ភ្នំពេញៈ រដ្ឋមន្ត្រីក្រសួងការងារ លោក អ៊ិត សំហេង ឲ្យដឹងថា ក្រសួងកំពុងពិនិត្យលទ្ធភាព និងស្នើទៅរដ្ឋាភិបាល ដើម្បីបើករោងជាងដែលជាបន្ទប់អនុវត្តទ្រឹស្តីឡើងវិញ បន្ទាប់ពីសមាគមគ្រឹះស្ថានឧត្តមសិក្សាបច្ចេកទេស និងវិជ្ជាជីវៈស្នើសុំឲ្យមានការបើកដំណើរការឡើងវិញ ចំពោះវិទ្យាស្ថានដែលស្ថិតក្រោមការគ្រប់គ្រងរបស់ក្រសួងការងារ ក្រោយផ្អាកដោយសារជំងឺកូវីដ១៩។
ក្នុងជំនួបពិភាក្សាការងារកាលពីថ្ងៃចន្ទជាមួយសមាគមគ្រឹះស្ថាន ឧត្តមសិក្សាបច្ចេកទេស និងវិជ្ជាជីវៈដឹកនាំដោយលោក ណុប នរិន្ទ ដែលជាប្រធានសមាគមនាទីស្តីការក្រសួងការងារ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈថ្លែងថា រាជរដ្ឋាភិបាលបានគ្រប់គ្រងស្ថានការណ៍នៃការរីករាលដាលនៃជំងឺកូវីដ១៩បានយ៉ាងល្អប្រសើរ គឺមិនមានពលរដ្ឋខ្មែរណាម្នាក់ស្លាប់ដោយសារបញ្ហានេះនៅឡើយទេ។
លោកក៏បានសុំការយោគយល់ពីសាលា វិទ្យាស្ថាន ក៏ដូចជាគ្រឹះស្ថានសិក្សានានាដែលរាជរដ្ឋាភិបាលបានសម្រេចផ្អាកនាពេលនេះ ដើម្បីបញ្ចៀសពីការចម្លងជំងឺកូវីដ១៩ នៅក្នុងសហគមន៍។ ក្នុងឱកាសនោះ លោក អ៊ិត សំហេង បញ្ជាក់ថាក្រសួងកំពុងពិនិត្យលទ្ធភាពបើករោងជាងដែលជាបន្ទប់សម្រាប់អនុវត្តទ្រឹស្តីនៅតាមសាលាបច្ចេកទេសជាមុនសិន។ លោកថា រាល់សំណើរបស់សមាគម ក្រសួងការងារនឹងពិនិត្យពិចារណាដាក់ស្នើបន្តទៅសុំការសម្រេចពីរាជរដ្ឋាភិបាល។
លោកបញ្ជាក់ថា៖ «[ទោះ] យ៉ាងណាសម្រាប់វិស័យអប់រំ យើងបានបើកជា ៣ ដំណាក់កាល ដំណាក់កាលទី ១ គឺបើកសាលាណាដែលមានសុវត្ថិភាពអនាម័យខ្ពស់រួមមានកូនមន្ត្រីទូត កូនអ្នកជំនួញ ឬអ្នកវិនិយោគបានរៀនសូត្រនៅកម្ពុជា ហើយក៏កំពុងពិនិត្យលទ្ធភាព បើកជំហានទី ២ និងទី ៣ ជាបន្តបន្ទាប់។ ជាពិសេសក៏កំពុងពិនិត្យលទ្ធភាពបើករោងជាងជាមុនសិន ដែលយើងបានកំពុងធ្វើការស្នើសុំរង់ចាំការសម្រេចពីរាជរដ្ឋាភិបាល»។
លោករដ្ឋមន្ត្រីបន្ថែមថា៖ «បើសិនជា មានការអនុញ្ញាតពីរាជរដ្ឋាភិបាលហើយ គឺត្រូវតែធានាឱ្យបាននូវលក្ខខណ្ឌអនាម័យខ្ពស់ ហើយបង្កើតឲ្យមានក្រុមការងារចុះអង្កេតគ្រប់សាលា ទាំងរដ្ឋ និងឯកជន។ បើរកឃើញថា មិនបានអនុវត្តតាមគោលការណ៍ណែនាំបានល្អទេនឹងត្រូវផ្អាកវិញជាបន្ទាន់»។
លោក ណុប នរិន្ទ ប្រធានសមាគមគ្រឹះស្ថានឧត្តមសិក្សាបច្ចេកទេស និងវិជ្ជាជីវៈលើកឡើងថា ក្នុងរយៈពេលជិត ២ ឆ្នាំកន្លងមកនេះសមាគមបានចូលរួមសកម្មភាពសង្គមជាច្រើន ហើយក៏បានជួបប្រទះនូវបញ្ហាប្រឈមមួយចំនួនផងដែរ។ ខណៈដែលសាលាបណ្តុះបណ្តាលទូទាំងប្រទេសកំពុងបិទទ្វារ ដោយរងផលប៉ះពាល់ពីការរីករាលដាលនៃជំងឺកូវីដ ១៩ លោកក៏បានស្នើក្រសួងការងារ និងបណ្តុះបណ្តាលវិជ្ជាជីវៈឲ្យបើកវិទ្យាស្ថានបណ្តុះបណ្តាល ដែលស្ថិតក្រោមក្រសួងឡើងវិញ។
លោកថ្លែងថា៖ «ស្នើសុំឱ្យមានការបើកឱ្យដំណើរការឡើងវិញ ចំពោះវិទ្យាស្ថានដែលស្ថិតក្រោមការគ្រប់គ្រងរបស់ក្រសួង។ ស្នើសុំជ្រើសរើសនិស្សិតឱ្យចូលរៀនវិញដោយអនុវត្តតាមគោលការណ៍ណែនាំរបស់ក្រសួងសុខាភិបាល និងក្រសួងការងារ ដោយសារតែសមាជិកនៃសមាគម កំពុងជួបនូវបញ្ហាថ្លៃជួលអគារសិក្សាក៏ដូចជាចំណាយផ្សេងៗក្នុងកិច្ចដំណើរការរបស់វិទ្យាស្ថាន ជាពិសេសការផ្តល់សេវានានារបស់ខ្លួនក្នុងដំណាក់កាលនៃវិបត្តិជាសកលនេះ»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាល វិជ្ជាជីវៈ ប្រាប់ភ្នំពេញប៉ុស្តិ៍ ពីម្សិលមិញថា គម្រោងបើកដំណើរការរោងជាងគឺសំដៅដល់បន្ទប់អនុវត្តទ្រឹស្តី ព្រោះជាទូទៅការបង្រៀនទ្រឹស្តីគឺអាចធ្វើឡើងតាមរយៈអនឡាញបាន។ ប៉ុន្តែលោកថា ចំពោះការសិក្សាផ្នែកអប់រំ និងបណ្តុះបណ្តាលវិជ្ជាជីវៈបច្ចេកទេស (TVET) គឺត្រូវការបន្ទប់អនុវត្តទ្រឹស្តីបន្ថែមទៀត ដើម្បីឲ្យសិស្សានុសិស្ស អនុវត្តនូវមេរៀនដែលពួកគេបានសិក្សា។
លោក ផៃ ស៊ីផាន អ្នកនាំពាក្យរាជរដ្ឋាភិបាលប្រាប់ភ្នំពេញប៉ុស្តិ៍កាលពីម្សិលមិញថា ការសម្រេចចំពោះបញ្ហាទាំងអស់នេះគឺអាស្រ័យទៅលើគណៈកម្មការដែលបានបង្កើតឡើងដើម្បីទប់ស្កាត់បញ្ហាកូវីដ១៩។ លោកបានបន្តថា រដ្ឋាភិបាលនឹងរង់ចាំការពិភាក្សាឲ្យបានច្បាស់ថា តើកម្ពុជាមានលទ្ធភាពកម្រិតណាក្នុងការដាក់ឲ្យដំណើរការស្ថាប័ន ដែលបានផ្អាកកន្លងទៅឡើងវិញ ដើម្បីធ្វើយ៉ាងណាអាចធានាបាននូវការមិនផ្ទុះឡើងនូវជំងឺនេះ។
លោក ស៊ីផាន បានបញ្ជាក់ថា៖ «រដ្ឋាភិបាលកំពុងតែសម្លឹងមើល ដើម្បីស្វែងរកវិធានការដែលកាត់បន្ថយនូវហានិភ័យ ដែលពាក់ព័ន្ធនឹងជំងឺកូវីដ១៩ដូចជារក្សាគម្លាត។ យើងកំពុងតែពិភាក្សាហើយ នឹងគ្រោងបើកសាលារៀនមួយជំនាន់ៗបន្តិចម្តងៗ ដើម្បីរក្សាវិធានការរបស់ក្រសួងសុខាភិបាល។ ដូច្នេះសំណើរបស់ក្រសួងការងារហ្នឹងគឺស្ថិតនៅក្នុងវិស័យអប់រំដូចគ្នា ហើយសំណើទាំងអស់នេះ គឺរង់ចាំសេចក្តីសម្រេចរបស់គណៈកម្មការហ្នឹង បន្ទាប់ពីសិក្សាឲ្យបានច្បាស់»៕