ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ និងអង្គការ GIZ របស់អាល្លឺម៉ង់ កាលពីម្សិលមិញ បានចុះហត្ថលេខាលើអនុស្សរណៈនៃការយោគយល់គ្នាជាលើកទី២ ដើម្បីអនុវត្តកម្មវិធី “គម្រោងពង្រឹងនិរន្តរភាពវិស័យវាយនភណ្ឌ និងកាត់ដេរ នៅទ្វីបអាស៊ី” (GIZ, FABRIC) នៅកម្ពុជា។
ពិធីចុះហត្ថលេខានេះ បានធ្វើឡើងរវាង លោក ម៉ម វណ្ណៈ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងលោក Guenter Riethmacher នាយកអង្គការ GIZ ប្រចាំប្រទេស កម្ពុជា នៅទីស្តីការក្រសួងការងារ ខណៈលោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចូលរួមជាសាក្សី។
នេះជាលើកទី២ ហើយដែលភាគីកម្ពុជាបានចុះ MOU ជាមួយអង្គការ GIZ របស់អាល្លឺម៉ង់ក្នុងការអនុវត្តកម្មវិធី “គម្រោងពង្រឹងនិរន្តរភាពវិស័យវាយនភណ្ឌ និងកាត់ដេរ ដែលលើក ទី១ បានចាប់ផ្តើមតាំងពីឆ្នាំ ២០១៦ ខណៈអនុស្សរណៈលើកទី២ នេះ គឺមានរយៈពេល ៣ ឆ្នាំ គិតចាប់តាំងពីថ្ងៃទី ១ ខែ មេសា ឆ្នាំ ២០១៩ ដល់ថ្ងៃទី ៣១ ខែ មីនា ឆ្នាំ ២០២១ ដែល គិតជាទឹកប្រាក់សរុបមានចំនួន ៦ លានអឺរ៉ូ សម្រាប់ប្រទេស មួយចំនួន រួមមាន បង់ក្លាដែសកម្ពុជា ចិន មីយ៉ាន់ម៉ា ប៉ាគីស្ថាន និងវៀតណាម។
តាមការអះអាងរបស់ក្រសួងការងារ អនុស្សរណៈនេះ នឹងគាំទ្រដល់បណ្តាស្ថាប័នរដ្ឋ និងឯកជន ដើម្បីផ្លាស់ប្តូរព័ត៌មាន កិច្ចសន្ទនា និងកិច្ចសហប្រតិបត្តិការនៅថ្នាក់តំបន់ ថ្នាក់ជាតិ និងកម្រិតសហគ្រាស គ្រឹះស្ថាន ដើម្បីពង្រឹងអនុលោមភាពទៅតាមបទដ្ឋានសង្គម និងការងារដូចដែលមានចែងនៅក្នុងច្បាប់ស្តីពីការងារនៅកម្ពុជា និងអនុសញ្ញាអន្តរជាតិនានាដែលកម្ពុជាធ្លាប់បានផ្ដល់សច្ចាប័ន។
លើសពីនេះទៀត MOU ក៏នឹងផ្ដោតលើ «ការផ្ដល់ជំនួយគាំទ្រផ្នែកហិរញ្ញវត្ថុ និងបច្ចេកទេសពីគម្រោង GIZ, FABRIC ដល់ក្រសួងការងារ និងបណ្តុះបណ្តាលវិជ្ជាជីវៈ ដើម្បីពង្រឹងប្រព័ន្ធអធិការកិច្ចការងារនៅកម្ពុជាឱ្យកាន់តែមានសមត្ថភាព តម្លាភាព ប្រសិទ្ធភាពនិងទទួលបានការជឿជាក់ពីគ្រប់ភាគីពាក់ព័ន្ធ។ ផ្តល់ជំនួយបច្ចេកទេសដល់ក្រសួងការងារនិងបណ្តុះបណ្តាលវិជ្ជាជីវៈ សម្រាប់អនុវត្តសកម្មភាពទាំងឡាយដែលគាំទ្រដល់ផែនការយុទ្ធសាស្ត្របញ្ជ្រាបយេនឌ័រក្នុងវិស័យការងារ និងបណ្តុះបណ្តាល វិជ្ជាជីវៈ ដើម្បីលើកកម្ពស់សមភាពយេនឌ័រ និងផ្តល់សិទ្ធិអំណាចដល់ស្ត្រីដែល ធ្វើការក្នុងវិស័យវាយនភណ្ឌ និងកាត់ដេរ»។
បន្ថែមពីនេះ លោក ងុយ រិទ្ធ អនុរដ្ឋលេខាធិការក្រសួងការងារ បានថ្លែងប្រាប់អ្នកកាសែតក្រោយជំនួបក្នុងពិធីនោះថា វានឹងធ្វើឲ្យប្រសើរឡើងក្នុងវិស័យវាយនភណ្ឌកាត់ដេរ នៅប្រទេសកម្ពុជា បើទោះជា MOU នេះ មិនផ្តោតតែលើកម្ពុជា ព្រោះមានប្រទេសក្នុងគម្រោងដល់ទៅ ៦ ប្រទេស ប៉ុន្តែវានឹងធ្វើការផ្លាស់ប្តូរបទពិសោធល្អ និងរបៀបដែលប្រទេសទាំង នោះ បានអនុវត្តជោគជ័យក្នុងការគ្រប់គ្រងវិស័យនេះ នៅប្រទេសរបស់ខ្លួន។
លោកបញ្ជាក់ថា៖ «សមិទ្ធផលទាំងនេះ យើងទទួលបានច្រើនរហូតបង្កើតឲ្យមានក្រមរបស់អធិការកិច្ច បទបញ្ជា និងសៀវភៅណែនាំ ក្នុងការដោះស្រាយវិវាទ ដើម្បីឲ្យការចូលរួមអនុវត្តច្បាប់។ តាមរយៈគម្រោងដ៏ជោគជ័យនេះបានធ្វើឲ្យ GIZ បង្កើតនូវគម្រោងទី២ នេះ ដើម្បីលើកកម្ពស់បទដ្ឋានសង្គមដែលធ្វើឡើងដល់ទៅ ៦ ប្រទេស»។
លោក ងុយ រិទ្ធ បានអះអាងថាគម្រោងទី១ ដែលបានអនុវត្តកាលពីឆ្នាំ ២០១៦ រហូត ដល់ឆ្នាំ ២០១៨ បានទទួលជោគជ័យច្រើន ហើយក្រុមការងារ នឹងអនុវត្តសកម្មភាពខ្វះចន្លោះមួយចំនួន ក្នុងរយៈពេល ៣ ឆ្នាំខាងមុខនេះ ខណៈភាគី GIZ ប្រកាសពីការពេញចិត្តចូលរួមកិច្ចសហប្រតិបត្តិការ ផ្តល់ជំនួយក្នុងការអនុវត្តគម្រោងឲ្យទទួលជោគជ័យបន្ថែមទៀត។
លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈក៏បានថ្លែងដែរថា ឆ្លងតាមរយៈការជួយរបស់ GIZ កន្លងមកនេះ បានធ្វើឲ្យវិស័យវាយនភណ្ឌ និងកាត់ដេរនៅប្រទេស កម្ពុជា មានភាពល្អប្រសើរតាមរយៈការកសាងប្រព័ន្ធអធិការកិច្ច និងការបង្កើតលក្ខខណ្ឌការងារ កាន់តែមានប្រសិទ្ធភាព ខណៈដែលក្នុងឆ្នាំនេះ រាល់វិវាទនានា ក្នុងវិស័យនេះ ត្រូវបានដោះស្រាយដោយមានប្រសិទ្ធភាពខ្ពស់ ។ លោកពេញចិត្តចំពោះការអនុវត្តគម្រោង GIZ ក៏ដូចជា ការជួយរបស់រដ្ឋាភិបាលអាល្លឺម៉ង់ មកដល់កម្ពុជាពិសេសវិស័យ ការងារ និងបណ្តុះបណ្តាលវិជ្ជាជីវៈ។
លោកបញ្ជាក់ថា៖ «តាមរយៈនេះខ្ញុំក៏ជឿថា វាជាដៃគូក្នុងការពង្រឹងនិរន្តរភាពក្នុងវិស័យការងាររបស់រដ្ឋាភិបាល ទទួលបានជោគជ័យ។ តាមរយៈនេះ វានឹងចូលរួមជួយកសាងបន្ថែម ជាពិសេសក្នុងវិស័យអធិការកិច្ចនិងការផ្សព្វផ្សាយ»៕