ព្រះវិហារៈ ក្រសួងកសិកម្មបានបញ្ឈប់អាជ្ញាប័ណ្ណរបស់ក្រុមហ៊ុនដួង ស្រួច ដែលប្រមូលផល អនុផលព្រៃឈើលើដីសម្បទានសង្គមកិច្ច នៅក្នុងស្រុកជាំក្សាន្ត ខេត្តព្រះវិហារ បន្ទាប់ពីក្រុមហ៊ុនមួយនេះខកខានមិនគោរពតាមការសន្យារបស់ខ្លួនក្នុងការកសាងផ្លូវសម្រាប់អ្នកស្រុក។
យោងតាមអភិបាលស្រុក ជាំក្សាន្ត លោក ជា គឹមសេង បានឱ្យដឹងថា ពីដំបូង ដីនេះត្រូវបានផ្តល់ឱ្យសហគមន៍ជាដីសម្បទានសង្គមកិច្ច ដើម្បីកសាងភូមិថ្មីមួយនិងផ្លូវចូល ទៅកាន់តំបន់នោះ។ អាជ្ញាធរមូលដ្ឋានមិនមានលទ្ធភាពឈួសឆាយសម្អាតដីនោះទេ ដូច្នេះហើយក៏បានចុះកិច្ចសន្យាសហការជាមួយក្រុមហ៊ុននឹងការកសាងផ្លូវផងដែរ។
ក្រសួងកសិកម្មបានផ្តល់អាជ្ញាប័ណ្ណឲ្យក្រុមហ៊ុន ដួង ស្រួច ប្រមូលផល អនុផលព្រៃឈើនៅតំបន់នោះ ប៉ុន្តែ លោក គឹម សេង បានអះអាងថា ក្រុមហ៊ុនបានជម្រះព្រៃអស់ហើយប៉ុន្តែផ្លូវមិនដែលបានធ្វើទេ។
លោក គឹមសេង ថ្លែងថា មិនមែនជាអភិបាលស្រុកទេនៅពេលគេចុះកិច្ចព្រមព្រៀងនោះ ព្រោះវាត្រូវបានធ្វើឡើង កាលពី ៦ ឆ្នាំមុន យោងតាមការពិនិត្យមើលកំណត់ត្រាចាស់ៗ។
លោក គឹមសេង ថ្លែងថា៖«ខ្ញុំបានពិនិត្យមើលច្បាប់និងលក្ខខណ្ឌរបស់ពួកគេឡើងវិញ ហើយក្រុមហ៊ុនបានសន្យាថានឹងសាងសង់ផ្លូវមួយខ្សែ..... ប៉ុន្តែ ពួកគេមិនបានអនុវត្តតាមលក្ខខណ្ឌរបស់ពួកគេដែលបានសន្យាទេ ដូច្នេះហើយ ខ្ញុំបានជម្រាបទៅអភិបាលខេត្ត»។
លោក គឹមសេង បានបន្ថែមថាក្រុមហ៊ុននោះបានប្រមូលផល អនុផលព្រៃឈើ លើផ្ទៃដីចំនួន១៥៤៤ហិកតា។
ពីដំបូង លោក គឹមសេង បានដាក់ពាក្យបណ្តឹងទៅអភិបាលខេត្ត នៅខែ ឧសភា ឆ្នាំ ២០១៧ ប៉ុន្តែរដ្ឋមន្ត្រីក្រសួងកសិកម្ម លោក វេង សាខុន មិនបានបញ្ឈប់អាជ្ញាប័ណ្ណទេរហូតដល់ថ្ងៃទី ១១ ខែមករា។ ឥឡូវនេះតំបន់នោះត្រូវបានជម្រះព្រៃរួចរាល់អស់ហើយដូច្នេះអាជ្ញាធរមូលដ្ឋាននឹងសាងសង់ផ្លូវនោះដោយខ្លួនឯងនិងអនុញ្ញាតឱ្យអ្នកភូមិប្រមាណ ៧០០ នាក់អាចផ្លាស់ទីលំនៅទៅកាន់តំបន់នោះបាន។
លោក កែវ អ៊ុំម៉ាលីស អនុប្រធានក្រសួងកសិកម្មថ្លែងថា ជាទូទៅ ដីសម្បទានសង្គមកិច្ចគឺត្រូវផ្តល់ឱ្យតែប្រជាពលរដ្ឋក្រីក្រឬទាហ៊ានប៉ុណ្ណោះហើយការម្រេចចិត្តណាមួយទៅលើក្រុមហ៊ុនឯកជនគឺត្រូវធ្វើឡើងដោយអាជ្ញាធរខេត្តតែមួយប៉ុណ្ណោះ។
ក្រុមហ៊ុនដួងស្រួចមិនអាចទាក់ទងបានទេ កាលពីពុធ ហើយ វានៅមិនទាន់ច្បាស់ទេថាតើក្រុមហ៊ុននឹងប្រឈមផលវិបាកអ្វីខ្លះនោះ។ ហើយវាក៏កំពុងស្ថិតនៅក្រោមការស៊ើបអង្កេតនៅឯខេត្តមណ្ឌលគិរី ផងដែរ ដែលកម្មករជាជនសង្ស័យចំនួនប្រាំបីនាក់ត្រូវបានចាប់ខ្លួនពីបទកាប់ឈើខុសច្បាប់៕ NS