ភ្នំពេញៈ ក្រសួងការងារ បណ្តុះបណ្តាលវិជ្ជាជីវៈ ណែនាំដល់ម្ចាស់រោងចក្រ សហគ្រាស គ្រឹះស្ថាន និងវិស័យទេសចរណ៍ក្នុងខេត្តចំនួន ៥ ឲ្យរៀបចំបំពេញនីតិវិធីនៃការព្យួរកិច្ចសន្យាការងារជាដាច់ខាត ដើម្បីងាយស្រួលដល់ក្រសួងធ្វើជាមូលដ្ឋានក្នុងការបង្វិលលុយ ៤០ ដុល្លារ ក្នុង ១ ខែដល់កម្មករនិយោជិតតាមរយៈធនាគារវីង។
កាលពីថ្ងៃទី ៧ ខែមេសា លោកនាយករដ្ឋមន្ត្រី ហ៊ុន សែន បានប្រកាសកែប្រែការផ្តល់ប្រាក់ឧបត្ថម្ភដល់កម្មករ កម្មការិនីកាត់ដេរពីការទទួលបាន ៦០ ភាគរយ ក្នុងអំឡុងពេលព្យួរការងារមកទទួលបានប្រាក់ ៧០ ដុល្លារវិញ ដោយក្នុងនោះ ៤០ ដុល្លារ ទទួលបានពីរដ្ឋាភិបាល និង ៣០ ដុល្លារទទួលបានពីថៅកែរោងចក្រ។
ជាមួយគ្នានេះសមាគមរោងចក្រកាត់ដេរនៅកម្ពុជា (GMAC) ស្នើឲ្យក្រសួងចេញសេចក្តីណែនាំឲ្យបានជាក់លាក់ ជុំវិញនីតិវិធីនៃការផ្តល់ប្រាក់ឧបត្ថម្ភនេះជូនដល់កម្មករ។ ព្រោះកន្លងទៅកម្មករមួយចំនួនអះអាងថា ពួកគេមិនទាន់ទទួលបានប្រាក់ឧបត្ថម្ភ ៤០ ដុល្លារពីរដ្ឋាភិបាលនៅឡើយ។
សេចក្តីណែនាំរបស់ក្រសួងការងារចុះថ្ងៃទី ១៧ មេសា ឲ្យដឹងថា ដើម្បីអាចឲ្យរដ្ឋាភិបាលផ្តល់ប្រាក់ឧបត្ថម្ភចំនួន ៤០ ដុល្លារបាន គឺម្ចាស់ ឬនាយករោងចក្រ សហគ្រាស គ្រឹះស្ថានក្នុងវិស័យវាយនភណ្ឌ កាត់ដេរ ផលិតស្បែកជើង ត្រូវរួមគ្នាជាដាច់ខាតបំពេញនូវនីតិវិធីនៃការព្យួរកិច្ចសន្យាការងារដែលកំណត់ដោយក្រសួងការងារ។
ក្រសួងថា ចំពោះកម្មករនិយោជិតក្នុងវិស័យទេសចរណ៍ដែលស្ថិតក្នុងរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប និងខេត្តកំពតមានដូចជាសណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ទាំងអស់ ដែលរងផលប៉ះពាល់ជាក់ស្តែងនាំឱ្យព្យួរសកម្មភាពផលិតកម្ម ឬអាជីវកម្មជាបណ្ដោះអាសន្ននោះក៏ត្រូវគោរពតាមលក្ខខណ្ឌនេះដូចគ្នា។
ក្រសួងបន្តថា៖ «ផ្សព្វផ្សាយ និង ជូនដំណឹងឲ្យបានទូលំទូលាយ និងជាចំហដល់កម្មករនិយោជិតដែលត្រូវបានព្យួរការងារឲ្យបានផ្តល់ជាដាច់ខាតនូវលេខអត្តសញ្ញាណប័ណ្ណ លេខទូរស័ព្ទផ្ទាល់ ឬសាច់ញាតិដើម្បីក្រសួងយកទៅ ធ្វើជាមូលដ្ឋានសម្រាប់ផ្ទេរប្រាក់ឧបត្ថម្ភចំនួន ៤០ ដុល្លារក្នុង ១ ខែតាមរយៈធនាគារឯកទេសវីង»។
ជាមួយគ្នានោះក្រសួងការងារបានព្រមានថា បើក្នុងករណីដែលម្ចាស់ ឬនាយករោងចក្រ សហគ្រាស គ្រឹះស្ថានដែលខកខានក្នុងការផ្សព្វផ្សាយ និងខកខានបំពេញតាមសេចក្តីណែនាំនេះគឺត្រូវទទួលខុសត្រូវបង់ជូនកម្មករនិយោជិតនូវប្រាក់ឧបត្ថម្ភរបស់រដ្ឋាភិបាលចំនួន ៤០ ដុល្លារ ក្នុង ១ ខែដោយខ្លួនឯង។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈ បានបញ្ជាក់ក្នុងសេចក្តីណែនាំថា នៅពេលដែលម្ចាស់សហគ្រាសក្នុងវិស័យកាត់ដេរ និងវិស័យទេសចរណ៍បានបំពេញគ្រប់លក្ខខណ្ឌហើយនោះ កម្មករនិយោជិតនឹងទទួលប្រាក់ឧបត្ថម្ភពីនិយោជក ១០ ដុល្លារ និងពីរដ្ឋាភិបាលចំនួន ១៥ ដុល្លារនៅពេលរោងចក្រ សហគ្រាស ប្រកាសព្យួរការងាររយៈពេលត្រឹមតែ ៧ ថ្ងៃដល់ ១០ ថ្ងៃ។
លោកបន្តថា បើក្នុងករណីរោងចក្រ សហគ្រាស ប្រកាសព្យួរការងាររយៈពេលពី ១០ ដល់ ២០ ថ្ងៃ កម្មករនិយោជិតនឹងទទួលប្រាក់ឧបត្ថម្ភពីនិយោជក ២០ ដុល្លារ និងពីរដ្ឋាភិបាល ៣០ ដុល្លារ។ ក្នុងករណីដែលរោងចក្រ សហគ្រាស ប្រកាសព្យួរការងារពេញ ១ ខែនោះនឹងទទួលបាន ៣០ ដុល្លារពីនិយោជក និង ៤០ ដុល្លារពីរដ្ឋាភិបាល។
លោក អ៊ិត សំហេង បញ្ជាក់ថា៖ «ក្រោយពេលព្យួរកិច្ចសន្យាចំនួន ១០ ថ្ងៃ កម្មករនិយោជិតនឹងទទួលបានសារតាមរយៈទូរស័ព្ទពីធនាគារឯកទេសវីង ដែលជម្រាបដំណឹងអំពីចំនួនទឹកប្រាក់ ដែលត្រូវទទួលបាន។ ក្រោយទទួលបានសារជូនដំណឹងនេះ សូមបងប្អូនយកអត្តសញ្ញាណប័ណ្ណសញ្ញាតិខ្មែរ ដើម្បីបើកប្រាក់ឧបត្ថម្ភនៅភ្នាក់ងារវីងណាមួយដែលនៅជិតផ្ទះបំផុត»។
ទោះយ៉ាងណាលោកបញ្ជាក់ដែរថា ក្នុងករណីដែលកម្មករនិយោជិតខកខានមិនបានចូលរួមសហការក្នុងការផ្តល់ឯកសារ និងលេខទូរស័ព្ទនោះ ពួកគេនឹងមិនទទួលបានប្រាក់ឧបត្ថម្ភ ៤០ ដុល្លារ ពីរដ្ឋាភិបាលនោះទេ គឺមានន័យថា ពួកគេបានបោះបង់ការទទួលយកនូវប្រាក់ឧបត្ថម្ភទាំងនេះ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា ប្រាប់ពីម្សិលមិញថា៖ «នេះគឺជាការអនុវត្តគោលនយោបាយផ្តល់ប្រាក់ឧបត្ថម្ភដល់កម្មករ និយោជិតក្នុងវិស័យសេដ្ឋកិច្ចរៀបរយជាលើកទី ១ ក្នុងប្រវត្តិសាស្ត្រកម្ពុជាដែលក្នុងកម្រិតណាមួយនោះយើងគួរមានមោទនភាពនូវការបោះជំហានជាវិជ្ជមាននេះ។ ជានីតិវិធីខ្ញុំគិតថាមិនមានការស្មុគស្មាញទេគ្រាន់តែមានបន្ទុកការងារ រដ្ឋបាលច្រើនបន្តិចសម្រាប់ខាងភាគីរោងចក្រ»។
លោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជាថ្លែងថា ករណីនេះកន្លងទៅនិយោជកតែងតែព្យាយាមគេចវេះ មិនបំពេញឯកសារឲ្យបានត្រឹមត្រូវតាមនីតិវិធីនៃការព្យួរការងារនោះទេ ដែលជាហេតុធ្វើឲ្យការអនុវត្តរបស់រដ្ឋាភិបាលក្នុងការផ្តល់ប្រាក់ឧបត្ថម្ភជូនកម្មករមានភាពយឺតយ៉ាវ ឬមិនអាចធ្វើទៅបាន។
លោកស្រីថា៖ «ខ្ញុំគិតថា អាចអនុវត្តបានពីព្រោះបើក្រុមហ៊ុន គាត់ចង់រួចកាតព្វកិច្ចក្នុងការចេញលុយឲ្យបងប្អូនកម្មករជំនួសរដ្ឋាភិបាល។ ប៉ុន្តែមិនបំពេញកាតព្វកិច្ចក្នុងការព្យួរការងារត្រឹមត្រូវ គាត់មិនអើពើនោះគាត់នឹងទទួលខុសត្រូវបញ្ហានេះ។ ចំណែកកម្មករគឺបានចូលរួមអនុវត្តតួនាទីរបស់ពួកគាត់ រួចរាល់អស់ហើយតាំងតែក្រសួងប្រកាសប្រមូលលេខទូរស័ព្ទតាំងពីមុនមក»។
បើតាមលោក ហេង សួរ អ្នកនាំពាក្យក្រសួងការងារគិតត្រឹមពាក់កណ្តាលខែមេសា រោងចក្រប្រមាណជាង ១០០ បានប្រកាសព្យួរការងារកម្មករដោយហេតុផល ថាខ្វះវត្ថុធាតុដើម ឬគ្មានការបញ្ជាទិញ ឬមិនមានទីផ្សារនាំចេញ៕