.jpg)
កិច្ចប្រជុំពិភាក្សារបស់មន្ត្រីក្រសួងការងារកាលពីថ្ងៃ ២៨ សីហាថ្មីៗនេះ។ រូបថត សហការី
ភ្នំពេញៈ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានថ្លែងថានឹងបង្កើតផែនការមេ (Master Plan) សម្រាប់រៀបចំគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ Technical Vocational Education andTraining (TVET) នៅចុងឆ្នាំនេះ ដើម្បីបង្កើនធនធានមនុស្សក្នុងវិស័យនេះឲ្យប្រសើរជាងមុន ខណៈបច្ចុប្បន្នកំពុងមានការខ្វះខាត។
ថ្លែងនៅក្នុងកិច្ចពិភាក្សាជាមួយមន្ត្រីក្រសួងការងារកាលពីថ្ងៃទី ២៨ ខែសីហា លោក អ៊ិត សំហេង បានបង្ហាញក្ដីបារម្ភពីកង្វះធនធានមនុស្សក្នុងវិស័យ TVET នៅក្នុងទីផ្សារការងារបច្ចុប្បន្ន។ ប៉ុន្ដែទោះជាយ៉ាងណាលោកថ្លែងថា រាជរដ្ឋាភិបាលកម្ពុជាក៏ដូចជា ក្រសួងការងារកំពុងជំរុញការដោះស្រាយបញ្ហានេះនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទូទាំងប្រទេសដោយបាននិងកំពុងចុះពិនិត្យដល់ទីតាំងផ្ទាល់តែម្ដង។
លោករដ្ឋមន្ដ្រីបានថ្លែងថា៖ «នៅចុងឆ្នាំ ២០១៩ នេះក្រសួងការងារនឹងបង្កើតឲ្យបានផែនការមេរៀបចំហេដ្ឋារចនាសម្ព័ន្ធក្នុងគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទូទាំងប្រទេសដោយគិតគូរទៅលើអគារសិក្សា រោងជាង គ្រូបណ្ដុះបណ្ដាល ការបង្រៀនពីបច្ចេកវិទ្យាថ្មីៗ សម្រាប់បណ្ដុះបណ្ដាលសិក្ខាកាមសំដៅធ្វើឲ្យសម្រេចបាននូវធនធានមនុស្សក្នុងវិស័យនេះទាំងបរិមាណ និងគុណភាព»។
លោកថា៖ «ក្រសួងការងារនឹងបង្កើតឲ្យមានគណៈកម្មការស្ថិតិការងារមួយ ដែលមានខ្ញុំផ្ទាល់ជាប្រធាន។ ក្នុងនោះនឹងរៀបចំឲ្យមានកិច្ចប្រជុំទៀងទាត់ បង្កើតឲ្យមានជនបង្គោលស្ថិតិការងារនៅតាមមូលដ្ឋានការងារនីមួយៗ។ ព្រោះកន្លងមកការងារបូកសរុបស្ថិតិការងារនៅផ្នែកមួយចំនួនហាក់នៅមានភាពយឺតយ៉ាវនៅឡើយ»។
ចំពោះវឌ្ឍនភាពក្នុងវិស័យការងារ និងបណ្ដុះបណ្ដាលវិជ្ជាជីវៈទាំងមូល លោក សំហេង បញ្ជាក់ថាសមិទ្ធផលនេះគឺបានមកដោយសារកត្តាចាំបាច់ជាច្រើន ជាពិសេសគឺសន្តិភាព និងស្ថិរភាពនយោបាយ។
លោកលើកឡើងថា សុខដុមនីយកម្មក្នុងវិស័យកាត់ដេរដែលរាជរដ្ឋាភិបាលបាន និងកំពុងអនុវត្តបញ្ចៀសបាននូវបញ្ហាបាតុភាពនានា ហើយផលិតភាពការងារក៏នៅតែបន្ត និងបង្កើនបន្ថែមទៀតផងដែរ។
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងកាលពីម្សិលមិញថា តាមរយៈផែនការមេនេះនឹងធ្វើឲ្យដៃគូពាក់ព័ន្ធកាន់តែងាយស្រួលក្នុងការចូលរួមចំណែកអភិវឌ្ឍ និងវិនិយោគលើវិស័យនេះ។
លោកថា៖ «តាមរយៈផែនការមេនេះគឺអាចឲ្យយើងដឹងចក្ខុវិស័យក្នុងរយៈពេលមធ្យម និងវែងនៃគ្រឹះស្ថាននីមួយៗ។ ដូច្នេះយើងមានភាពប្រទាក់ក្រឡាគ្នាក្នុងការចង់ចូលរួមជាមួយគោលនយោបាយជាតិធំៗបាន»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានឲ្យដឹងថា បច្ចុប្បន្នមានវិទ្យាល័យចំណេះទូទៅ និងបច្ចេកទេសចំនួន ១៤ ស្ថិតក្រោមការគ្រប់គ្រងរបស់ក្រសួងអប់រំ និងមានវិទ្យាស្ថានបច្ចេកវិទ្យាបណ្ដុះបណ្ដាលលើជំនាញបច្ចេកទេសចំនួន ២ ដោយនៅភ្នំពេញចំនួន ១ និងនៅខេត្ដកំពង់ស្ពឺ ចំនួន ១។
លោកថ្លែងថា ក្រសួងអប់រំ យុវជន និងកីឡាបានដាក់បញ្ចូលជំនាញបច្ចេកទេសថ្មីៗមួយចំនួនក្នុងកម្មវិធីសិក្សាថ្នាក់វិទ្យាល័យចំណេះទូទៅ និងអប់រំបច្ចេកទេសដើម្បីឆ្លើយតបនឹងតម្រូវការទីផ្សារការងារ និងសម្រាប់ចូលរួមអភិវឌ្ឍវិស័យឧស្សាហកម្ម។ ជំនាញបច្ចេកទេសថ្មីៗនោះមានដូចជា អេឡិចត្រូនិក អគ្គិសនី ក្សេត្រសាស្ត្រ មេកានិក និងគណនេយ្យ។
លោក សុវាចា បញ្ជាក់ថា៖ «ជំនាញបច្ចេកទេសទាំងនេះនឹងជួយបង្កើនបរិមាណ និងគុណភាពធនធានមនុស្សផ្នែកជំនាញបច្ចេកទេសនៅតាមរោងចក្រ ទីផ្សារការងារផ្សេងៗ និងសម្រាប់ជាមូលដ្ឋានគ្រឹះដល់សិស្សមួយចំនួនដែលចង់រៀនជំនាញនេះបន្ត»។
លោកបានរំឭកថាកាលពីថ្ងៃទី ៣១ ខែធ្នូ ឆ្នាំ ២០១៤ ក្រសួងអប់រំបានផ្អាកផ្តល់អាជ្ញាប័ណ្ណឲ្យបើកជំនាញគ្រប់គ្រងគណនេយ្យធនាគារ និងហិរញ្ញវត្ថុនៅតាមគ្រឹះស្ថានឧត្តមសិក្សាដើម្បីជំរុញការអនុវត្តកំណែទម្រង់នៅឧត្តមសិក្សាឲ្យឆ្លើយតបនឹងតម្រូវការទីផ្សារការងារ និងការវិវឌ្ឍសេដ្ឋកិច្ចជាតិក្នុងយុគសម័យឧស្សាហកម្ម ៤.០។
លោក នួន រស្មី នាយកសាលាបដិសណ្ឋារកិច្ច និងទេសចរណ៍ អេភីធី (ATP School of Hospitality and Tourism) បានសាទរលើគម្រោងបង្កើតផែនការមេរបស់ក្រសួងនេះ ខណៈបច្ចុប្បន្នកម្ពុជាកំពុងខ្វះខាតធនធានមនុស្សលើជំនាញបច្ចេកទេសវិជ្ជាជីវៈបដិសណ្ឋារកិច្ច និងទេសចរណ៍ ជាពិសេសខ្វះខាតគ្រូបង្គោល។
លោកថា៖ «ដើម្បីជំរុញការអភិវឌ្ឍវិស័យការងារបច្ចេកទេសវិជ្ជាជីវៈសម្រាប់ឆ្នាំ ២០២០-២០២៥ អ្វីដែលសំខាន់នោះគឺបញ្ហាគ្រូបណ្ដុះបណ្ដាល ដែលត្រូវមានជំនាញបង្រៀនច្បាស់លាស់លើជំនាញបច្ចេកទេសនីមួយៗ»។
លោក រស្មី បានឲ្យដឹងថាបច្ចុប្បន្នជំនាញបច្ចេកទេសកំពុងដើរតួនាទីសំខាន់ក្នុងវិស័យការងារក៏ដូចជាឧស្សាហកម្មទេសចរណ៍ ស្របពេលដែលចំនួនភ្ញៀវទេសចរចូលមកកម្ពុជាកំពុងកើនឡើង ប៉ុន្តែខ្វះជំនាញផ្នែកនេះ ដោយសារសិស្ស និស្សិត មិនសូវចាប់អារម្មណ៍រៀន។
លោកបានបញ្ជាក់ថា៖ «ដោយសារកង្វះធនធានមនុស្សគ្រាន់តែលើវិស័យទេសចរណ៍ និងបដិសណ្ឋារកិច្ចកំពុងមានការលំបាកក្នុងការជ្រើសរើសមនុស្សមកចូលធ្វើការ រាល់ឆ្នាំតែងមានកង្វះខាត។ បើតាមការសង្កេតរបស់ខ្ញុំ សិស្ស និស្សិត គួរតែបែរមកចាប់យកជំនាញសិក្សាខ្លី ព្រោះចំណាយពេលរៀនតិច ហើយឆាប់ទទួលបានការងារធ្វើ និងមានតួនាទីល្អផងដែរ»៕
