ភ្នំពេញ: ក្រសួងការងារ និងបណ្តុះបណ្តាលវិជ្ជាជីវៈបានប្រកាសជ្រើសរើសបេក្ខជនចំនួន ១៩ ១៧៩ នាក់ ឱ្យទទួលអាហារូបករណ៍ចូលរៀនថ្នាក់សញ្ញាបត្របច្ចេកទេស និងវិជ្ជាជីវៈនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈចំនួន ៣៨ នៅទូទាំងប្រទេសសម្រាប់ឆ្នាំ ២០២១ នេះ ដើម្បីផ្ដល់ជំនាញដល់ពួកគេ។
សេចក្ដីជូនដំណឹងដែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈចុះថ្ងៃទី ១១ ខែ ធ្នូ ឆ្នាំ ២០២០ ដែល ភ្នំពេញ ប៉ុស្ដិ៍ ទើបទទួលបានពីម្សិលមិញឱ្យដឹងថា ក្នុងឆ្នាំសិក្សា ២០២០-២០២១ នេះក្រសួងនឹងជ្រើសរើសបេក្ខជនចំនួន ១៩ ១៧៩ នាក់ ឱ្យទទួលអាហារូបករណ៍ចូលរៀនថ្នាក់បរិញ្ញាបត្របច្ចេកទេស និងវិជ្ជាជីវៈ ១ (C1) ២ (C2) និង ៣ (C3) ថ្នាក់សញ្ញាបត្រជាន់ខ្ពស់/បរិញ្ញាបត្ររង បច្ចេកទេស/ឯកទេស (HDT/S) និងថ្នាក់បរិញ្ញាបត្របច្ចេកវិទ្យា/ឯកទេស/សញ្ញាបត្រវិស្វករ (BT/S/BE) ទៅតាមចំនួនជំនាញមុខរបរ និងគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈមួយចំនួន។
សេចក្ដីជូនដំណឹងបន្តថា គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទាំងនោះរួមមាន វិទ្យាស្ថានជាតិពហុបច្ចេកទេសកម្ពុជា វិទ្យាស្ថានជាតិបណ្ដុះបណ្ដាលបច្ចេកទេស វិទ្យាស្ថានពហុបច្ចេកទេសព្រះកុសុមៈ វិទ្យាស្ថានជាតិពាណិជ្ជសាស្ត្រ វិទ្យាស្ថានជាតិសហគ្រិនភាព និងនវានុវត្តន៍ វិទ្យាស្ថានពហុបច្ចេកទេសភូមិភាគតេជោសែនបាត់ដំបង និងវិទ្យាស្ថានបណ្ដុះបណ្ដាលតាមបណ្ដាខេត្តមួយចំនួនទៀត។
សេចក្ដីជូនដំណឹងបញ្ជាក់ថា៖ «បេក្ខជនត្រូវមកទទួលពាក្យសុំអាហារូបករណ៍នៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈដែលខ្លួនមានបំណងចង់សិក្សារាល់ម៉ោងធ្វើការ។ កាលបរិច្ឆេទឈប់ទទួលពាក្យនឹងជូនដំណឹងដោយសាមីគ្រឹះស្ថានអប់រំ បណ្ដុះបណ្ដាលបច្ចេកទេស និងវិជ្ជាជីវៈនីមួយៗ»។
លោក ប៉ែន ប៉ាត មន្ត្រីទទួលពាក្យសុំអាហារូបករណ៍នៃមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរីថ្លែងពីម្សិលមិញថា មជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរីបានប្រកាសជ្រើសរើសសិស្ស-និស្សិតជិត ៥០០ នាក់ឱ្យចូលរៀនជំនាញជាច្រើននៅក្នុងមជ្ឈមណ្ឌល។
លោកបញ្ជាក់ថា៖ «យើងចាប់ផ្ដើមទទួលពាក្យចាប់ពីពេលនេះតទៅ ហើយក៏មានសិស្សមកដាក់ពាក្យបណ្ដើៗដែរ។ សាលាយើងមានជំនាញជាច្រើនសម្រាប់ផ្ដល់ជាជម្រើសដល់សិស្ស-និស្សិត គឺជំនាញអគ្គិសនីខាងជួសជុលគ្រឿងអេឡិចត្រូនិក ជួសជុលម៉ាស៊ីនឡាន-ម៉ូតូ និងគ្រឿងយន្តផ្សេងៗទៀត»។
លោកបន្ថែមថា ក្រោយពេលបញ្ចប់ការសិក្សា សិស្ស-និស្សិតទាំងអស់អាចមានសមត្ថភាពបំពេញការងារតាមជំនាញរបស់ពួកគាត់យ៉ាងមានប្រសិទ្ធភាព។ ក្រុមហ៊ុនឯកជនមួយចំនួនតែងតែមកទំនាក់ទំនងខាងសាលាដើម្បីស្នើសុំសិស្សឆ្នើមទៅបម្រើការងារនៅក្រុមហ៊ុន។
មន្ត្រីទទួលពាក្យសុំអាហារូបករណ៍នៃមជ្ឈមណ្ឌលបណ្ដុះបណ្ដាលវិជ្ជាជីវៈខេត្តព្រៃវែងម្នាក់ សុំមិនបញ្ចេញឈ្មោះថ្លែងថា មជ្ឈមណ្ឌលបណ្ដុះបណ្ដាលវិជ្ជាជីវៈខេត្តព្រៃវែងប្រកាសជ្រើសរើសសិស្សឱ្យចូលរៀនចំនួន ៧០០ នាក់ ប៉ុន្ដែត្រូវឆ្លងកាត់ការប្រឡងជ្រើសរើសជាមុន។ ក្នុងនោះនឹងមានផ្ដល់អាទិភាពចំពោះសិស្សក្រីក្រ និងសិស្សជាជនជាតិដើមភាគតិច។
លោកថា៖ «កម្មវិធីអាហារូបករណ៍នេះ គឺយើងជ្រើសរើសជារៀងរាល់ឆ្នាំ ប៉ុន្ដែឆ្នាំនេះរៀងយឺតបន្ដិចដោយសារវិបត្តិកូវីដ ១៩។ កម្មវិធីសិក្សាមានជំនាញរយៈពេលខ្លីចាប់ពី ៤ ខែដល់ ៨ ខែ រីឯជំនាញរយៈពេលវែងចាប់ពី ១០ ខែដល់ ១៨ ខែ។ ប្រសិនពួកគាត់បញ្ចប់ការសិក្សាគឺពួកគាត់អាចធ្វើការងារបានតែម្ដង»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យសាទរចំពោះការផ្ដល់អាហារូបករណ៍ដល់សិស្ស-និស្សិត និងយុវជនក្រក្រីប៉ុន្ដែលោកស្រីជំរុញឱ្យមជ្ឈមណ្ឌលបណ្ដុះបណ្ដាល វិជ្ជាជីវៈតាមបណ្ដាខេត្ត ក្រុងទាំងអស់ត្រូវតែរៀបចំឱ្យមានតម្លាភាព យុត្តិធម៌ និងគ្មានអំពើពុករលួយ។
លោកស្រីបញ្ជាក់ថា៖ «ខ្ញុំគិតថា បើទោះជាពួកគាត់មិនបានរៀនចប់ថ្នាក់ឧត្តមសិក្សា ឬមហាវិទ្យាល័យក៏ដោយ យើងត្រូវតែផ្ដល់ឱកាសឱ្យពួកគាត់ជាយុវជន យុវនារីហ្នឹងបានសិក្សា រៀនសូត្រពីជំនាញ បច្ចេកទេស និងវិជ្ជាជីវៈតាមសមត្ថភាពរបស់ពួកគាត់។ ខ្ញុំលើកឧទាហរណ៍មួយថា យើងកុំយកត្រីទៅឱ្យពួកគាត់ហូប ប៉ុន្ដែយើងត្រូវតែបង្រៀនពួកគាត់ ឱ្យចេះស្ទូចត្រីវិញ ទើបប្រសើរជាង»៕