.jpg)
កងកម្លាំងជួយច្រូតស្រូវពលរដ្ឋត្រូវទឹកជន់លិចនៅបន្ទាយមានជ័យ។ រូបថត សហការី
ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នឹងបើកយុទ្ធនាការធ្វើការស្តារជាបឋមលើការដាំដុះដំណាំស្រូវឡើងវិញដល់ប្រជាពលរដ្ឋដែលរងផលប៉ះពាល់ដោយសារគ្រោះជំនន់ទឹកភ្លៀងនៅក្នុងខេត្ដបាត់ដំបង ពោធិ៍សាត់ និងបន្ទាយមានជ័យចាប់ពីថ្ងៃទី ២៩ ខែតុលា រហូតដល់សប្ដាហ៍ទី ១ នៃខែវិច្ឆិកា។
លោក វេង សាខុន បានសរសេរនៅលើហ្វេសប៊ុករបស់លោកកាលពីថ្ងៃសៅរ៍ ទី ២៤ ខែតុលាដោយយោងទៅតាមលទ្ធផលនៃការចុះត្រួតពិនិត្យ និងវាយតម្លៃពីស្ថានការខូចខាតដំណាំស្រូវដោយសារទឹកជំនន់ទឹកភ្លៀងកន្លងមករបស់ប្រធានមន្ទីរកសិកម្ម ខេត្តបាត់ដំបង ពោធិ៍សាត់ បន្ទាយមានជ័យ ដោយមានការសហការជាមួយអគ្គនាយកដ្ឋានកសិកម្ម។
លោកបានឱ្យដឹងថា មានទីតាំងមួយចំនួនអាចមានលទ្ធភាពចាប់ផ្តើមធ្វើការស្តារការដាំដុះដំណាំស្រូវបានជាមួយនឹងលទ្ធភាពប្រភពទឹកគ្រប់គ្រាន់សម្រាប់ស្រូវស្រាល។ លោកថ្លែងថា៖ «តាមរយៈលទ្ធផលខាងលើនេះ ក្រសួងកសិកម្មនឹងសហការជាមួយមន្ទីរកសិកម្ម ខេត្តទាំង ៣ រួមជាមួយនឹងអាជ្ញាធរថ្នាក់ក្រោមជាតិនឹងបើកយុទ្ធនាការធ្វើការស្តារជាបឋមលើការដាំដុះដំណាំស្រូវឡើងវិញ»។
បើតាមលោករដ្ឋមន្ដ្រី យុទ្ធនាការធ្វើការស្តារជាបឋមលើការដាំដុះដំណាំស្រូវឡើងវិញនេះធ្វើឡើង នៅឯខេត្តបាត់ដំបងនៅថ្ងៃទី ២៩ ខែតុលា នៅភូមិព្រៃក្លូត ឃុំព្រៃត្រឡាច ស្រុករុក្ខគិរី។ នៅខេត្តពោធិ៍សាត់នឹងធ្វើថ្ងៃទី ៣០ ខែតុលា នៅភូមិរបោះរាំង ឃុំអូរតាប៉ោង ស្រុកបាកាន។ ចំណែកខេត្តបន្ទាយមានជ័យនឹងធ្វើយុទ្ធនាការនេះនៅសប្តាហ៍ទី ១ ខែវិច្ឆិកាឆ្នាំ ២០២០ នៅក្នុងឃុំរហាត់ទឹក ស្រុកមង្គលបុរី។
លោករដ្ឋមន្ដ្រីបញ្ជាក់ថា៖ «សម្រាប់ការចាប់ផ្តើមយុទ្ធនាការអន្តរាគមន៍ជាបឋមនេះ យើងនឹងរៀបចំឱ្យមានត្រាក់ទ័រយ៉ាងតិច ៥ គ្រឿង គោយន្តពង្រាបដីចំនួន ៥ គ្រឿង និងម៉ាស៊ីនដាំគ្រាប់ស្រូវចំនួន ៣ ទៅ ៤ គ្រឿងនៅលើទីតាំងភូមិនីមួយៗដែលបានកំណត់ខាងលើក្នុងខេត្តនីមួយៗរួមជាមួយការផ្តល់ពូជស្រូវស្រាលរយៈពេលខ្លី រួមជាមួយនឹងការផ្តល់គ្រឿងឧបភោគបរិភោគមួយចំនួនសម្រាប់គ្រួសាររងគ្រោះនីមួយៗផងដែរ»។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម មិនអាចទាក់ទងបានទេកាលពីម្សិលមិញ។ ប៉ុន្ដែលោក ប៉ាង វណ្ណាសេដ្ឋ ប្រធានមន្ទីរកសិកម្មខេត្ដបន្ទាយមានជ័យបានថ្លែងថា ត្រឹមថ្ងៃទី ២៥ ខែតុលា នៅខេត្ដបន្ទាយមានជ័យផលប៉ះពាល់លើដំណាំស្រូវដោយសារជំនន់ទឹកភ្លៀងនេះមានប្រមាណជាង ៦ ម៉ឺនហិកតា។ ចំណែកដំណាំរួមផ្សំក្នុងនោះមានដូចជាដំឡូងមីមានប្រមាណជាង ១ ម៉ឺនហិកតា និងបន្លែផ្សេងៗជាង ២០០ ហិកតា។
លោកថ្លែងថា៖ «ឥឡូវយើងកំពុងវាយតម្លៃលើការខូចខាតទីតាំងដែលរងផលប៉ះពាល់ធ្ងន់ធ្ងរគឺនៅស្រុកមង្គលបុរី និងក្រុងសិរីសោភ័ណ។ ឥឡូវឯកឧត្ដមរដ្ឋមន្ដ្រីក្រសួងកសិកម្មបានដាក់ផែនការយុទ្ធនាការមកស្ដារឡើងវិញដល់ពលរដ្ឋដែលរងផលប៉ះពាល់។ ក្នុងជំហានទី ១ នេះពលរដ្ឋដែលរងផលប៉ះពាល់ខ្លាំងតាំងពីគ្រោះរាំងស្ងួត រហូតដល់ទឹកជំនន់នាពេលនេះគឺស្ថិតនៅទីតាំងឃុំរហាត់ទឹកនៃស្រុកមង្គលបុរី»។
លោកនាយករដ្ឋមន្ដ្រី ហ៊ុន សែន ក៏បានថ្លែងនៅក្នុងពេលចុះសួរសុខទុក្ខ និងចែកអំណោយជូនពលរដ្ឋរងគ្រោះដោយទឹកជំនន់ក្នុងខេត្តបន្ទាយមានជ័យ កាលពីថ្ងៃសៅរ៍ទី ២៤ ខែតុលាថា រាជរដ្ឋាភិបាលបានគិតរួចជាស្រេចហើយថា ក្រោយទឹកជំនន់បានត្រៀមពូជស្រូវចំនួន ២ ០០០ តោនដែលជាពូជស្រូវមិនប្រកាន់រដូវសម្រាប់ផ្ដល់ជូនពលរដ្ឋរងផលប៉ះពាល់ដោយជំនន់នេះក្នុង ១ គ្រួសារនឹងទទួលបាន ១០០ គីឡូក្រាម។ ប៉ុន្ដែការផ្តល់ជូននេះ សម្រាប់តែពលរដ្ឋដែលរងការខូចខាតតែប៉ុណ្ណោះ។
លោកថ្លែងថា៖ «ពលរដ្ឋមិនធ្វើស្រូវ តែពួកគាត់ដាំដំណាំនោះ គឺរាជរដ្ឋាភិបាលនឹងផ្តល់នូវពូជដំណាំចំនួន ៦ មុខដំណាំ ដើម្បីទុកបង្កបង្កើនផលក្រោយទឹកស្រកវិញថែមទាំងមានគ្រឿងចក្រកសិកម្មមកបម្រើជូនប្រជាកសិករផងដែរ។ ក្រសួងពាក់ព័ន្ធទាំងអស់ត្រូវមានការវាយតម្លៃនៃការខូចខាតរបស់ប្រជាជនក្នុងពេលទឹកជំនន់ ជាពិសេសក្រសួងកសិកម្ម ដោយយើងដោះស្រាយជូនតែអ្នកដែលខូចខាតទេ»។
លោក ថេង សារឿន ប្រធានសម្ព័ន្ធសហគមន៍កសិករកម្ពុជា (CCFC) លើកឡើងកាលពីម្សិលមិញថា យុទ្ធនាការធ្វើការស្តារជាបឋមលើការដាំដុះដំណាំស្រូវឡើងវិញគឺជាផ្នែកធំមួយនៃគោលនយោបាយរបស់រាជរដ្ឋាភិបាលដែលបានរៀបចំទុករួចទៅហើយ។
លោកថ្លែងបន្តថា៖ «ដូច្នេះគ្រប់ក្រសួងស្ថាប័នទាំងអស់គឺត្រូវទទួលខុសត្រូវតាមផ្នែកផ្សេងៗគ្នាក្នុងការស្ដារឡើងវិញ និងការគាំពារជួយដល់ប្រជាពលរដ្ឋរងផលប៉ះពាល់ ក្រោយគ្រោះជំនន់ទឹកភ្លៀងនេះបញ្ចប់ទៅវិញ។ តាមរយៈយុទ្ធនាការនេះនឹងអាចកៀរគរអ្នកចូលរួមឧបត្ថម្ភដើម្បីជួយស្ដារដល់សេដ្ឋកិច្ចប្រជាពលរដ្ឋឡើងវិញ»៕
វីដេអូ៖
