ភ្នំពេញៈ ក្រសួងការងារបើកកិច្ចប្រជុំក្រុមការងារយន្ដការត្រីភាគីបូក សម្រាប់បន្តកិច្ចពិភាក្សាការធ្វើវិសោធនកម្មច្បាប់ស្តីពីការងារ ដើម្បីឱ្យមានលក្ខណៈគ្រប់ជ្រុងជ្រោយ ខណៈសហជីពមើលឃើញថា ការធ្វើវិសោធនកម្មនេះបានធ្វើឲ្យបាត់ប្រយោជន៍របស់កម្មករ។
នៅក្នុងកិច្ចប្រជុំដែលធ្វើឡើងនាទីស្តីការក្រសួងការងារកាលពីម្សិលមិញ ដោយមានការចូលរួមពិភាក្សាពីតំណាងអន្តរក្រសួង តំណាងសហជីព និងតំណាងនិយោជក សរុបប្រមាណ ៨០ នាក់លោក អ៊ិត សំហេង រដ្ឋមន្ត្រីក្រសួងការងារថ្លែងថា ស្ថិតក្នុងបរិបទដែលវិស័យឯកជន កាន់តែប្រឈមកាន់តែខ្លាំងទៅនឹងលទ្ធភាពប្រកួតប្រជែងជាមួយប្រទេសនាំចេញនានា រាជរដ្ឋាភិបាលបានធ្វើការយ៉ាងជិតស្និទ្ធជាមួយវិស័យឯកជន ដើម្បីស្វែងរកដំណោះស្រាយរួមគ្នា។
លោកបន្តថា ការធ្វើដូច្នេះគឺដើម្បីធានាថា វិស័យឯកជននៅតែអាចបន្តធានាបាននូវឧត្តមភាពប្រកួតប្រជែង ដោយសហគ្រាស គ្រឹះស្ថានទាំងអស់អាចរក្សាបាននូវដំណើរផលិតកម្ម អាជីវកម្មរបស់ខ្លួនប្រកបដោយចីរភាព។
លោកបញ្ជាក់ថា៖ «ប្រមុខរាជរដ្ឋាភិបាលកម្ពុជាបានសម្រេចនៅក្នុងវេទិកា រាជរដ្ឋាភិបាលវិស័យឯកជនលើកទី ១៨ កាលពីថ្ងៃទី ២៩ ខែមីនា ឆ្នាំ ២០១៩ ដោយបានដាក់ចេញនូវវិធានការកែទម្រង់មុតស្រួចជាកញ្ចប់សំដៅពង្រឹងភាពប្រកួតប្រជែង និងជំរុញធ្វើពិពិធកម្មសេដ្ឋកិច្ចលើប្រធានបទចំនួន ១៥ ក្នុងនោះការកែសម្រួលច្បាប់ស្តីពីការងារគឺជាការងារអាទិភាពមួយនៅក្នុងវិស័យការងារ»។
ស្របតាមវិធានការកែទម្រង់មុតស្រួចរបស់រដ្ឋាភិបាលនេះ លោក អ៊ិត សំហេង បានលើកឡើងថា ក្រសួងការងារបានបង្កើតក្រុមការងារសិក្សាពីលទ្ធភាពក្នុងការធ្វើវិសោធនកម្មច្បាប់ស្តីពីការងារឱ្យស្របតាមបរិបទសេដ្ឋកិច្ច និងសង្គមដោយបានបញ្ចប់ការសិក្សាជាបឋមលើភាពចាំបាច់ និងអត្ថប្រយោជន៍នៃការធ្វើវិសោធនកម្មច្បាប់ស្តីពីការងារដោយបានសហការជាមួយអង្គការអន្តរជាតិខាងការងារ រៀបចំសិក្ខាសាលាពិគ្រោះយោបល់ត្រីភាគីនាពេលកន្លងមក ដើម្បីពិភាក្សាអំពីលទ្ធភាពលើការធ្វើវិសោធនកម្មច្បាប់ស្តីពីការងារនេះ។
ក្រសួងការងារបានបង្កើតក្រុមការងារយន្តការត្រីភាគីបូកសម្រាប់ពិភាក្សាការធ្វើវិសោធនកម្មច្បាប់ស្តីពីការងារនេះឡើងដែលមានសមាសភាពត្រីភាគីក្នុងចំនួនស្មើៗគ្នា ដើម្បីបន្តជំរុញកិច្ចសន្ទនាសង្គមក្នុងការពិភាក្សា និងពិគ្រោះយោបល់លើការធ្វើវិសោធនកម្មច្បាប់នេះសំដៅជំរុញកំណើនផលិតភាព ភាពប្រកួតប្រជែង និងបង្កើនឱកាសការងាររបស់កម្មករនិយោជិតស្របតាមសេចក្ដីត្រូវការក្នុងការអភិវឌ្ឍសង្គមសេដ្ឋកិច្ចកម្ពុជា។
ប៉ុន្តែលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាដែលបានចូលរួមក្នុងកិច្ចប្រជុំនេះថ្លែងពីថ្ងៃអង្គារថា ការធ្វើវិសោធនកម្ម ច្បាប់ការងារក្នុងពេលនេះគឺជាការខាតបង់ប្រយោជន៍ដ៏ធំសម្រាប់កម្មករនិយោជិត។
លោកបន្តថា ដោយសារតែការធ្វើវិសោធនកម្មនេះគឺបានកាត់បន្ថយប្រយោជន៍កម្មករដែលមានការងារវេនយប់ពី ១៣០ ភាគរយមកទទួលបាន ១០០ ភាគរយវិញដែលកន្លងទៅការងារវេនយប់នេះបានទទួលអត្ថប្រយោជន៍ដល់ទៅ ២០០ ភាគរយព្រោះវាទទួលរងហានិភ័យខ្ពស់។
បើតាមលោក ធន់ ការធ្វើវិសោធនកម្មនេះក៏គ្រោងនឹងកាត់បន្ថយថ្ងៃបុណ្យ ដែលប៉ះចំថ្ងៃឈប់សម្រាកស្រាប់គឺនឹងមិនមានការលើកថ្ងៃនោះទេ ដែលកត្តានេះគឺកាន់តែធ្វើឲ្យកម្មករខាតបង់ ព្រោះកន្លងទៅរដ្ឋាភិបាលបានកាត់ថ្ងៃឈប់សម្រាកចំនួន ៦ ថ្ងៃរួចមកហើយ។ បន្ថែមពីនេះការចែងអំពីនីតិវិធីនៃការដោះស្រាយវិវាទក៏មានលក្ខណៈផ្តល់អាទិភាពដល់និយោជកឲ្យមានសិទ្ធិខ្លាំងជាងផងដែរ ព្រោះក្នុងសេចក្តីព្រាងច្បាប់នេះគឺនៅតែបញ្ជាក់ថា និយោជក អាចជ្រើសរើសយកផ្លូវដោះស្រាយតាមប្រព័ន្ធតុលាការ ឬក្រុមប្រឹក្សាអាជ្ញាកណ្តាល។
ការធ្វើដូច្នេះអាចឲ្យនិយោជកមិនគោរពច្បាប់មួយចំនួនអាចយកលេសទាំងនេះប្តឹងទៅតុលាការ ដែលភាគច្រើនកម្មករតែងតែរងគ្រោះ។ «ខ្ញុំឃើញថា រដ្ឋាភិបាលបានជួយនិយោជកច្រើនហើយមិនគួរកាត់បន្ថយផលប្រយោជន៍កម្មករនិយោជិតបន្ថែមទៀត។ គួរតែគិតពីការធ្វើកំណែទម្រង់ផែនការវិនិយោគបែបលើកទឹកចិត្ត កាត់បន្ថយការិយាធិបតេយ្យ កាត់បន្ថយអំពើពុករលួយ និងការអនុវត្តច្បាប់ឲ្យបានរឹងមាំ គឺល្អប្រសើរជាង»៕
វីដេអូ៖