.jpg)
លោក អ៊ិត សំហេង រដ្ឋមន្ត្រីក្រសួងការងារ ក្នុងកិច្ចប្រជុំតាមប្រព័ន្ធអនឡាញនាពេលកន្លងមក។ រូបថត ក្រសួងការងារ
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈប្រកាសឲ្យម្ចាស់ផ្នែកសេវាកម្មដឹកជញ្ជូនកម្មករ ស្នើសុំបណ្ណអនុញ្ញាតដឹកកម្មករ និយោជិតសម្រាប់រោងចក្រ សហគ្រាស និងសិប្បកម្ម ដែលស្ថិតក្នុងតំបន់លឿង ដោយការស្នើសុំបណ្ណអាចធ្វើឡើងតាមប្រព័ន្ធបែបទំនើបកុំព្យូទ័រ ឬទូរស័ព្ទក៏បាន។
តាមសេចក្តីជូនដំណឹងរបស់ក្រសួងការងារនៅថ្ងៃទី ២៨ ខែមេសានេះ លោក អ៊ិត សំហេង រដ្ឋមន្ត្រីក្រសួងការងារបានប្រាប់ទៅដល់ម្ចាស់ ឬនាយករោងចក្រ សហគ្រាស និងសិប្បកម្ម ព្រមទាំងអ្នកផ្តល់សេវាដឹកជញ្ជូនកម្មករ និយោជិត និងបុគ្គលិកទាំងអស់ ដែលស្ថិតក្នុងតំបន់លឿងនៅភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល អាចស្នើសុំបណ្ណអនុញ្ញាតដឹកជញ្ជូនកម្មករនិយោជិតបានតាមរយៈកម្មវិធីបច្ចេកវិទ្យាទំនើបដោយ ចូលទៅតាមតំណរភ្ជាប់នេះ https://transportationpass. mlvt.gov.kh។
តាមរយៈតំណរភ្ជាប់នេះ ម្ចាស់រថយន្ត ឬយានយន្តដឹកជញ្ជូនកម្មករ អាចធ្វើការស្នើសុំចុះឈ្មោះ ស្នើសុំបណ្ណអនុញ្ញាតដឹកកម្មករនិយោជិត ដោយបំពេញឈ្មោះអ្នកបើកបរ ភេទ ថ្ងៃខែឆ្នាំកំណើត លេខអត្តសញ្ញាណប័ណ្ណសញ្ជាតិខ្មែរ ឈ្មោះរោងចក្រសហគ្រាសចំនួនកម្មករដែលត្រូវដឹក ទីតាំងរោចក្រ សហគ្រាស ស្លាកលេខរថយន្ត ឬយានយន្ត លេខទូរស័ព្ទ និងចន្លោះផ្លូវដែលមិនស្ថិតនៅក្នុងតំបន់ក្រហម ឬតំបន់លឿងទុំ។
លោក អ៊ិត សំហេង បញ្ជាក់ថា ការប្រកាសឲ្យស្នើសុំបណ្ណដឹកជញ្ជូនកម្មករនិយោជិតនេះ ធ្វើឡើងដោយយោងតាមប្រការ ៦ នៃសេចក្តីសម្រេចលេខ ៥៤ សសរ ចុះថ្ងៃទី ២៦ ខែមេសា ស្តីពីការបន្តការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ដើម្បីទប់ស្កាត់ការឆ្លងរាលដាលជំងឺកូវីដ ១៩ របស់រាជរដ្ឋាភិបាលកម្ពុជា។
លោកថ្លែងថា៖ «អ្នកស្នើសុំបណ្ណដឹកជញ្ជូន នឹងទទួលបានបណ្ណអនុញ្ញាតជាទម្រង់ឌីជីថលក្នុងរយៈពេល ១ ថ្ងៃ បន្ទាប់ពីការស្នើសុំ និងបំពេញព័ត៌មានបានត្រឹមត្រូវ ដោយគ្រាន់តែចុចតំណរភ្ជាប់ https://transportationpass. mlvt.gov.kh ហើយចុចត្រង់ពាក្យថា ពិនិត្យមើលស្ថានភាពការស្នើសុំ ហើយបំពេញថ្ងៃខែឆ្នាំកំណើត និងលេខទូរស័ព្ទជាការស្រេច»។
សេចក្តីជូនដំណឹងស្តីពីការប្រើប្រាស់បណ្ណអនុញ្ញាតដឹកជញ្ជូនកម្មករនិយោជិត និងបុគ្គលិកសម្រាប់រោងចក្រ សហគ្រាស និងសិប្បកម្ម ដែលស្ថិតក្នុងតំបន់លឿង របស់ក្រសួងការងារបានឲ្យដឹងថា ដើម្បីបង្ហាញជូនអាជ្ញាធរមានសមត្ថកិច្ចនៅរៀងរាល់ពេលធ្វើដំណើរទៅកន្លែងធ្វើការងារ និងត្រឡប់មកផ្ទះវិញ អ្នកផ្តល់សេវាដឹកជញ្ជូនកម្មករនិយោជិត និងបុគ្គលិក ត្រូវយកតាមខ្លួននូវអត្តសញ្ញាណប័ណ្ណសញ្ជាតិខ្មែរ។ កាតសម្គាល់កម្មករនិយោជិត ឬបណ្ណសមាជិក បសស ចំពោះការប្រើប្រាស់យានយន្តផ្ទាល់ខ្លួនសម្រាប់កម្មករនិយោជិតម្នាក់ៗ។
លោក ហេង សួរ អ្នកនាំពាក្យក្រសួងការងារបានណែនាំឲ្យម្ចាស់រោងចក្រ សហគ្រាស និងកម្មករនិយោជិតអានសេចក្តីសម្រេចលេខ ០៥៤ របស់រាជរដ្ឋាភិបាលដើម្បីដឹងថាអ្នកណាអាចធ្វើដំណើរពីណាដល់ណា អ្នកណាអាចធ្វើដំណើរបាន។
លោកថ្លែងថា៖ «ការដឹកកម្មករនិយោជិតគឺបានតែពីផ្ទះទៅកន្លែងធ្វើការ ហើយមិនទាន់អាចឆ្លងពីខេត្តចូលភ្នំពេញ និងពីភ្នំពេញទៅខេត្តនោះទេ។ រថយន្តផ្ទាល់ខ្លួននៃប្រជាពលរដ្ឋទូទៅ គឺមិនអាចប្រើប្រាស់បណ្ណនេះបានទេ។ មានបណ្ណនេះក៏មិនមែនមានន័យថា អាចធ្វើដំណើរបាននោះដែរ។ សមត្ថកិច្ចនៅតាមផ្លូវអាចបដិសេធបណ្ណនេះបានគ្រប់ពេល ជាពិសេសរថយន្តផ្ទាល់ខ្លួន»។
លោក ហេង សួរ បញ្ជាក់ថា បណ្ណដឹកជញ្ជូនដែលចេញដោយក្រសួងការងារ និងបណ្តុះបណ្តាលវិជ្ជាជីវៈ គឺសម្រាប់ដឹកកម្មករទៅធ្វើការ។ បើសិនធ្វើការបើកបរដោយខ្លួនឯងគឺ ៧០ ភាគរយ អាចត្រូវបានបដិសេធដោយសមត្ថកិច្ច៕
