ភ្នំពេញ: ក្រសួងកសិកម្ម រុក្ខាប្រមាញ់ និងនេសាទ បានបង្កើតគណៈកម្មការជំរុញវារីវប្បកម្មកម្ពុជា ដើម្បីជួយសម្របសម្រួលក្នុងកិច្ចការផលិតកម្មអាជីវកម្មរបស់សមាគមវារីវប្បករ សំដៅបង្កើនសមត្ថភាពផលិត ផ្គត់ផ្គង់ក្នុងស្រុក និងនាំចេញ ដោយគណៈកម្មការត្រូវតែពិនិត្យពិភាក្សាឱ្យបានស៊ីជម្រៅលើដំណើរការផលិតកម្មអាជីវកម្ម និងដោះស្រាយបញ្ហាប្រឈមនានាឱ្យមានប្រសិទ្ធភាពខ្ពស់។
សេចក្ដីសម្រេចរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទចុះថ្ងៃទី ១៧ ខែធ្នូ ដែលភ្នំពេញប៉ុស្ដិ៍ទទួលបានពីម្សិលមិញឱ្យដឹងថា គណៈកម្មការជំរុញវារីវប្បកម្មកម្ពុជាត្រូវបានបង្កើតឡើងដោយមានប្រធាន អនុប្រធាន និងសមាជិកសរុប ១១ រូប។
ក្នុងនោះលោក ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ធ្វើជាប្រធាន ខណៈគណៈកម្មការមានអនុប្រធានចំនួន ៣ រូប និងសមាជិកចំនួន ៧ រូប។
សេចក្ដីសម្រេចដដែលនេះបានឱ្យដឹងថា គណៈកម្មការត្រូវសម្របសម្រួលក្នុងកិច្ចការផលិតកម្មអាជីវកម្មរបស់សមាគមវារីវប្បករនៅកម្ពុជាសំដៅបង្កើនសមត្ថភាពផលិត ផ្គត់ផ្គង់ក្នុងស្រុក និងនាំចេញ ដោយពិនិត្យពិភាក្សាឱ្យបានស៊ីជម្រៅលើដំណើរការផលិតកម្មអាជីវកម្ម បញ្ហាប្រឈមនានា និងលើកទិសអនុវត្តឱ្យមានប្រសិទ្ធភាពខ្ពស់។
សេចក្ដីសម្រេចបញ្ជាក់ថា៖ «គណៈកម្មការត្រូវសហការជំរុញការអភិវឌ្ឍវារីវប្បកម្មគ្រប់រូបភាពដល់ប្រជាកសិករ និងសម្រួលកិច្ចការវិនិយោគផ្នែកនេះឱ្យមានដំណើរការល្អប្រសើរ។ ជំរុញការផ្សព្វផ្សាយបច្ចេកទេសវារីវប្បកម្មឱ្យបានទូលាយ បង្កើនបណ្ដុំអាជីវកម្មផលិតឱ្យមានបរិមាណ និងគុណភាពឆ្លើយតបតាមតម្រូវការទីផ្សារ។ បង្កើនកិច្ចសហការជាមួយគ្នាក្នុងការងារជួយទប់ស្កាត់បទល្មើសនាំចូលផលិតផលជលផលដោយខុសច្បាប់»។
បើតាមសេចក្ដីសម្រេចថា គណៈកម្មការត្រូវជំរុញការសិក្សាស្រាវជ្រាវអំពីបច្ចេកទេសចិញ្ចឹម បង្កើនផលិតភាពចិញ្ចឹម កែច្នៃ និងទីផ្សារ ដើម្បីធានាបាននូវសុខុមាលភាព វិបុលភាព និងនិរន្តរភាពនៃផ្នែកវារីវប្បកម្មនៅកម្ពុជា។
រាយការណ៍ពីវឌ្ឍនភាព និងបញ្ហាប្រឈមនានាក្នុងការអនុវត្តជូនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីពិនិត្យ និងសម្រេច។
លោក ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការជំរុញវារីវប្បកម្មកម្ពុជាពីម្សិលមិញមិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញការបង្កើតគណៈកម្មការជំរុញវារីវប្បកម្មកម្ពុជានេះបានទេ។
ចំណែកលោក អេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល និងជាអនុប្រធានគណៈកម្មការជំរុញវារីវប្បកម្មកម្ពុជាពីម្សិលមិញមិនទាន់អាចទាក់ទងសុំការបញ្ជាក់បានដែរ ដោយទូរស័ព្ទលោកគ្មានអ្នកទទួល។
លោក សុខ រ៉ាដែន ប្រធានសមាគមវារីវប្បកម្មនៅកម្ពុជាបានឱ្យដឹងពីម្សិលមិញថា ក្នុងនាមអ្នកដឹកនាំ និងក្រុមប្រឹក្សាភិបាលសមាគមវារីវប្បករនៅកម្ពុជាបានថ្លែងដោយ អរគុណក្រសួងកសិកម្ម ថា ការបង្កើតគណៈកម្មការនេះបង្ហាញពីការយកចិត្តទុកដាក់ខ្ពស់ក្នុងការជួយជំរុញវិស័យនេះឱ្យលឿនទៅមុខ ស្របតាមអនុសាសន៍ និងគោលនយោបាយរាជរដ្ឋាភិបាល។
លោករំពឹងថា ក្រុមការងារគណៈកម្មការថ្មីនេះនឹងបង្កើនការយកចិត្តទុកដាក់ជួយពលរដ្ឋដែលកំពុងប្រកបមុខរបរចិញ្ចឹមត្រី និងអ្នកដែលកំពុងធ្វើការងារទាក់ទងវិស័យវារីវប្បកម្មទាំងអស់។
លោកថា៖ «យើងខ្ញុំជាអ្នកគ្រប់គ្រងសមាគម សមាជិកសមាគម និងប្រជាកសិករទាំងអស់នឹងបន្តខិតខំប្រឹងប្រែងបង្កើនផលិតកម្ម និងគុណភាព ធានាឱ្យបាននូវការផ្គត់ផ្គង់ក្នុងស្រុក និងគោលដៅនាំចេញក្នុងបរិការណ៍ទីផ្សារប្រកួតប្រជែង ពិសេសក្នុង និងក្រោយសម័យកូវីដ១៩នេះ»៕