ភ្នំពេញៈ ក្រុមហ៊ុន ២ ដែលនាំចូលសត្វជ្រូករស់ពីប្រទេសថៃត្រូវបានក្រសួង កសិកម្ម រុក្ខាប្រមាញ់ និងនេសាទផ្អាកការនាំចូលសត្វជ្រូករស់ បន្ទាប់ពីក្រុមហ៊ុនប្រព្រឹត្តល្មើសនឹងកិច្ចសន្យាដែលខ្លួនបានព្រមព្រៀងជាមួយក្រសួងម្ដងហើយម្ដងទៀត។ ជាមួយគ្នានេះសមាគមផ្គត់ផ្គង់ជ្រូកក៏បានរកឃើញក្រុមហ៊ុន ១ អនុវត្តខុសពីកិច្ចសន្យានេះដែរ និងស្នើឲ្យក្រសួងចាត់ការដូចគ្នា។
លិខិតចុះថ្ងៃទី ៣០ មេសារបស់លោកស្រី វុឌ្ឍី អ្នកនាំពាក្យក្រសួងកសិកម្ម រុក្ខា ប្រមាញ់ និងនេសាទជម្រាបជូនទៅសមាគមផ្គត់ផ្គង់ជ្រូកកម្ពុជាដែលភ្នំពេញ-ប៉ុស្តិ៍ទទួលបានថ្ងៃទី ៤ ឧសភា ឲ្យដឹងថាក្រុមហ៊ុនដែលរងការពិន័យ ផ្អាកការនាំចូលជ្រូករស់ពីប្រទេសថៃជាបណ្ដោះអាសន្ននោះគឺ ក្រុមហ៊ុនចាន់ធូមានជ័យ អ៊ីមផត អិចផត និងក្រុមហ៊ុន ៣- ធីអេច អេហ្គ្រីឌីវេឡុបម៉ិន។
លោក ស្រី វុឌ្ឍី បញ្ជាក់ក្នុងលិខិតថា៖ «ក្រុមហ៊ុនទាំង ២ នេះបានប្រព្រឹត្តបទល្មើសម្ដងហើយម្ដងទៀតមិនព្រមរាងចាល ទោះជាសមត្ថកិច្ចជំនាញបានចាប់ផាកពិន័យ និងធ្វើកិច្ចសន្យាយ៉ាងណាក៏ដោយ»។
បទល្មើសដែលក្រុមហ៊ុនទាំង ២ បានប្រព្រឹត្តរួមមានការកាត់ផ្ទេរសិទ្ធិ ឬលក់គោលការណ៍នាំចូលសត្វជ្រូករស់ទៅឲ្យក្រុមហ៊ុនផ្សេងទៀតផ្ទុយពីកិច្ចព្រមព្រៀង និងសេចក្ដីណែនាំរបស់ក្រសួង និងការដឹកជញ្ជូនសត្វលើសពីបរិមាណដែលបានស្នើសុំ ឬអនុញ្ញាតពីក្រសួងជាដើម។
អំពើល្មើសរបស់ក្រុមហ៊ុនទាំង ២ បានធ្វើឲ្យក្រុមពាណិជ្ជករនៃសមាគមផ្គត់ផ្គង់ជ្រូកកម្ពុជាមួយចំនួនព្រួយបារម្ភអំពីការឆ្លៀតឱកាសរបស់ពាណិជ្ជករទុច្ចរិតមួយចំនួនប្រើប្រាស់មធ្យោបាយនេះ ដណ្ដើមសិទ្ធិផ្ដាច់មុខក្នុងការនាំចូលជ្រូករស់ពីថៃមកផ្គត់ផ្គង់ក្នុងទីផ្សារកម្ពុជា។ ក្រុមពាណិជ្ជករក៏បានដាក់សំណើមកក្រសួងជួយអន្តរាគមន៍ «ចាត់វិធានការទប់ស្កាត់ការផ្ទេរសិទ្ធិនាំចូលសត្វជ្រូករស់ពីប្រទេសថៃក្នុងគោលដៅផ្ដាច់មុខ» នេះជាបន្ទាន់។
លោក សាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជាប្រាប់ភ្នំពេញប៉ុស្តិ៍ថា បន្ទាប់ពីសមាគមទទួលបណ្ដឹងពីសមាជិកអំពីបញ្ហានេះសមាគមបានចុះអង្កេតស្រាវជ្រាវហើយរកឃើញថា មានក្រុមហ៊ុន ២ គឺក្រុមហ៊ុនអង្គរសុខសែនជ័យ ឯ.ក និងក្រុមហ៊ុនចាន់ធូមានជ័យ អ៊ីមផត អិចផត បានកាត់លក់គោលការណ៍នាំចូលសត្វជ្រូករស់ពីប្រទេសថៃទៅឲ្យពាណិជ្ជករម្នាក់ដោយខុសច្បាប់។
លោកថ្លែងថា៖ «នៅក្នុងគោលការណ៍របស់ក្រសួង ក្រុមហ៊ុនដែលទទួលបានសិទ្ធិនាំចូលជ្រូករស់ពីប្រទេសជិតខាង គឺមិនអនុញ្ញាតឲ្យលក់គោលការណ៍បន្តទៅក្រុមហ៊ុនផ្សេងឡើយ។ ប៉ុន្តែក្រុមហ៊ុនអង្គរសុខសែនជ័យ ឯ.ក និងក្រុមហ៊ុន ចាន់ធូ មានជ័យ អ៊ីមផត អិចផត ដែលទទួលបានការអនុញ្ញាតពីក្រសួងឲ្យនាំចូលជ្រូករស់ពីប្រទេសថៃក្នុង ១ ថ្ងៃ ៩៦០ ក្បាលដូចគ្នានោះបានកាត់លក់គោលការណ៍បន្តទៅឲ្យពាណិជ្ជករម្នាក់»។
លោកថា៖ «ករណីនេះធ្វើឲ្យសមាជិកមួយចំនួននៃសមាគមយើងមានការព្រួយបារម្ភដោយគិតថា ពាណិជ្ជករនោះកំពុងមានមហិច្ឆតានាំចូលជ្រូករស់ពីប្រទេសថៃដោយផ្ដាច់មុខ»។
លោក ចាត់ថេត បន្តថា សមាគមគាំទ្រចំពោះចំណាត់ការរបស់ក្រសួងទៅលើក្រុមហ៊ុនចាន់ធូមានជ័យ អ៊ីមផត អិចផត និងក្រុមហ៊ុន ៣- ធីអេច អេហ្គ្រីឌីវេឡុបម៉ិន ប៉ុន្តែបានស្នើបន្តទៅក្រសួងឲ្យមានចំណាត់ការទៅលើក្រុមហ៊ុនអង្គរសុខសែនជ័យ ឯ.ក ដើម្បីឲ្យស្មើភាពគ្នា។
លោកថា៖ «សមាគមយើងបានរកឃើញភ័ស្ដុតាងដែលក្រុមហ៊ុន អង្គរសុខសែនជ័យឯ.ក បានកាត់លក់គោលការណ៍នាំសត្វជ្រូករស់ពីប្រទេសថៃទៅឲ្យពាណិជ្ជករឈ្មោះ លឹម សុផល ចំនួន ២៥០ ក្បាលក្នុង ១ ថ្ងៃផ្ទុយពីការណែនាំរបស់ក្រសួង។ ដូច្នេះដើម្បីឲ្យមានតម្លាភាព និងរួចផុតពីការរិះគន់ពីពាណិជ្ជករក្នុងស្រុក ក្រសួងគប្បីចាត់វិធានការតាមផ្លូវច្បាប់ទៅលើក្រុមហ៊ុននេះផងដែរ»។
ពាណិជ្ជករ លឹម សុផល កាលពីថ្ងៃទី ៣ ឧសភា បានចេញលិខិតបំភ្លឺមួយ ដោយទទួលស្គាល់ថាក្នុង ១ ថ្ងៃលោកនាំចូលជ្រូករស់ពីប្រទេសថៃចំនួន ៥៥០ ក្បាលក្នុងនោះ ២៥០ ក្បាលទទួលបានសិទ្ធិបន្តពីក្រុមហ៊ុនអង្គរសុខសែនជ័យឯ.ក និង ៣០០ ក្បាលទៀតទទួលបានសិទ្ធិបន្តពីក្រុមហ៊ុនចាន់ធូមានជ័យ អ៊ីមផត អិចផត។ ប៉ុន្តែលោកបដិសេធថាគ្មានបំណងចង់បាន «សិទ្ធិផ្ដាច់មុខ» នោះទេ។
ករណីនេះលោក ស្រី វុឌ្ឍី បញ្ជាក់ថា៖ «ក្រសួងនឹងបន្តត្រួតពិនិត្យ និងចាត់វិធានការតាមនីតិវិធីច្បាប់»។
បើតាមលោក វុឌ្ឍី បច្ចុប្បន្នមានក្រុមហ៊ុន ៧ ដែលទទួលបានសិទ្ធិនាំចូលសត្វជ្រូករស់ពីប្រទេសជិតខាងមកផ្គត់ផ្គង់ទីផ្សារក្នុងស្រុក។ ក្រសួងបានធ្វើបច្ចុប្បន្នភាពនៃតម្រូវការក្នុងស្រុក និងបរិមាណនៃការនាំចូល ហើយក៏បានសម្រេចកាត់បន្ថយការនាំចូលជ្រូកប្រមាណ ៧០% ពីគ្រប់ក្រុមហ៊ុនស្របច្បាប់ទាំងអស់ស្មើៗគ្នាព្រមទាំងពង្រឹងការអនុវត្តច្បាប់ ដើម្បីទប់ស្កាត់ចលនាសត្វខុសច្បាប់ផងដែរ។ ក្រសួងណែនាំក្រុមហ៊ុនដែលទទួលបានការអនុញ្ញាតឲ្យនាំចូលជ្រូកមិនឲ្យលក់គោលការណ៍បន្តទៅឲ្យក្រុមហ៊ុនផ្សេងទេ ចៀសវាងហានិភ័យនៃជំងឺឆ្លងផ្សេងៗ។ បើនៅបន្តក្រសួងនឹងពិនិត្យ និងចាត់វិធានការតាមនីតិវិធី៕