.jpg)
អ្នកចូលរួមនៅក្នុងសន្និសីទសារព័ត៌មានអំពីពិព័រណ៍ការងារ និងផលិតភាពជាតិ ២-៣ វិច្ឆិកា ២០១៩ កាលពីថ្ងៃចន្ទ។ ហេង ជីវ័ន
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ក្រុមហ៊ុនឯកជនជាតិ និងអន្តរជាតិ ២០០ ក្រុមហ៊ុន នឹងចូលរួមពិព័រណ៍ការងារ និងផលិតភាពជាតិឆ្នាំ ២០១៩ ចំនួន ២ ថ្ងៃ នៅដើមខែវិច្ឆិកា ហើយក្នុងអំឡុងពេលនោះក្រុមហ៊ុននានាត្រូវការជ្រើសរើសបុគ្គលិកចំនួន ២ ម៉ឺននាក់។
ពិព័រណ៍ការងារ និងផលិតភាពជាតិគឺជាព្រឹត្តិការណ៍មួយដែលចាប់ផ្ដើមពីថ្ងៃទី ២-៣ ខែវិច្ឆិកា នៅអគារពិព័រណ៍កោះពេជ្រ ដើម្បីផ្តល់នូវទីកន្លែងជួបជុំគ្នាដោយងាយស្រួលសម្រាប់និយោជកអ្នកផ្តល់ការអប់រំបណ្តុះបណ្តាល អ្នកស្វែងរកការងារធ្វើ និងកម្មករនិយោជិតក្នុងការទទួលបានឱកាសការងារ ជ្រើសរើសបុគ្គលិក និងចែករំលែកព័ត៌មានទីផ្សារការងារ។
លោក ហៃ ហ៊ុនឡេង ប្រធានទីភ្នាក់ងារជាតិមុខរបរ និងការងារនៃក្រសួងការងារបានថ្លែងនៅក្នុងសន្និសីទកាសែតកាលពីថ្ងៃចន្ទថា នេះគឺជាលើកទី ៩ ហើយដែលកម្ពុជាបានរៀបចំឲ្យមានពិព័រណ៍ការងារ និងផលិតភាពជាតិ បន្ទាប់ពីលើកដំបូងបានចាប់ផ្តើមតាំងពីឆ្នាំ ២០១១។ សម្រាប់ឆ្នាំ ២០១៩ នេះក្រសួងការងារ និងបណ្តុះបណ្តាលវិជ្ជាជីវៈក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរនៅកម្ពុជា (GMAC) នឹងរួមគ្នារៀបចំមហាព្រឹត្តិការណ៍ដ៏ធំប្រចាំឆ្នាំនេះជាថ្មីទៀត។
លោកអះអាងថា ឱកាសការងារគ្រប់ប្រភេទប្រមាណ ២ ម៉ឺនមុខតំណែង ដែលផ្តល់ដោយក្រុមហ៊ុនសហគ្រាសធំៗមកពីវិស័យឯកជនសុទ្ធសាធជាង ១៥០ បន្ថែមពីនោះក្នុងនោះមានដៃគូសហការជាច្រើនទៀត ដែលជាក្រសួងស្ថាប័ន ដៃគូអភិវឌ្ឍន៍ជាតិ និងអន្តរជាតិ។ កន្លែងការងារទាំងនោះមានក្នុងពីវិស័យសំខាន់ៗដូចជា ធនាគារ និងគ្រឹះស្ថានមីក្រូហិរញ្ញវត្ថុច្រើន បន្ទាប់មកមានផ្នែកសំណង់ សណ្ឋាគារ និងបដិសណ្ឋារកិច្ច ទូរគមនាគមន៍ ការអប់រំ និងបណ្តុះបណ្តាលបច្ចេកទេសវិជ្ជាជីវៈកម្មន្តសាល។
លោក ហៃ ហ៊ុនឡេង (កណ្ដាល) ប្រធានទីភ្នាក់ងារជាតិមុខរបរនៃក្រសួងការងារ។ហេង ជីវ័ន
លោក ហៃ ហ៊ុនឡេង បានឲ្យដឹងដែរថាក្រៅពីទទួលបានឱកាសការងាររាប់ម៉ឺនកន្លែង អ្នកចូលរួមនឹងទទួលបានព័ត៌មានពីផែនការ តម្រូវការ និងគោលនយោបាយក្នុងការជ្រើសរើសកម្លាំងពលកម្មនាពេលបច្ចុប្បន្ន និងអនាគតកម្មវិធីសិក្សា អាហារូបករណ៍ វគ្គសិក្សា និងកម្មវិធីអភិវឌ្ឍជំនាញ។ យោងតាមសេចក្តីប្រកាសព័ត៌មានរបស់ក្រសួងការងារបានឲ្យដឹងថា មហាព្រឹត្តិការណ៍នេះនឹងរៀបចំផងដែរនូវសិក្ខាសាលាស្តីពីផលិតភាពដើម្បីចូលរួមលើកកម្ពស់ការយល់ដឹងពីផលិតភាព ការបង្ហាញអំពីវិធីសាស្ត្របំពេញការងារ គំនិតច្នៃប្រឌិតថ្មី ជំនាញ និងឧបករណ៍បច្ចេកវិទ្យាស្របតាមការវិវត្តនៃបច្ចេកវិទ្យាក្នុងយុគសម័យឧស្សាហកម្មទី ៤ ដែលពឹងផ្អែកជាចម្បងលើប្រព័ន្ធឌីជីថល។
លោក សុំ មនោរម្យ ប្រធានលេខាធិការដ្ឋានសហភាពសហព័ន្ធយុវជនកម្ពុជា បានឲ្យដឹងថា សិក្ខាសាលារយៈពេលពីរថ្ងៃនឹងនាំមកនូវវាគ្មិនជាតិអន្តរជាតិល្បីៗដើម្បីចូលរួមចែករំលែកចំណេះដឹង បទពិសោធ និងការអនុវត្តល្អលើប្រធានបទពាក់ព័ន្ធការបង្កើនផលិតភាពការងារប្រកបដោយភាពជោគជ័យកន្លងមក។ យុវជន សិស្សនិស្សិត អ្នកស្វែងរកការងារធ្វើ និងកម្មករនិយោជិតទាំងអស់ចូលរួមទស្សនា និងអាចត្រៀម CV តាមជំនាញរៀងៗខ្លួន។
លោកបញ្ជាក់ថា៖ «យើងបានចូលរួមផ្សព្វផ្សាយទៅដល់យុវជនរបស់យើង ជាពិសេសយុវជនដែលកំពុងតែសិក្សាតាមសាកលវិទ្យាល័យនានាក្នុងភ្នំពេញ ក៏ដូចជាប្អូនៗដែលទើបតែបញ្ចប់ថ្នាក់ទី ១២ ដែលនេះគឺគោលដៅសំខាន់ដែលយើងបានចូលរួមផ្សព្វផ្សាយ ដើម្បីឲ្យបានទៅដល់ដៃប្អូនៗ»។
អ្នកស្រី សុភ័ក្រ តំណាងមកពីធនាគារ PPC Bank បានឲ្យដឹងថា សម្រាប់ឆ្នាំនេះ ធនាគារ រំពឹងទុកថានឹងមានអ្នកមកដាក់ការងារថ្មីនៅធនាគារនេះ ចន្លោះពី ៣០០ ទៅ ៤០០ នាក់។
អ្នកស្រីថ្លែងថាក្នុងពេលបច្ចុប្បន្នតម្រូវការធនធានមនុស្សក្នុងវិស័យធនាគារមានច្រើនជាងធនធានមនុស្សដែលមាន។ ដូច្នេះធ្វើឲ្យសិស្សានុសិស្សដែលកំពុងស្វែងរកការងារធ្វើមានឱកាសច្រើនជាងវិស័យផ្សេងៗ។ សម្រាប់ក្នុងឱកាសនេះ អ្នកដែលកំពុងស្វែងរកការងារធ្វើ និងសិស្សដែលគាត់ទើបតែបញ្ចប់ការសិក្សា គួរតែត្រៀមខ្លួនជាស្រេចជាមួយនឹង CV ហើយនឹងការសម្រេចចិត្តខ្ពស់ថា ត្រូវជ្រើសរើសក្រុមហ៊ុនមួយណា ដែលគាត់នឹងផ្ញើអនាគតជាមួយ។ នៅពេលដែលគាត់តៀមខ្លួនរួចហើយ ពេលគាត់ទៅចូលរួមនោះ គាត់នឹងមានឱកាសច្រើនក្នុងការសម្ភាស។
យោងតាមសេចក្ដីប្រកាសព័ត៌មានរបស់ក្រសួងការងារឲ្យដឹងថា ពិព័រណ៍ដ៏ធំនេះត្រូវបានរំពឹងថាមានអ្នកចូលរួមទស្សនាជាង ៣ ម៉ឺននាក់ ដែលភាគច្រើនជាសិស្ស-និស្សិត យុវជន អ្នកស្វែងរកការងារ និងកម្មករនិយោជិតពីគ្រប់វិស័យ អាចនឹងចូលរួមទស្សនាឱកាសការងារ និងទទួលបានបទពិសោធថ្មីៗដែលនឹងត្រូវបានតាំងបង្ហាញនៅក្នុងបញ្ជរសរុបចំនួន ៣០៕
