ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានប្រកាសពីការបើកផ្ដល់ប្រាក់ឧបត្ថម្ភជូន កម្មករនិយោជិតក្នុងវិស័យកាត់ដេរ និងទេសចរណ៍ ដែលត្រូវបានព្យួរកិច្ចសន្យាការងារស្របតាមស្មារតីនៃកញ្ចប់វិធានការរបស់រាជរដ្ឋាភិបាលលើកទី៦១។
តាមសេចក្តីជូនដំណឹងចុះថ្ងៃទី ២១ ខែឧសភានេះ បានឲ្យដឹងថា ការបើកផ្តល់នេះនឹងធ្វើឡើង ចំពោះកម្មករនិយោជិតចំនួន ៨ ៦៩៣ នាក់ នៅក្នុងរោងចក្រ សហគ្រាសទាំង ៤៩ នៃវិស័យកាត់ដេរ និងវិស័យទេសចរណ៍ ដែលទទួលបានការអនុញ្ញាតព្យួរកិច្ចសន្យាការងារ ស្របតាមស្មារតីជុំទី ៣ នៃកញ្ចប់វិធានការរបស់រាជរដ្ឋាភិបាល។
ក្រសួងបានបញ្ជាក់ថា៖ «ធនាគារឯកទេសវីងនឹងផ្ញើសារអំពីការបើកប្រាក់ឧបត្ថម្ភរបស់រាជរដ្ឋាភិបាលទៅលេខទូរស័ព្ទ ដែលបងប្អូនបានផ្តល់មកឱ្យក្រសួងតាមរយៈ រដ្ឋបាលរោងចក្រ សហគ្រាស នាពេលកន្លងមក។ ប្រាក់ឧបត្ថម្ភនេះនឹងត្រូវបើកផ្ដល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារ»។
ក្នុងនោះក្រសួងក៏បានណែនាំផងដែរថា ក្នុងករណីកម្មករនិយោជិត ដែលបម្រើការងារនៅរោងចក្រ សហគ្រាសទាំង ៤៩ នេះ មិនបានទទួលសារទូរស័ព្ទពីធនាគារឯកទេសវីង សូមធ្វើការទំនាក់ទំនង សួរព័ត៌មានបន្ថែម ឬធ្វើបច្ចុប្បន្នភាពលេខទូរស័ព្ទរបស់ខ្លួន ជាមួយរដ្ឋបាលរោងចក្រ សហគ្រាសរបស់ខ្លួន។
សូមជម្រាបថា កម្មករទាំងជាង ៨ ០០០ នាក់នេះ នឹងទទួលបានប្រាប់ ឧបត្ថម្ភ ចន្លោះពី ១៥ ដុល្លារ ទៅ ៤០ ដុល្លារ បន្ថែមលើប្រាក់ឧបត្ថម្ភរបស់រោងចក្រ អាស្រ័យទៅលើចំនួនថ្ងៃនៃការព្យួរកិច្ចសន្យាការងាររបស់ពួកគេម្នាក់ៗ៕