.jpg)
លោក ហេង សួរ អ្នកនាំពាក្យក្រសួងការងារ។ រូបថត ភ្នំពេញប៉ុស្តិ៍
ភ្នំពេញៈ លោក ហេង សួរ អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈបានអះអាងថា ក្រសួងនឹងត្រៀមមន្ត្រីសម្រាប់ចុះធ្វើការតាមដានការបើកប្រាក់អតីតភាពការងាររបស់កម្មកររោងចក្រវាយនភណ្ឌ កាត់ដេរក្នុងដំណាក់កាលទី ២ នៅចុងឆ្នាំនេះបន្ទាប់ពីទទួលបានជោគជ័យនូវដំណើរការបើកផ្តល់ជូនកម្មករទូទាំងប្រទេសកាលពីខែមិថុនា។
កាលពីឆ្នាំ ២០១៨ ក្រសួងការងារបានប្រកាសពីការផ្លាស់ប្តូរនីតិវិធីអនុវត្តទូទាត់ប្រាក់បំណាច់អតីតភាពការងារជូនកម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើងពីការបើកសរុបប្រាក់បំណាច់នេះនៅពេលបញ្ចប់ការងាររបស់កម្មករមកជាការបើកជាទៀងទាត់ក្នុង ១ ឆ្នាំ ២ ដង ចាប់ពីឆ្នាំ ២០១៩។ ក្នុងនោះក្រសួងបានប្រកាសថា ការបើកប្រាក់អតីតភាពការងារលើកទី ១ ត្រូវធ្វើឡើងនៅខែមិថុនា និងលើកទី ២ នៅខែធ្នូ។
លោក ហេង សួរ បានប្រាប់ភ្នំពេញប៉ុស្តិ៍ពីម្សិលមិញថា៖ «ដំណាក់ការទី ១ ដែលយើងត្រូវបើកនៅក្នុងខែមិថុនាកន្លងមកនេះមិនមានបញ្ហាអ្វីនោះទេ។ ដូច្នេះយើងរំពឹងថានៅក្នុងការបើកដំណាក់កាលទី ២ នៅចុងឆ្នាំនេះក៏នឹងមិនមានបញ្ហាអ្វីដែរ»។
លោកថ្លែងថា៖ «ទោះបីយ៉ាងណាក៏ដោយ ក្រសួងបានត្រៀមមន្ត្រីសម្រាប់ចុះធ្វើការតាមដាន និងអនុវត្តនៅតាមរោងចក្រវាយនភណ្ឌ និងកាត់ដេរ ដើម្បីធ្វើយ៉ាងម៉េចឲ្យអនុវត្តស្របទៅតាមអ្វីដែលជាគោលការណ៍កំណត់របស់ក្រសួង»។
លោក កាំង ម៉ូនីកា អគ្គលេខាធិការរង GMAC មិនអាចទំនាក់ទំនងសុំការអត្ថាធិប្បាយជុំវិញបញ្ហានេះបានទេកាលពីម្សិលមិញ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានប្រាប់ភ្នំពេញប៉ុស្តិ៍ពីម្សិលមិញថា តាមការសង្កេតរបស់លោក ការអនុវត្តលើកទី ១ គឺ ដំណើរការទៅដោយប្រក្រតី និងមិនមានបញ្ហាអ្វីកើតឡើងគួរឲ្យព្រួយបារម្ភនោះទេ។ ប៉ុន្តែបញ្ហានៅតែបារម្ភនៅដំណាក់កាលទី ២ នេះនៅតាមបណ្តារោងចក្រមួយចំនួនដែលមិនមានសហជីពនៅក្នុងរោងចក្រអាចប្រឈមនឹងបញ្ហាដោយការកេងប្រវ័ញ្ចពីថៅកែ ប្រៀបធៀបនឹងរោងចក្រដែលមានសហជីពដែលគេអនុវត្តបានត្រឹមត្រូវ។
លោកបញ្ជាក់ថា៖ «ជារឿងមួយល្អមែនទែនដែលក្រសួងចាត់ឲ្យមន្ត្រីចុះទៅពិនិត្យមើលអំពីការបើកប្រាក់អតីតភាពការងារនេះ។ ប៉ុន្តែអ្វីដែលសំខាន់ ខ្ញុំគិតថាក្រសួងគួរតែណែនាំឲ្យនិយោជកទាំងអស់ ប្រកាសមកកាន់ក្រសួងការងារអំពីការកំណត់ពេលវេលាពីការបើកប្រាក់អតីតភាព ដើម្បីងាយស្រួលឲ្យមន្ត្រីចុះទៅអង្កេត។ ព្រោះបើមិនបានអ៊ីចឹងទេ ក្រសួងនឹងក្តោបមិនបានជុំវិញរោងចក្រណា ត្រូវបើកថ្ងៃណា គាត់មិនដឹង»។ អ្នកស្រី តាន់ សុផា កម្មការិនីរោងចក្រម្នាក់បានបង្ហាញក្ដីសង្ឃឹមថានឹងទទួលបានប្រាក់បំណាច់អតីតភាពការងារជាលើកទី ២៕
