ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈប្រកាសផ្តល់ប្រាក់ឧបត្ថម្ភដល់កម្មករនិយោជិតដែលបន្តព្យួរការងារប្រមាណ ១ ម៉ឺន ២ ពាន់នាក់ សម្រាប់ជុំទី ៧ ខណៈលោករដ្ឋមន្ត្រី អ៊ិត សំហេង ស្នើឲ្យមន្ត្រីបន្តយកចិត្តទុកដាក់ដោះស្រាយនូវការទាមទាររបស់ពលរដ្ឋ និងកម្មករនិយោជិតឱ្យកាន់តែមានប្រសិទ្ធភាពក្នុងអំឡុងពេលកូវីដ ១៩។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈថ្លែងក្នុងកិច្ចប្រជុំគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា (គ.ក.ប) នៅថ្ងៃទី ២៣ មិថុនាថា គ.ក.ប. គ្រប់កម្រិតរួមទាំងរាជធានី-ខេត្តត្រូវបន្តយកចិត្តទុកដាក់ដោះស្រាយនូវអ្វីដែលជាបញ្ហានៃការទាមទាររបស់ពលរដ្ឋ និងកម្មករនិយោជិតឱ្យកាន់តែមានប្រសិទ្ធភាព និងស័ក្តិសិទ្ធិភាព។
លោកបន្តថា រាល់ករណីកូដកម្ម បាតុកម្មដែលកើតឡើងនៅតាមភូមិសាស្ត្រណាមួយ គណៈបញ្ជាការឯកភាព និងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅគ្រប់មុខសញ្ញា ត្រូវទទួលខុសត្រូវដឹកនាំដោះស្រាយរាល់ករណីជាក់ស្តែងនីមួយៗ។
លោកថា៖ «ជាពិសេសត្រូវក្តាប់នូវមូលហេតុនៃបញ្ហា ភ័ស្តុតាង និងមុខសញ្ញាជនឱកាសនិយមដែលញុះញង់ ឬធ្វើសកម្មភាពខុសច្បាប់។ ត្រូវខិតខំការពារសន្តិសុខសុវត្ថិភាពជូនសហជីពបងប្អូន កម្មករនិយោជិតដែលធ្វើកូដកម្ម បាតុកម្មស្របច្បាប់។ ក្នុងករណីមានអំពើហិង្សាត្រូវចាត់វិធានការតាមនីតិវិធីកសាងសំណុំរឿងបញ្ជូនទៅតុលាការ»។
សេចក្តីជូនដំណឹងរបស់ក្រសួងការងារចុះថ្ងៃទី ២៣ មិថុនា ឲ្យដឹងថា មានកម្មករនិយោជិតចំនួន ១២ ៧៦០ នាក់ នៃរោងចក្រ សហគ្រាសទាំង ៣៤ នៃវិស័យកាត់ដេរ និងវិស័យទេសចរណ៍ដែលទទួលបានការអនុញ្ញាតព្យួរការងារ នឹងទទួលប្រាក់ឧបត្ថម្ភទៅតាមការកំណត់ដែលនឹងត្រូវទទួលបានសម្រាប់ជុំទី៧ នេះ។
ក្រសួងបន្តថា សម្រាប់ជុំទី ៧ ការផ្តល់ជូននៅតែត្រូវបានបែងចែកជា ៣ ផ្នែកដដែលគឺសម្រាប់ការព្យួរ កិច្ចសន្យាការងាររយៈពេល ៧ ទៅ ១០ ថ្ងៃទទួលបានប្រាក់ឧបត្ថម្ភប្រមាណ ១៥ ដុល្លារ។ ឯការព្យួរកិច្ចសន្យាការងាររយៈពេល ១១ ទៅ ២០ ថ្ងៃទទួលបានប្រាក់ឧបត្ថម្ភប្រមាណ ៣០ ដុល្លារ និងការព្យួរកិច្ចសន្យាការងាររយៈពេល ២១ ថ្ងៃដល់ ១ ខែទទួលបានប្រាក់ឧបត្ថម្ភ ៤០ ដុល្លារ។
លោក ហេង សួរ អ្នកនាំពាក្យក្រសួងការងារប្រាប់ពីម្សិលមិញថាការបើកប្រាក់ឧបត្ថម្ភជូនកម្មកររហូតពេលនេះគឺមានកម្មករប្រមាណ ១៦៩ ១៦១ នាក់ហើយ។ ក្នុងនោះរដ្ឋបានបើកប្រាក់ឧបត្ថម្ភជូនកម្មករដែលត្រូវបានព្យួរការងារ ដោយចំណាយថវិកាប្រមាណ ១៥ ៩២០ ៤៧៥ ៥៣០ រៀល ឬប្រមាណ ៣,៩ លានដុល្លារ៕