ភ្នំពេញៈ ក្រសួងការងារបណ្តុះបណ្តាលវិជ្ជាជីវៈបានណែនាំដល់គ្រប់បណ្តារោងចក្រ សហគ្រាសក្រុមហ៊ុន និងសណ្ឋាគារទូទាំងប្រទេសឲ្យធ្វើបច្ចុប្បន្នភាពលេខទូរស័ព្ទរបស់កម្មករនិយោជិតរបស់ខ្លួន ដើម្បីធានាដល់ការផ្តល់ព័ត៌មានចាំបាច់ស្របពេលមានការរីករាលដាលជំងឺកូវីដ ១៩ ហើយបានព្រមានថាករណីខកខាននឹងទទួលពិន័យ និងទោសទណ្ឌតាមច្បាប់។
សេចក្តីជូនដំណឹងដែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារបណ្តុះបណ្តាលវិជ្ជាជីវៈចេញផ្សាយកាលពីថ្ងៃទី ២៣ មីនា ឲ្យដឹងថា សម្រាប់កម្មករនិយោជិត ក្រសួងតម្រូវឱ្យផ្តល់លេខទូរស័ព្ទ ១ ខ្សែទៅផ្នែករដ្ឋបាលក្រុមហ៊ុន រោងចក្រ និងសណ្ឋាគារដែលខ្លួនកំពុងធ្វើការដោយសរសេរឱ្យច្បាស់ និងត្រឹមត្រូវ។
ក្រសួងការងារបានបញ្ជាក់ថា៖ «ការធ្វើយ៉ាងដូច្នេះ គឺដើម្បីឱ្យអ្នកទទួលបន្ទុករដ្ឋបាលធ្វើបច្ចុប្បន្នភាពតារាងបញ្ជីឈ្មោះ និងប្រគល់ឱ្យអធិការការងារមុនថ្ងៃទី ២៦ ខែមីនា ឆ្នាំ ២០២០ ហើយកម្មករត្រូវរក្សាលេខទូរស័ព្ទនោះជាដាច់ខាតក្នុងខែមីនា មេសា និងឧសភា ឆ្នាំ ២០២០។
ក្រោយខែឧសភាបើកម្មករណាមួយផ្លាស់ប្តូរត្រូវជូនដំណឹងជាលាយលក្ខណ៍អក្សរដល់អ្នកទទួលបន្ទុករដ្ឋបាលបន្ទាន់»។
ចំពោះម្ចាស់ក្រុមហ៊ុនដែលត្រូវធ្វើបច្ចុប្បន្នភាពលេខទូរស័ព្ទកម្មករនិយោជិតរបស់ខ្លួន ក្រសួងការងារបានទុកពេល ៣ ថ្ងៃគិតពីថ្ងៃទី ២៤ ដល់ថ្ងៃទី ២៦ ខែមីនាដោយត្រូវផ្ញើទៅកាន់នាយកដ្ឋានអធិការកិច្ចនៃក្រសួង ឬមន្ទីរការងាររាជធានី-ខេត្ត។
ជាមួយនេះដែរក្រសួងបានព្រមានថា៖ «ម្ចាស់ ឬនាយកក្រុមហ៊ុន រោងចក្រ សហគ្រាស និងសណ្ឋាគារទាំងឡាយដែលខកខានក្នុងការចាត់ចែងការងារធ្វើបច្ចុប្បន្នភាពលេខទូរស័ព្ទទំនាក់ទំនងរបស់កម្មករ និយោជិត ត្រូវទទួលការពិន័យតាមច្បាប់ស្តីពីការងារដោយអធិការការងារ និងត្រូវទទួលទោសទណ្ឌផ្សេងៗទៀតតាមច្បាប់ជាធរមាន»។
លោក កាំង ម៉ូនីកា អគ្គលេខាធិការរងនៃសមាគមរោងចក្រនៅកម្ពុជា (GMAC) បានលើកឡើងថា ត្រឹមតែ ៣ ថ្ងៃសម្រាប់ការធ្វើបច្ចុប្បន្នភាពលេខទំនាក់ទំនងរបស់កម្មករនិយោជិតនេះគឺអាចធ្វើបាន ព្រោះរាល់អ្នកគ្រប់គ្រងនៅតាមបណ្តារោងចក្រគឺសុទ្ធតែមានលេខទំនាក់ទំនងរបស់កម្មករដើម្បីទាក់ទងលើការងាររបស់ពួកគេ។
លោកបន្តថា៖ «ជាមួយនឹងវិធានការថ្មីនេះ យើងអាចមើលឃើញពីការខិតខំប្រឹងប្រែងខ្លាំងរបស់ក្រសួងការងារដើម្បីការពារការរីករាលដាលជំងឺ។ មានលេខទំនាក់ទំនងទៅកម្មករនិយោជិតទាំងអស់គឺធានាភាពងាយស្រួលតាមដានទំនាក់ទំនងជិតស្និទ្ធ ប្រសិនបើមានករណីនៃការឆ្លងជំងឺណាមួយត្រូវបានបញ្ជាក់នៅកន្លែងណាមួយ»។
លោក ប៉ាវ ស៊ីណា ប្រធានសហជីពចលនាកម្មករបានប្រាប់ភ្នំពេញប៉ុស្តិ៍ពីម្សិលមិញថា វិធានការថ្មីនៃការធ្វើបច្ចុប្បន្នភាពលេខទំនាក់ទំនងកម្មករនេះគឺជារឿងល្អមួយស្របពេលមានការរីករាលដាលនៃជំងឺកូវីដ ១៩ នៅកម្ពុជា។ លោកថាជាទូទៅកម្មករខ្លះមិនសូវយកចិត្តទុកដាក់នឹងលេខទំនាក់ទំនងប៉ុន្មានទេដោយធ្វេសប្រហែស និងឧស្សាហ៍ផ្លាស់ប្តូរលេខទំនាក់ទំនងជាញឹកញាប់ ដូច្នេះបើមានការផ្សព្វផ្សាយសេចក្តីជូនដំណឹងនេះទូលំទូលាយ នោះកម្មករនឹងយកចិត្តទុកដាក់ខ្លាំងវិញ។
លោកថា៖ «ពេលដែលក្រសួងតម្រូវបែបនេះ កម្មករទាំងអស់នឹងត្រូវតែបង្ខំចិត្តប្រើប្រាស់លេខទូរស័ព្ទណាមួយ។ ខ្ញុំគិតថា បើប្រកាសនេះត្រូវបានជ្រាបនោះ កម្មករទាំងអស់អាចនឹងបញ្ឈប់ការផ្លាស់ប្តូរលេខដោយប្រើប្រាស់លេខតែ ១ ខ្សែហ្នឹងជាប់លាប់ឋិតថេរ។ ប៉ុន្តែអ្វីដែលសំខាន់អ្នកណាដែលជាអ្នករាយការណ៍ទៅនៅពេលកម្មករណាម្នាក់មានរោគសញ្ញាអ្វីមួយ។
តើកម្មកររបស់យើងគាត់នឹងរាយការណ៍ទៅក្រសួងទេ? ហើយតើលេខពីខាងណាដែលទាក់ទងទៅបងប្អូនកម្មករ?»។
ចំណែកលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានថ្លែងថា វិធានការនេះអាចឲ្យក្រសួងការងារ ងាយស្រួលគ្រប់គ្រងចំនួនកម្មករនៅទូទាំងប្រទេស និងអាចទាក់ទងទៅកម្មករផ្ទាល់បានក្នុងករណីកើតមានបញ្ហាអ្វីមួយ។ ម្យ៉ាងទៀតវិធីនេះក៏ធ្វើឲ្យងាយស្រួលក្នុងការចេញវិធានការនានាដល់កម្មករ និងអាចគេចផុតពីករណីដែលមានក្រុមហ៊ុនខ្លះអាចព្យាយាមលាក់បាំងចំនួនកម្មករផងដែរ។
លោកបញ្ជាក់ថា៖ «នៅពេលដែលមានការលាក់បាំងចំនួនកម្មករគឺមានបញ្ហា ដូច្នេះត្រូវតែបញ្ជូនឈ្មោះមក។ មួយវិញទៀតក្នុងករណីដែលរដ្ឋមានគោលការណ៍ក្នុងការជួយដល់កម្មករដូចជា ការជួយឧបត្ថម្ភធន ឬការជួយដោយផ្ទាល់ក្នុងករណីផ្តល់ជូន ២០ ភាគរយអីអ៊ីចឹង ពេលកម្មករចុះឈ្មោះមានលេខទូរស័ព្ទ គឺថាក្រុមហ៊ុន និងរដ្ឋបាលរបស់ក្រុមហ៊ុនមិនអាចភូតកុហកបាននោះទេ»៕