.jpg)
កម្មករជិះរថយន្តនៅលើផ្លូវជាតិលេខ ៥ ពេលចេញពីរោងចក្រទៅផ្ទះ។ ហុង មិនា
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានណែនាំពីនីតិវិធី និងរបៀបនៃការព្យួរការងារ និងទាមទារឲ្យកម្មករត្រូវរៀនវគ្គបណ្តុះបណ្តាលជំនាញទន់ ដើម្បីទទួលបានប្រាក់ឧបត្ថម្ភ ២០ ភាគរយបន្ថែមពីរដ្ឋាភិបាល ក្នុងករណីដែលមានរោងចក្រណាមួយប្រកាសព្យួរការងារ ប៉ុន្តែអ្នកនាំពាក្យក្រសួងអះអាងថា មកដល់ពេលនេះមិនទាន់មានរោងចក្រណាមួយប្រកាសព្យួរការងារ ១០០ ភាគរយនៅឡើយទេ។
ក្រសួងការងារបានឲ្យដឹងថា ដើម្បីកាត់បន្ថយផលប៉ះពាល់លើវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប ដែលខ្វះវត្ថុធាតុដើមពីប្រទេសផ្គត់ផ្គង់វត្ថុធាតុដើម ដោយសារប្រទេសនោះរងផលប៉ះពាល់ជំងឺរលាកផ្លូវដង្ហើម (CoVid-19) ដូច្នេះក្រសួងការងារបានណែនាំដល់គ្រប់ប្រធានអង្គភាពក្រោមឱវាទក្រសួង ម្ចាស់ ឬនាយករោងចក្រ និងកម្មករនិយោជិតអំពីនីតិវិធីសុំព្យួរកិច្ចសន្យាការងារ ការចុះឈ្មោះចូលរៀនវគ្គបណ្តុះបណ្តាល និងការស្នើសុំផ្អាកបង់ភាគទាន និងការបន្តផ្តល់ (ប.ស.ស.) ជាដើម។
ក្រសួងបានឲ្យដឹងបន្តថា នៅពេលមានរោងចក្រណាមួយប្រកាសព្យួរការងារ ១០០ ភាគរយនោះប្រាក់ឧបត្ថម្ភ ៤០ ភាគរយ នៃ ១៩០ ដុល្លារ នឹងត្រូវបានផ្តល់ជូនដល់កម្មករពីសំណាក់ថៅកែរោងចក្រចំណែក ២០ ភាគរយនៃ ១៩០ ដុល្លាទៀត គឺក្រុមកម្មករត្រូវតែបំពេញបែបបទ ដើម្បីចុះឈ្មោះចូលរៀនជំនាញដែលរៀបចំដោយមន្ត្រីនៃក្រសួងការងារនៅតាមរោងចក្រតែម្តង។
ក្រសួងបានណែនាំបន្តថាក្នុងអំឡុងពេលព្យួរការងារនោះបណ្តារោងចក្រទាំងនោះក៏ត្រូវបានអនុញ្ញាតឲ្យផ្អាកបង់ភាគទានមកកាន់ ប.ស.ស ជាបណ្តោះអាសន្នផងដែរ ប៉ុន្តែកម្មករនៅតែអាចប្រើប្រាស់សេវាកម្មផ្នែកថែទាំសុខភាព និងបន្តទទួលបានតាវកាលិកផ្នែកហានិភ័យការងារ និងប្រាក់ឧបត្ថម្ភនានា ពី ប.ស.ស បានដដែល។
ក្រសួងការងារបានបញ្ជាក់ថា៖ «លេខាធិការដ្ឋាននៃគណៈកម្មការប្រឹក្សាការងារត្រូវសហការជាមួយនាយកគម្រោង និងភាគីពាក់ព័ន្ធនៃគម្រោងរោងចក្រកាន់តែប្រសើរនៅកម្ពុជា ដើម្បីផ្សព្វផ្សាយអំពីវឌ្ឍនភាពវិជ្ជមានជាបន្តបន្ទាប់នៃលក្ខខណ្ឌការងារ សិទ្ធិការងារ និងសេរីភាពអង្គការវិជ្ជាជីវៈនៅកម្ពុជាដល់កម្មករនិយោជិត សារព័ត៌មានជាតិ អន្តរជាតិ និងដៃគូអភិវឌ្ឍន៍នានា»។
លោក ហេង សួរ អ្នកនាំពាក្យក្រសួងការងារ បណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍ថា ចំពោះកម្មវិធីបណ្តុះបណ្តាលដល់កម្មករ គ្រាន់តែការណែនាំពីរបៀប និងបែបបទតែប៉ុណ្ណោះ ខណៈមកដល់ពេលនេះមិនទាន់មានរោងចក្រណាមួយប្រកាសព្យួរការងារកម្មករទាំងស្រុងនោះទេ។
លោកបន្តថា៖ «មកដល់ពេលនេះមានតែកម្មករចំនួន ១០ រោងចក្រប៉ុណ្ណោះបានព្យួរ ប៉ុន្តែមិនមែនជាការព្យួរ ១០០ ភាគរយនោះទេ គឺព្យួរជារបៀបដោយផ្នែកៗនៃចង្វាក់ផលិតកម្មដែលមិនមានបងប្អូនកម្មករនិយោជិតណាមួយអត់ការងារធ្វើ ១០០ ភាគរយនោះទេ ហើយរោងចក្រក៏មិនទាន់មានការស្នើសុំការអនុវត្តវិធានការសុំអន្តរាគមន៍ពីរដ្ឋាភិបាលក្នុងករណី (ព្យួរការងារ) នេះនៅឡើយដែរ»។
លោក ហេង សួរ បានឲ្យដឹងថានៅក្នុងខែមីនានេះនឹងមានរោងចក្រ សហគ្រាស ប្រហែលជាជិត ២០០ ដែលនឹងប៉ះពាល់ដល់កម្មករប្រមាណ ១៦ ម៉ឺននាក់ នឹងត្រូវប្រឈមដោយការប្រកាសព្យួរការងារ ដោយកត្តាកង្វះវត្ថុធាតុដើមសម្រាប់ផលិត។
លោក ប៉ាវ ស៊ីណា ប្រធានសហជីពចលនាកម្មករបានសាទរចំពោះចំណាត់ការបណ្តោះអាសន្នរបស់ក្រសួងការងារដែលបានបង្កើតជាវគ្គបណ្តុះបណ្តាលដល់កម្មករ ប៉ុន្តែកត្តានេះអាចនឹងផ្តល់ការលំបាកខ្លះដល់កម្មករ ស្របពេលដែលកម្មករត្រូវបំពេញលក្ខខណ្ឌមួយចំនួន ដើម្បីទទួលបានប្រាក់ឧបត្ថម្ភ ២០ ភាគរយបន្ថែមពីរដ្ឋាភិបាល។
លោកក៏បានថ្លែងដោយក្ដីបារម្ភផងដែរថា បើបញ្ហានេះនៅតែបន្តអូសបន្លាយនោះនឹងគំរាមកំហែងដល់វិស័យកាត់ដេរនៅកម្ពុជា ព្រោះជាទូទៅមិនមានវិស័យណាអាចមកជំនួសវិស័យកាត់ដេរនេះបានទេ ហើយបើសិនជាកម្មកររាប់ម៉ឺននាក់ប្រឈមនឹងអត់ការងារធ្វើនោះក៏ពិបាករកការងារថ្មីក្នុងវិស័យផ្សេងមកជំនួសបានដែរ។
លោកថ្លែងថា៖ «ការងារផ្សេងត្រូវបានកាត់បន្ថយ បុគ្គលិកខ្លះត្រូវបានរំសាយ និងព្យួរ ដូច្នេះខ្ញុំគិតថាវានឹងប៉ះពាល់ព្រោះតែបញ្ហានេះប៉ះពាល់ដល់ហិរញ្ញវត្ថុផ្ទាល់ខ្លួន»៕
