្រោះទឹកជំនន់ដោយដាក់ចេញនូវវិធានការបង្កបង្កើនផលស្រូវរដូវវស្សា និងត្រៀមសម្រាប់ការបង្កបង្កើនផលស្រូវរដូវប្រាំងឆ្នាំ ២០២០ បន្ទាប់ពីរដ្ឋាភិបាលបានចែកស្រូវពូជដល់ប្រជាកសិករជាង ៦,៤ ពាន់តោន។
យោងតាមសារាចរណែនាំ ២ ទំព័រដែលចេញដោយរដ្ឋមន្ត្រីក្រសួងកសិកម្មលោក វេង សាខុន រដូវវស្សាឆ្នាំ ២០២០ នេះមានភ្លៀងធ្លាក់តាំងពីដើមរដូវ និងមានរបាយស្មើល្អនៅស្ទើរតែគ្រប់តំបន់ទូទាំងប្រទេស ដែលអំណោយផលល្អដល់ការបង្កបង្កើនផលស្រូវ និងសម្រេចបានផលលឿនជាងមុន។
គិតត្រឹមថ្ងៃទី ១១ វិច្ឆិកា ការស្ទូង និងព្រោះស្រូវសម្រេចបានជាង ១០៧ ភាគរយ ឬស្មើនឹង ២ ៧៩០ ៨២៩ ហិកតា លើផែនការ ២ ៥៨៨ ១៣០ ហិកតា ដែលបានគ្រោងទុក។
ក៏ប៉ុន្តែគ្រោះរាំងស្ងួត និងគ្រោះទឹកជំនន់បានបណ្ដាលឱ្យខូចផ្ទៃដីផលិតកម្មស្រូវក្នុងទំហំ ១២៧ ១២១ ហិកតា នៅទូទាំងប្រទេស។ ក្រសួងកសិកម្មលើកឡើងថា ដើម្បីធានាបាននូវសន្តិសុខស្បៀង ការនាំចេញ ផែនការនាំចេញស្រូវ និងស្ដារឡើងវិញការខូចខាតពីគ្រោះរាំងស្ងួត និងគ្រោះទឹកជំនន់ រដ្ឋាភិបាលបានចែកពូជស្រូវជាង ៦,៤ ពាន់តោន និងគ្រាប់ពូជបន្លែជាច្រើនមុខទៀតដល់កសិកររងគ្រោះក្នុងខេត្តចំនួន ១៩។ នេះបើតាមសារាចរដដែល។
សម្រាប់រដូវវស្សាដែលស្ទើរតែផុតទៅហើយនេះ លោក វេង សាខុន បានប្រាប់ដល់មន្ត្រីក្រោមចំណុះក្រសួងឱ្យចុះតាមដាន និងអប់រំកសិករដែលបានទទួលគ្រាប់ពូជដំណាំអំពីបច្ចេកទេសប្រើប្រាស់គ្រាប់ពូជទាំងនោះ បច្ចេកទេសដាំដុះ ថែទាំ និងការកម្ចាត់សមាសភាពចង្រៃ។ នៅទីតាំងខ្ពស់ដែលខ្វះប្រភពទឹក ត្រូវប្ដូរដំណាំពីស្រូវទៅដំណាំរួមផ្សំផ្សេងទៀត។
មន្ត្រីក្រសួងកសិកម្មក៏ត្រូវសហការជាមួយក្រសួងស្ថាប័នពាក់ព័ន្ធ និងអាជ្ញាធរមូលដ្ឋាន និងដៃគូជាតិ អន្តរជាតិដើម្បីកំណត់តំបន់ដែលមានអំណោយផល និងជំរុញឱ្យមានការដាំដុះឱ្យអស់សក្តានុពលកសិកម្ម។ មន្ត្រីក៏ត្រូវកំណត់តំបន់មានប្រភពទឹកស្វែងរកលទ្ធភាពបូមទឹកបញ្ចូលអាងស្តុកទឹក និងប្រព័ន្ធប្រឡាយដើម្បីធានាដល់ការផ្គត់ផ្គង់ទឹកសម្រាប់ដំណាំកសិកម្ម។ ក្រុមមន្ត្រីក៏ត្រូវណែនាំកសិករឱ្យចេះរក្សាទឹកទុក ការថែទាំស្រូវ និងពិនិត្យបច្ចេកទេសម៉ាស៊ីនច្រូតស្រូវឱ្យបានត្រឹមត្រូវ។
សម្រាប់ការបង្កបង្កើនផលស្រូវរដូវប្រាំងវិញលោក វេង សាខុន ក៏បានប្រាប់មន្ត្រីក្រោមឱវាទ និងពលរដ្ឋឱ្យយកចិត្តទុកដាក់ក្នុងការប្រើប្រាស់ទឹកបំផុសកសិករឱ្យជ្រើសរើសពូជស្រូវដែលមិនប្រកាន់រដូវ និងមានរយៈពេលលូតលាស់ខ្លី។ មន្ត្រីកសិកម្មត្រូវចុះផ្សព្វផ្សាយបច្ចេកទេសដាំដុះ និងថែទាំ ព្រមទាំងត្រៀមចុះអន្តរាគមន៍ឱ្យបានទាន់ពេលវេលា។
លោកបានថ្លែងថា៖ «ចំពោះដំណាំស្រូវដែលដាំដុះរួច ត្រូវណែនាំកសិករឱ្យចុះពិនិត្យមើល ថែទាំ ដាក់ជីបំប៉ន និងការពារដំណាំឱ្យបានដិតដល់ជាប្រចាំ ពោលគឺកម្ចាត់ស្មៅឱ្យបានល្អរក្សាទឹកឱ្យបានគ្រប់គ្រាន់ និងពិនិត្យមើលស្ថានភាពនៃការបំផ្លាញរបស់សត្វចង្រៃ និងជំងឺរាតត្បាតផ្សេងៗ»។
លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យបានឱ្យដឹងកាលពីម្សិលមិញថា លោកបានទទួលសារាចរណែនាំនេះរួចហើយ និងត្រៀមខ្លួនអនុវត្ត។ ខេត្តបន្ទាយមានជ័យក៏រងគ្រោះដោយទឹកជំនន់បង្កដោយទឹកភ្លៀងដែរកាលពីខែតុលា ប៉ុន្តែពេលនេះទឹកនៅក្នុងស្រុកនានាផ្នែកខាងលើបានស្រកអស់ហើយនៅសល់តែស្រុកនៅផ្នែកខាងក្រោមប៉ុណ្ណោះ ដូចជាស្រុកព្រះនេត្រព្រះ និងស្រុកភ្នំស្រុក។
លោក វណ្ណាសេដ្ឋ បញ្ជាក់ថាជារៀងរាល់ឆ្នាំការធ្វើស្រែប្រាំងអាចចាប់ផ្ដើមបានពីខែវិច្ឆិកា ប៉ុន្តែដោយសារទឹកជំនន់ថ្មីៗនេះ ការធ្វើស្រែប្រាំងមិនទាន់ចាប់ផ្ដើមនៅឡើយ។
លោកថ្លែងដូច្នេះថា៖ «យើងត្រៀមហើយ យើងចុះទៅតាមផែនការ។ អ្វីដែលយើងព្រួយបារម្ភគឺខ្លាចខ្វះទឹក។ យើងចុះទៅណែនាំគាត់ ព្រោះកសិករឥឡូវនេះ គាត់ចូលចិត្តធ្វើស្រែដោយប្រើគ្រឿងចក្រដែលលឿន ហើយគាត់មិនបានប៉ាន់ប្រមាណពីតម្រូវការទឹកទេ។ អ៊ីចឹងវាអាចខ្វះខាតទឹកនៅចុងរដូវ»។
លោកបានបញ្ជាក់ទៀតថា នៅខេត្តបន្ទាយមានជ័យ ពលរដ្ឋកាន់តែច្រើនបានបង្កបង្កើនផលស្រូវប្រាំង។ ជាទូទៅ ប្រជាពលរដ្ឋក្នុង ១ ស្រុកត្រូវបានប៉ាន់ប្រមាណថា នឹងធ្វើស្រូវប្រាំងក្នុងទំហំដីប្រមាណតែ ៨ ពាន់ហិកតា ប៉ុន្តែជាក់ស្ដែងពួកគេបានធ្វើរហូតដល់ទៅ ៣ ម៉ឺនហិកតាក៏មាន៕
វីដេអូ៖