The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​ការងារ​ឲ្យ​​កម្មករ​ប្តឹង​បើ​ថៅកែ​ មិន​បើកប្រាក់​អតីតភាព​ការងារ




ក្រសួង​ការងារ​ឲ្យ​​កម្មករ​ប្តឹង​បើ​ថៅកែ​ មិន​បើកប្រាក់​អតីតភាព​ការងារ

Content image - Phnom Penh Post
កម្មករ​កំពុង​ធ្វើការ​នៅ​រោងចក្រ​កាត់ដេរ​មួយ​ក្នុង​ខណ្ឌ​សែនសុខ​។ ហុង មិនា

ក្រសួង​ការងារ​ឲ្យ​​កម្មករ​ប្តឹង​បើ​ថៅកែ​ មិន​បើកប្រាក់​អតីតភាព​ការងារ

ភ្នំពេញៈ មន្ត្រី​ក្រសួង​ការងារ​បាន​អំពាវនាវ​ឲ្យ​កម្មករ​ក្នុង​វិស័យ​វាយនភណ្ឌ​ប្ដឹង​មក​ក្រសួង​ការងារ​ជាបន្ទាន់ បើសិន​ជា​ថៅកែ​រោងចក្រ​មិន​បាន​បើកប្រាក់​បំណាច់​អតីតភាព​ការងារ​ឆ្នាំ​ ២០១៩ ខណៈ​សហជីព​អះអាង​ថា​មាន​រោងចក្រ​មួយ​ចំនួន​ពុំទាន់​បាន​បើកប្រាក់​នេះ​ឱ្យ​កម្មករ​ជា​លើក​ទី​ ២ ក្នុង​ឆ្នាំ​ ២០១៩ ទៅ​តាម​សេចក្ដីប្រកាស​របស់​ក្រសួង​ការងារ​នៅឡើយ​ទេ​។

លោក​ ហេង សួរ អ្នកនាំពាក្យ​ក្រសួង​ការងារ​ និង​បណ្ដុះបណ្ដាល​វិជ្ជាជីវៈ​បាន​ប្រាប់​ភ្នំពេញ ប៉ុស្ដិ៍ កាលពី​ថ្ងៃ​ពុធ​ថា ក្រសួង​ការងារ​មិនទាន់​ទទួល​ពាក្យបណ្ដឹង​ណាមួយ​ជុំវិញ​បញ្ហា​ថៅកែ​រោងចក្រ​​មិន​ព្រម​បើកប្រាក់​បំណាច់​អតីតភាព​ការងារ​ក្នុង​ឆ្នាំ​ ២០១៩ ឱ្យ​កម្មករ​នៅឡើយ​ទេ​។

លោក​ សួរ បាន​សរសេរ​ក្នុង​ប្រព័ន្ធ​តេឡេក្រាម​មកកាន់​ភ្នំពេញ​ប៉ុស្ដិ៍​ថា​៖ «​មិនមាន​តួលេខ​នោះទេ​ (​តួលេខ​ចំនួន​រោងចក្រ​ដែល​មិន​បើកប្រាក់​អតីតភាព​ការងារ​ឱ្យ​កម្មករ​)​។ ប្រសិន​បើ​មាន​ករណី​បែប​នេះ​ក្រសួង​សូម​អំពាវនាវ​ដល់​បងប្អូន​ប្ដឹង​មក​ក្រសួង​ជាបន្ទាន់​ផង​»​។

យោង​តាម​សេចក្ដី​ប្រកាស​មួយ​របស់​ក្រសួង​ការងារ​ស្ដីពី​ការទូទាត់​ប្រាក់​បំណាច់​អតីតភាព​ការងារ​បាន​បញ្ជាក់ថា​ចាប់ពី​ឆ្នាំ ២០១៩ និយោជក​ត្រូវ​បើកប្រាក់​រំឭក​បំណាច់​អតីតភាព​ការងារ​ឱ្យ​កម្មករ​ក្នុង ១ ​ឆ្នាំ​ ២ ​ដង​ដែល​ការបើកប្រាក់​លើក​ទី​ ១ ​ធ្វើ​នៅក្នុង​ខែ​មិថុនា និង​លើក​ទី​ ២ ​នៅក្នុង​ខែធ្នូ​។

ទោះជា​យ៉ាងណា​លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​លើកឡើង​ថា មាន​រោងចក្រ​មួយ​ចំនួន​ពុំទាន់​បាន​អនុវត្តតាម​សេចក្ដី​ប្រកាស​របស់​ក្រសួង​ការងារ​នេះ​នៅឡើយ​ទេ ដោយសារ​ថៅកែ​រោងចក្រ​ខ្លះ​ពន្យារពេល​បើកប្រាក់​ទាំងនេះ​ឱ្យ​កម្មករ​នៅ​អំឡុង​ខែ​មករា​ឆ្នាំ ២០២០ និង​ថៅកែ​រោងចក្រ​ខ្លះទៀត​ពុំទាន់​បាន​កំណត់​ថ្ងៃ ដើម្បី​បើក​ជូន​កម្មករ​នៅឡើយ​។

លោក​ ប៉ាវស៊ីណា បាន​ថ្លែងថា វា​ជា​ការ​បង្ហាញ​អំពី​ភាពកម្សោយ​មួយ​នៃ​ប្រព័ន្ធ​ច្បាប់​របស់​កម្ពុជា នៅពេល​ថៅកែ​រោងចក្រ​មួយ​ចំនួន​មិន​បាន​គោរព​តាម​សេចក្ដី​ប្រកាស​របស់​ក្រសួង​ការងារ​ដែល​លោក​ថា ភាគី​ក្រសួង​គួរតែ​ចុះទៅ​ត្រួតពិនិត្យ និង​ដាក់ពិន័យ​ចំពោះ​ថៅកែ​រោងចក្រ​ទាំងនោះ ដើម្បី​ធ្វើយ៉ាងណា​ឱ្យ​ការអនុវត្ត​ច្បាប់​មាន​ប្រសិទ្ធភាព​ពិតប្រាកដ​។

លោក​ ស៊ីណា ​បញ្ជាក់ថា​៖ «​ប្រសិនបើ​ (​ក្រសួង​) ​មិន​ចុះ​តាមដាន និង​អង្កេត​ដោយ​យកចិត្ត​ទុកដាក់​ទេ អ៊ីចឹង​មានន័យ​ថា យើង​មាន​តែ​លិខិត​បទដ្ឋាន​គតិយុត្ត ប៉ុន្តែ​លិខិត​នោះ​ស្មើនឹង​ក្រដាស​ទទេ ដែល​និយោជិក​គេ​ហាក់​​មិន​ឱ្យ​តម្លៃ​។ អ៊ីចឹង!​ទាំងអស់​ហ្នឹង​​ទាមទារ​ឱ្យ​មន្ត្រី​ពង្រឹង​ការអនុវត្ត​ប្រកប​ដោយ​ប្រសិទ្ធភាព ជាពិសេស​គឺ​ការដាក់​ទណ្ឌកម្ម​ទៅលើ​និយោជិក និង​សហគ្រាស​ទាំងនោះ​ឱ្យ​ងាក​មក​អនុវត្ត​ច្បាប់​»​។

បើតាម​លោក ប៉ាវ ស៊ីណា តាម​ការតាមដាន​លើ​ការបើកប្រាក់​រំឭក​អតីតភាព​ការងារ​លើក​ទី​ ២ ឆ្នាំ​ ២០១៩ របស់​សម្ព័ន្ធ​សហជីព​ចលនា​កម្មករ គឺ​មាន​រោងចក្រ​ប្រហែល ១០ មិនទាន់​បាន​ទូទាត់​ប្រាក់​បំណាច់​អតីតភាព​​ការងារ​ជូន​កម្មករ​នៅ​ឡើយ​។

ចំណែក​លោក ពុំ សុគន្ធី អនុប្រធាន​សម្ព័ន្ធ​សហជីព​ចលនា​កម្មករ​ប្រចាំ​រោងចក្រ យូលី នៅ​ក្រុង​បាវិត​បាន​ថ្លែង​កាលពី​ថ្ងៃ​ពុធ​ថា លោក​បានឮ​ពី​កម្មករ​នៅ​រោងចក្រ​ផ្សេងៗ​និយាយ​អំពី​ថៅកែ​មិន​ព្រម​បើកប្រាក់​បំណាច់​អតីតភាព​ការងារ​នេះ ខណៈ​រោងចក្រ​របស់​លោក​នឹង​បិទ​បញ្ជី​ផ្សាយ​អំពី​ការបើកប្រាក់​នេះ​រួមទាំង​ប្រាក់​មួយចំនួន​ទៀត​ដូចជា ប្រាក់​ថ្លៃ​បាយ ថ្លៃ​រថយន្ត និង​ប្រាក់​សម្រាប់​លើក​ទឹកចិត្ត​នៅ​ថ្ងៃទី​ ២ ខែ​ធ្នូ​។

លោក​បន្តថា​ខាង​កម្មករ​នឹង​ពិនិត្យ​ផ្ទៀងផ្ទាត់​អំពី​ទឹកប្រាក់​នៅក្នុង​បញ្ជី​ដែល​បិទ​នោះ ហើយ​ប្រសិន​បើ​វា​មិន​ត្រឹមត្រូវ​តាម​សេចក្ដី​ប្រកាស​របស់​ក្រសួង​ការងារ​ទេ នោះ​ខាង​កម្មករ​នឹង​ធ្វើ​ការតវ៉ា ។

លោក​ សុគន្ធី បន្តថា​៖ «​ខាង​ក្រសួង​បាន​ប្រកាស​រួចរាល់​ហើយ ហើយ​ខ្ញុំ​មិនដឹងថា ហេតុអ្វី​បានជា​រោងចក្រ​មួយចំនួន​មិន​ព្រមស្ដាប់​តាម​សេចក្ដី​ណែនាំ​របស់​ក្រសួង​។ អ៊ីចឹង​ខ្ញុំ​គិតថា កម្មករ​​មិន​សប្បាយចិត្ត​ទេ ហើយ​វា​អាច​មាន​បញ្ហា​ការតវ៉ា​ផ្សេងៗ​កើតឡើង ប្រសិន​បើ​ក្រុមហ៊ុន​មិនបាន​គោរព​អនុវត្ត​តាម​សេចក្ដី​ប្រកាស​របស់​ក្រសួង​។ រោងចក្រ​ខ្ញុំ​នឹង​ចេញ​ក្រដាស​ឱ្យ​កម្មករ​ពិនិត្យមើល​អំពី​ទឹកប្រាក់​ហ្នឹង​នៅ​ថ្ងៃទី​ ២ ​មករា ហើយ​ពួក​ខ្ញុំ​កំពុង​រង់ចាំ​មើល​»៕

អត្ថបទគួរចាប់អារម្មណ៍