.jpg)
កម្មករចេញពីធ្វើការក្នុងរោងចក្រមួយកន្លែង ក្នុងរាជធានីភ្នំពេញ។ ភ្នំពេញ ប៉ុសិ៍្ត
ភ្នំពេញៈ ក្រសួងការងារ បណ្តុះបណ្តាលវិជ្ជាជីវៈ រំឭកជាថ្មីដល់ម្ចាស់ ឬនាយកសហគ្រាស គ្រឹះស្ថាន និងកម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើងទូទាំងប្រទេស ពីការទូទាត់បើកប្រាក់រំឭកនិងប្រាក់បំណាច់អតីតភាពការងារជាលើកដំបូងសម្រាប់ឆ្នាំ ២០១៩ បន្ទាប់ពីសង្កេតឃើញថា ពួកគេមួយចំនួន នៅតែមិនទាន់យល់ ច្បាស់អំពីគោលការណ៍ថ្មីនេះនៅឡើយ។
លោក អិុត សំហេង រដ្ឋមន្ត្រីក្រសួងការងារ បានចុះហត្ថលេខាលើសេចក្តីជូនដំណឹងមួយកាលពីថ្ងៃចន្ទ ដោយលើកឡើងថា ការទូទាត់ប្រាក់បំណាច់អតីតភាពនេះធ្វើឡើងសម្រាប់កម្មករនិយោជិតដែលមានកិច្ចសន្យាមិនមានថិរវេលាកំណត់ទាំងអស់។ ចំពោះកម្មករដែលកំពុងប្រើប្រាស់កិច្ចសន្យាមានថិរវេលាកំណត់ នឹងត្រូវបានអត្ថប្រយោជន៍នេះ ដោយស្វ័យប្រវត្តិ នៅពេលកិច្ចសន្យារបស់ពួកគេលើសថិរវេលាកំណត់ដោយច្បាប់ ហើយវានឹងក្លាយជាកិច្ចសន្យាមិនមានថិរវេលាកំណត់ ដែលតម្រូវឲ្យនិយោជកត្រូវទូទាត់ប្រាក់ទាំងនេះជូនកម្មករ។
ប៉ុន្តែយ៉ាងណាក៏ដោយ ចំពោះកិច្ចសន្យាមានថិរវេលាកំណត់ទាំងអស់ នឹងមិនអាចទទួលបានអត្ថប្រយោជន៍ទាំងនេះបានទេ បើទោះជាលើសថិរវេលាអតិបរមាកំណត់ដោយច្បាប់ក៏ដោយ បើពួកគេបានទូទាត់ប្រាក់បំណាច់បញ្ចប់កិច្ចសន្យាការងារ ៥ ភាគរយ រួចហើយ។
លិខិតដដែលបន្ថែមថា ប្រាក់បំណាច់អតីតភាពការងារ ដែលមានមុនឆ្នាំ ២០១៩ និងប្រាក់បំណាច់អតីតភាពការងារថ្មីក្នុងឆ្នាំនីមួយៗ ចាប់ពីឆ្នាំ ២០១៩ នឹងត្រូវលើកលែងពន្ធ ស្របពេលក្រសួងបញ្ជាក់ដែរថា ចំពោះកម្មករនិយោជិតទាំងអស់ ដែលបានលាឈប់ដោយឯកឯង ឬបានប្រព្រឹត្តកំហុសធ្ងន់ នោះនឹងមិនទទួលបានអត្ថប្រយោជន៍ទាំងនេះនោះទេ។
ក្រសួងបញ្ជាក់ថា៖ «ក្រសួងសង្ឃឹមជឿជាក់ថា ការបើកប្រាក់បំណាច់អតីតភាពការងារលើកដំបូងនេះ និងការបើកបន្តបន្ទាប់ទៀត នឹងប្រព្រឹត្តទៅដោយរលូន ដោយរក្សាបានផលប្រយោជន៍ និងស្ថិរភាពការងារជូនកម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង ក៏ដូចជារក្សាបាននូវវិជ្ជមាននៃទំនាក់ទំនងវិជ្ជាជីវៈនៅកម្ពុជាជាក់ជាពុំខាន»។
នៅដើមខែកក្កដា ឆ្នាំនេះ បណ្ដារោងចក្រ ក្រុមហ៊ុន សហគ្រាសទូទាំងប្រទេស ចាប់ផ្តើមដំណើរការទូទាត់ប្រាក់រំឭក និងប្រាក់បំណាច់អតីតភាពការងារជូនកម្មករនិយោជិតតាមគោលការណ៍ថ្មីដែលបានកំណត់ដោយក្រសួងការងារ ដោយក្នុង ១ ឆ្នាំ ត្រូវទូទាត់ចំនួន ២ ដង សម្រាប់កម្មករដែលមានកិច្ចសន្យាមិនមានថិរវេលាកំណត់។
ភ្នំពេញ ប៉ុស្តិ៍ មិនអាចសុំការអត្ថាអធិប្បាយបន្ថែមពីលោក ហេង សួរ អ្នកនាំពាក្យក្រសួងការងារបានទេពីម្សិលមិញ។ ចំណែកលោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) ក៏មិនអាចទាក់ទងបានដែរ ព្រោះលោកបានចុចបិទទូរស័ព្ទ។
លោក អាត ធន់ ប្រធានសហភាពការងារកម្ពុជា លើកឡើងពីម្សិលមិញថា ចំពោះការទូទាត់ជូនកម្មករមួយរយៈចុងក្រោយនេះ គឺមានលក្ខណៈល្អប្រសើរ ប៉ុន្តែនៅតាមរោងចក្រសហគ្រាសមួយចំនួន នៅតែមានសកម្មភាពមិនប្រក្រតីកើតឡើង ដោយពួកគេហាក់មិនយល់ និងមានមួយចំនួនហាក់ចង់គេចវេះពីកាតព្វកិច្ច ដែលបណ្តាលឲ្យមានភាពស្មុគស្មាញ និងការតវ៉ាពីកម្មករផងដែរ។
លោកថា បើទោះជាមានរូបភាពបែបនេះ ក៏សកម្មភាពមិនប្រក្រតីជាច្រើនត្រូវបានដោះស្រាយ ក្រោយមានការចរចា ដោយលោករំពឹងថា ក្រសួងនឹងបន្តតាមដានទៀត ចំពោះការអនុវត្តគោលការណ៍ថ្មី ដែលខ្លួនបានដាក់ចេញ ដើម្បីផលប្រយោជន៍របស់កម្មករនិយោជិត។
លោកបញ្ជាក់ថា៖ «រហូតមកដល់ពេលនេះ យើងមិនទាន់ដឹងថាក្រុមហ៊ុនណាបើកឬក្រុមហ៊ុនណាមិនបើកជាផ្លូវការទេ ប៉ុន្តែយើងដឹងថា គេចាប់ផ្តើមបើកចំពោះក្រុមហ៊ុនគ្រឹះស្ថានទាំងឡាយដែលប្រើកិច្ចសន្យាមិនមានថិរវេលាកំណត់ ខណៈក្រុមហ៊ុនដទៃទៀត ព្យាយាមមិនបកស្រាយចំពោះកិច្ចសន្យារបស់ខ្លួន ជាមួយកម្មករនិយោជិត ដើម្បីគេចពីការទទួលខុសត្រូវដែលនាំឲ្យមានជម្លោះជជែកគ្នាខ្លះ»។
លោកបន្ថែមថា៖ «យ៉ាងណាយើងនៅតែមើលឃើញថាមានក្រុមហ៊ុនទុច្ចរិតមួយចំនួន ដែលមានការកេងប្រវ័ញ្ចពីកម្មករ នៅតែបន្តមាន ព្រោះពួកគេព្យាយាមបកស្រាយកិច្ចសន្យារបស់កម្មករឲ្យទៅជាកិច្ចសន្យាមិនត្រឹមត្រូវ ហើយជាកិច្ចសន្យាកំណត់អីវិញ»។
កាលពីឆ្នាំ ២០១៨ កន្លងទៅក្រសួងការងារបានប្រកាសពីការផ្លាស់ប្តូរនីតិវិធីអនុវត្តទូទាត់ប្រាក់បំណាច់អតីតភាពការងារជូនកម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើង ពីការបើកសរុបប្រាក់បំណាច់នេះនៅពេលបញ្ចប់ការងាររបស់កម្មករ មកជាការបើកជាទៀងទាត់ក្នុង ១ ឆ្នាំ ២ ដង ហើយត្រូវអនុវត្តជាដំណាក់កាលទាំងប្រាក់អតីតភាពការងារថ្មី និងប្រាក់បំណាច់អតីតភាពការងារមុនឆ្នាំ ២០១៩ ដោយចាប់អនុវត្តជាលើកដំបូងនៅខែ មិថុនា និងលើកទី ២ នៅខែ ធ្នូ។
ដោយឡែកចំពោះសហគ្រាស គ្រឹះស្ថាន ក្រៅពីវិស័យវាយនភណ្ឌកាត់ដេរ និងផលិតស្បែកជើងត្រូវទូទាត់ជូនកម្មករនិយោជិត នូវប្រាក់អតីតភាពការងារថ្មី ចាប់ពីឆ្នាំ ២០១៩ ដោយបែងចែកជា ២ ដង ដោយចាប់ពីខែមិថុនាដូចគ្នា ដោយគ្រាន់តែការបើកប្រាក់រំឭកអតីតភាពការងារដែលមានមុនឆ្នាំ ២០១៩ ត្រូវពន្យារពេលទៅអនុវត្តក្នុងខែ ធ្នូ ឆ្នាំ ២០២១៕
